ភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រីរដ្ធមន្ត្រីក្រសួងមុខងារសារធារណៈ និងជាប្រធានសហភាពសហព័ន្ធយុវជនកម្ពុជា ព្រមទាំងសហការី រួមទាំងសមាជិក សមាជិកា ស.ស.យ.ក លោក សុខ សម្បត្តិ អភិបាល នៃគណៈអភិបាលខណ្ឌបឹងកេងកង និងមន្ត្រីសាលាខណ្ឌ និងសង្កាត់ បានអញ្ជើញចូលរួមអបអរសាទរខួបកំណើតកុមាររួមគ្នាចំនួន ៥៥០នាក់ ជាមួយកុមាររស់នៅក្រោមការមើលថែទាំរបស់ អង្គការផ្ទះបាយកុមារ នាឱកាសទិវាកុមារអន្តរជាតិ ស្ថិតក្នុងសង្កាត់បឹងកេងទី៣ ខណ្ឌបឹងកេងកង រាជធានីភ្នំពេញ កាលពីព្រឹកថ្ងៃទី០១ ខែមិថុនា ឆ្នាំ២០២៤។
មិនខុសពីឆ្នាំមុនៗ ដែរ ក្នុងឱកាសទិវាកុមារអន្តរជាតិ ០១ មិថុនា ឯកឧត្ដម ហ៊ុន ម៉ានី និងសមាជិក សមាជិកា ស.ស.យ.ក បានអញ្ជើញរៀបចំកម្មវិធីខួបកំណើតរួម សម្រាប់កុមារា កុមារី នៃអង្គការផ្ទះបាយកុមារ ជាមួយនឹងការនាំមកនូវសម្ភារៈចាំបាច់មួយចំនួនមកឧបត្ថម្ភ ចំណីអាហារ ក្នុងនោះក៏មាននំខេកដើម្បីរៀបចំខួបកំណើតរួមគ្នា សម្រាប់ចែកជូនដល់កុមារនៅអង្គការផ្ទះបាយកុមារដែរ។
ជាមួយនេះ ឯកឧត្ដម បានគូសបញ្ជាក់ថា «ការចូលរួមចំណែកក្នុងអង្គការផ្ទះបាយកុមារ គឺជាផ្នែកមួយ នៃបេសកកម្មរយៈពេល ៤៥ ឆ្នាំ របស់ ស.ស.យ.ក ដែលយើងខិតខំប្រឹងប្រែង រួមចំណែក លះបង់ និងដឹកនាំចលនាតែមួយ ដើម្បីកិច្ចការងារសង្គម»។ ឯកឧត្ដម បន្តថា បេសកកម្មនេះ នឹងបន្តតទៅមុខបន្ថែមទៀត។
មានប្រសាសន៍ទៅកាន់អង្គពិធី ឯកឧត្ដម ហ៊ុន ម៉ានី ក៏បានកោតសរសើរ និងថ្លែងអំណរគុណដល់ លោក ង៉ូវ ឈីវ ប្រធានអង្គការផ្ទះបាយកុមារ ដែលបានបន្តឆន្ទៈ ក្នុងការប្រឹងប្រែងជួយគាំទ្រដល់កុមារ។
ទន្ទឹមនោះ ឯកឧត្ដម ក៏បានថ្លែងអំណរគុណដល់សប្បុរសជន សមាជិក សមាជិកា ស.ស.យ.ក ក្រុមហ៊ុនឯកជន អាជ្ញាធរសង្កាត់ និងខណ្ឌបឹងកេងកង ដែលបានចូលរួមឧបត្ថម្ភ និងជួយសម្របសម្រួលដល់អង្គការផ្ទះបាយកុមារ។ ឯកឧត្ដម គូសបញ្ជាក់ថា ឯកឧត្ដម និងសហការី នឹងមិនទៅណាចោលកុមារនៅអង្គការផ្ទះបាយកុមារទេ យ៉ាងហោចណាស់ក៏ព្យាយាមជួប ២ ដង ក្នុងមួយឆ្នាំដែរ គឺក្នុងថ្ងៃទិវាសិទ្ធកុមារអន្តរជាតិ និងទិវាបុណ្យណូអ៊ែល៕
