កីឡាបរទេស ៖ ខ្សែប្រយុទ្ធវ័យក្មេងប្រេស៊ីល Vinicius ជាអ្នករកបាន១គ្រាប់ជួយក្រុម Real Madrid យកឈ្នះលើក្រុម Real Valladolid ក្នុងលទ្ធផល ១-០ កាលពីយប់មិញនេះ ដែលកីឡាកររូបនេះលើកឡើងថា យើងដឹងច្បាស់ថាប្រសិនបើយើងបិទមិនឱ្យដៃគូរកគ្រាប់បាល់បាន នោះយើងនឹងឈ្នះការប្រកួតប្រាកដណាស់។
សម្រាប់ការប្រកួតនៅក្របខណ្ឌ La Liga ក្រុម Real Madrid បានបើកការវាយសម្រុកតាំងពីតង់ទី១ទៅ ប៉ុន្ដែមិនអាចធ្វើអ្វីក្រុមភ្ញៀវបាននោះទេ។ ការប្រកួតនេះ តម្រូវឱ្យលោក Zidane ផ្លាស់ប្ដូរកីឡាករថ្មីចូល នៅតំបន់ប្រយុទ្ធរបស់ខ្លួន ដើម្បីឱ្យមានភាពមុតស្រួចនៅតង់ទី២បន្ថែមទៀត។ Vinicius បានចូលនៅនាទី៥៨ ដោយជំនួស Jovic ហើយឈានដល់នាទី៦៥ រូបគេក៏រកបាន១គ្រាប់ ជួយក្រុមដើម្បីទទួលបានជ័យជម្នះក្នុងការប្រកួតនេះផងដែរ។
ក្រោយពីចប់ការប្រកួត ខ្សែប្រយុទ្ធវ័យក្មេងប្រេស៊ីលខាងលើបាននិយាយថា៖ “យើងសប្បាយចិត្តចំពោះការឈ្នះប្រកួតមួយនេះ។ ការចាប់ផ្ដើមនៅតង់ទី១ យើងពិតជាពិបាក ប៉ុន្តែនៅតង់ទី២គ្រប់យ៉ាងបានផ្លាស់ប្ដូរ និងយើងអាចគ្រប់គ្រងការប្រកួតនេះបាន។ យើងដឹងច្បាស់ថាប្រសិនបើយើងបិទមិនឱ្យដៃគូរកគ្រាប់បាល់បាន នោះយើងនឹងឈ្នះការប្រកួតប្រាកដណាស់”៕
