ភ្នំពេញ ៖ កីឡាករប៉ោ ភារិទ្ធ អ្នកប្រដាល់នៃក្លិបសមាគមកីឡាប្រដាល់ក្រសួងកសិកម្ម កៀកស្មារនិងកីឡាករលី ភា អ្នកប្រដាល់របស់ក្លិបប៉ែនកាក់គុនខ្មែរ ឡើងស្វាគ មន៍កីឡាករថៃក្រៀងក្រៃ ត.សិលាឆ័យ និងកីឡាករខឹកខាត់ ពៀកខាឃែរ៍ ខណៈកីឡាករថា សារុន អ្នកប្រដាល់នៃក្លិបពុទ្ធសេរីវង្សកីឡាពោសែនជ័យ ជួបកីឡាករអូបេគីស្ថានAdammxonov Narmuxammad នៅលើសង្វៀនស៊ីអិនស៊ី នាថ្ងៃសៅរ៍ទី០៨ ខែកុម្ភៈ ឆ្នាំ២០២០នេះ។
កីឡាករប៉ោ ភារិទ្ធ បន្ទាប់ពីគេធ្វើបានល្អដោយប្រមាណជា១០ប្រកួតចុងក្រោយវាយមិនដែលចាញ់កីឡាករបរទេសមក ពេលនេះត្រូវគេផ្គូផ្គងឲ្យឡើងសងសឹកលើកីឡាករថៃក្រៀងក្រៃ ត.សិលាឆ័យ ដែលធ្លាប់មកប្រកួតជាមួយកីឡាករកម្ពុជា ជាច្រើននាក់ ត្រូវអ្នកស្នេហាវិស័យកីឡាប្រដាល់ សន្និដ្ឋានមុនថា ភាគរយក្នុងការឈ្នះអ្នកប្រដាល់ថៃម្នាក់នេះមានភាគរយឈ្នះត្រឹមហាសិបប៉ុណ្ណោះ។
កីឡាករប៉ោ ភារិទ្ធ បើទោះជាគេ មានកណ្ដាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ និងមានកាយសម្បទារឹងមាំ ចិត្តប្រដាល់ធំ និងមានកលល្បិចខ្ពស់ក្នុងការប្រកួត ហើយធ្លាប់ជួបប្រកួតជាមួយថៃច្រើននាក់កន្លងមកក៍ដោយ ក៍ប្រហែលជាពិបាកមិនខាន ព្រោះកីឡាករថៃក្រៀងក្រៃ ត.សិលាឆ័យ នេះធ្លាប់មកប្រកួតនៅសង្វៀននាប្រទេសកម្ពុជា ជាច្រើនលើក មកហើយ ដោយមានឈ្នះចាញ់ជាមួយកីឡាករជើងខ្លាំងកម្ពុជាទៀតផង។ ចាំមើលកីឡាករប៉ោ ភារិទ្ធ ជាអ្នកឈ្នះឬក្រៀងក្រៃ ត.សិលាឆ័យ?។
ចំណែកការជួបគ្នារវាងកីឡាករលី ភា និងកីឡាករថៃខឹកខាត់ ពៀកខាឃែរ៍ ក្នុងប្រភេទទម្ងន់៥៧គីឡូក្រាម អ្នកទាំង២មិនធ្លាប់ជួបគ្នាទេពីមុនមក ហើយមិនទាន់មានប្រភពណាដឹងថាកីឡាករថៃម្នាក់នេះមានកម្រិតវិជ្ជាគុនខ្លាំងប៉ុណ្ណានោះទេ តែកីឡាករថៃ ភាគច្រើនវិជ្ជាគុនរបស់គេមិនខុសពីគ្នាប៉ុន្មានឡើយ គឺស្នៀតជើងទាត់ ជង្គង់ និងស្នៀតកាច់ផ្តួលហើយគេមានកម្លាំងស៊ុហ្វខ្លាំងទៀតផង។
ចំណែកកីឡាករលី ភា គេហាត់ប្រដាល់នៅកម្ពុជា តែគេទៅប្រកួតនៅប្រទេសថៃ ស្នៀតខ្លាំងរបស់គេគឺជើងទាត់ កណ្តាប់ដៃ និងកែងដែលអាចវាយប្រយោលក៍បានចូលកៀកក៍បាន។ កាលដែលលី ភា ប្រកួតនៅប្រទេសថៃស្នៀតកែងរបស់គេ ដែលធ្វើឲ្យគេផ្តួលគូប្រកួតជាបន្ទាប់ ហើយបានល្បីល្បាញមកដាល់សព្វថ្ងៃ។ ការប្រកួតនេះត្រូវបានអ្នកតាមដានប្រដាល់អះអាងថា មានភាគរយឈ្នះច្រៀនជាងកីឡាករថៃ បើទោះជាគេមិនធ្លាប់មកប្រកួតនៅសង្វៀននេះក៍ដោយ។ ចាំមើលរវាងកីឡាករលី ភា និងកីឡាករខឹកខាត់ ពៀកខាឃែរ៍ នរណាជាអ្នកឈ្នះ?។
ដោយឡែកកីឡាករថា សារុន ត្រូវគេផ្គូរផ្គងឲ្យជួបជាមួយកីឡាករអូបេគីស្ថានAdammxonov Narmuxammad ក្នុងប្រភេទទម្ងន់៦០គីឡូក្រាម អ្នកទាំង២មិនធ្លាប់ជួបគ្នាទេកន្លងមក ហើយមិនទាន់ដឹងថា កីឡាករអូបេគីស្ថានម្នាក់នេះមានវិជ្ជាគុនខ្លាំងប៉ុណ្ណានោះដែរ។
ចំណែកកីឡាករថា សារុន គេជាអ្នកប្រដាល់ដែលល្អស្នៀតដៃ និងស្នៀតជើងទាត់ ប៉ុន្តែចិត្តរបស់គេតូចបន្តិច។ អ្នកវិភាគប្រដាល់អះអាងថា ការវាយរបស់ថា សារុន កន្លងមកចលនាវាយលុករបស់គេលឿន ជាពិសេសស្នៀតកណ្តាប់ដៃតែម្តង អាចវាយចេញបានត្រង់ហើយចំទិសដៅបានល្អទៀតផង តែទោះជាយ៉ាងណាក៏ដោយក៏មិនអាចធ្វេសប្រហែសជាមួយនឹងស្នៀតជើងទាត់របស់កីឡាករជនជាតិអូបេគីស្ថាននោះឡើយ ហើយបើហ៊ានវាយមើលងាយគូប្រកួតនោះច្បាស់ជាចាញ់មិនខាន។ ចាំមើលរវាងកីឡាករថា សារុន និង កីឡាករអូបេគីស្ថានAdammxonov Narmuxammad នរណាជាអ្នកឈ្នះ?៕
