ភ្នំពេញ ៖ ក្នុងពិធីបើកសិក្ខាសាលាស្ដីពីការចុះបញ្ជីដីធ្លី នាព្រឹកថ្ងៃទី១៩ ខែសីហា ឆ្នាំ២០២៤ លោក ស៊ូ ស៊ីវត្ថា ប្រធានការិយាល័យរៀបចំដែនដីនគរូបនីយកម្មនឹងសំណង់ខណ្ឌព្រែកព្នៅ បានមានប្រសាសន៍ថា ប្រជាពលរដ្ឋនៅសង្កាត់សំរោង ពិសេសភូមិសំរោងត្បូងមុនគេ ត្រៀមឯកសារពាក់ពាន់ដើម្បីចុះបញ្ជី ហើយសម្រមសម្រួលជាមុនអោយរួចរាល់ដីមានវិវាទ និងដីមិនមានវិវាទ ដីជាប់ព្រំគ្នា ដើម្បីចុះបញ្ជីរមានលក្ខណៈជាប្រព័ន្ធ អោយបានលឿនរហ័សគ្រប់ៗគ្នា។
លោកប្រធានការិយាល័យរៀបចំដែនដីខណ្ឌបានបន្ថែមថា បងប្អូនដែលទទួលបានដំណឹងនេះហើយសូមជួយផ្សព្វផ្សាយបន្ដដល់បងប្អូនម្ចាស់ដី ដែលរស់នៅក្នុងក្រុងភ្នំពេញ ឬនៅតាមបណ្ដាខេត្តនានា ដែលបានទិញដីក្នុងសង្កាត់សំរោងសូមឲ្យពួកគាត់មកចុះបញ្ជីគ្រប់ៗគ្នា ឲ្យបានទាន់ពេលវេលា ព្រោះការចុះបញ្ជីជាលក្ខណៈប្រព័ន្ធនេះបងប្អូនពុំមានចំណាយថវិកាអ្វីឡើយ។ តែបើបងប្អូនចុះបញ្ជីដីធ្លីដោយដុំវិញ បងប្អូននឹងត្រូវចំណាយថវិកាច្រើនជាមិនខាន។
លោក ស៊ូ ស៊ីវុត្ថា បញ្ជាក់ថា សូមបងប្អូនប្រជាពលរដ្ឋ សហការឲ្យបានល្អប្រសើរជាមួយក្រុមការងារ ព្រោះការចុះបញ្ជីរមានលក្ខណៈជាប្រព័ន្ធ បានផ្តល់នូវសារៈប្រយោជន៍ដល់បងប្អូន ប្រជាពលរដ្ឋ ដោយធានាបាននូវភាពកក់ក្តៅ សុវត្ថិភាពដីធ្លី និងសិទ្ធិកាន់កាប់ដីធ្លីពេញលេញ ហើយវិញ្ញាបនប័ត្រសំគាល់ម្ចាស់អចលនៈវត្ថុទៀតសោត មានសារៈសំខាន់សំរាប់ធ្វើជាភស្តុតាង នូវការកាន់កាប់ដីធ្លីរបស់ខ្លួន និងចៀសវាងបាននូវការរំលោភបំពានលើដីធ្លី៕
