ភ្នំពេញ ៖ កីឡាករជើងខ្លាំងស្រករក្រោយឈុត សេរីវ៉ាន់ថង អ្នកប្រដាល់មកពីក្លិបរាហ៊ូកីឡាខេត្តបាត់ដំបង ឡើងដណ្តើមប្រាក់លានពីកីឡាករវ៉ាន់ វឿន អ្នកប្រដាល់របស់ក្លិបឃ្លាំងមឿងកីឡាខេត្តពោធិសាត់ ខណៈកីឡាករសោម វិឆ័យ អ្នកប្រដាល់មកពីក្លិបពន្លឺវិបុល ឡើងសាកកណ្តាប់ដៃគ្នាជាមួយកីឡាករ ឡុង ជិន អ្នកប្រដាល់នៃក្លិបខ្លារខិនមានរិទ្ធ នៅលើសង្វៀនស៊ីអិនស៊ី នាថ្ងៃសៅរ៍ទី១៤ ខែមីនា ឆ្នាំ២០២១នេះ។
កីឡាករជើងថ្មី ឈុត សេរីវ៉ាន់ថង ត្រូវជួបជាមួយកីឡាករវ៉ាន់ វឿន ក្នុងប្រភេទទម្ងន់៦០គីឡូក្រាម ប្រកួតនៅសង្វៀនស្រុកខ្មែរច្រើនលើកមកហើយ ទាំងថ្នាក់ជាតិ និងអន្តរជាត់ ដោយធ្លាប់បានឈ្នះខ្សែក្រវាត់ក្នុងប្រទេសដូចគ្នាទៀតផង។ ឈុត សេរីវ៉ាន់ថង គេជាកីឡាករជើងថ្មីមែនតែគេចេះក្បាច់គ្រប់ស្នៀត ទាំងស្នៀតកណ្តាប់ដៃ កែង ជើងទាត់ និងជង្គង់ គេអាចប្រើបានទាំងអស់ ហើយខ្លាំងទៀតផង ជាមួយនិងមានកម្លាំងស៊ុហ្វខ្លាំងផងនោះ ការប្រកួតកន្លងមកបានធ្វើឲ្យកីឡាករក្នុងស្រុក និងក្រៅស្រុកចុះចាញ់ជាបន្តបន្ទាប់។
រីឯវ៉ាន់ វឿន គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួស វ៉ាន់ វឿន នោះគឺខ្លាចតែចាញ់កម្លាំងស៊ុហ្វថៃមួយមុខប៉ុណ្ណោះ។ កីឡាករវ៉ាន់ វឿន បច្ចប្នន្នគេវាយឡើងកូដជាខ្លាំង ហើយត្រូវបានអ្នកផ្គូរផ្គងតាមសង្វៀនចាប់គូឲ្យប្រកួតស្ទើររាល់សប្តាហ៍ ហើយកីឡាកររូបនេះក៍មិនបានធ្វើឲ្យអ្នកទស្សនាខកបំណងនោះដែរ។ រវាងកីឡាករទាំង២នាក់នេះមិនមានអ្នកណាហ៊ានទស្សទាយមុនថាកីឡាករមួយណាជាអ្នកឈ្នះនោះទេ ។ ចាំមើលតើ វ៉ាន់ វឿន ឬឈុត សេរីវណ្ណថង នរណាជាអ្នកទទួលបានប្រាក់លាន?។
ដោយឡែកកីឡាករសោម វិឆ័យ ត្រូវជួបជាមួយកីឡាករឡុង ជិន ក្នុងប្រភេទទម្ងន់៦០គីឡូក្រាមផងដែរ។ សោម វិឆ័យ គេជាអ្នកប្រដាល់ដែលលេងស្នៀតជើងទាត់ និងកណ្តាប់ដៃ វាយចេញចូលបានល្អ និងការពារវិញក៍បានល្អផងដែរ ស្នៀតខ្លាំងរបស់សោម វិឆ័យ ទាំងនេះហើយដែលធ្លាប់ផ្តួលកីឡាករទាំងជើងចាស់ និងជើងថ្មីអោយចុះចាញ់ជាបន្តបន្ទាប់។
ចំណែកកីឡាករឡុង ជិន ជាអ្នកប្រដាល់វ័យក្មេងមានស្នៀតប្រដាល់ល្អ វាយចេញចូលលឿន និងរហ័ស និងមានបច្ចេកទេសក្នុងការប្រកួតល្អដែរ។ មួយទៀត គេវាយរហ័ស ដករហ័ស ចេញចូលលឿន និងមានផ្លែល្អថែមទៀត។ គេជាអ្នកប្រដាល់ស្រករក្រោយទេ តែគេមានស្នៀតប្រដាល់ល្អ ហើយធ្លាប់ផ្ដួលអ្នកប្រដាល់រួមជាតិ ដែលជាជើងខ្លាំងៗច្រើននាក់ហើយ។ ចាំមើលរវាងកីឡាករ ឡុង ជិន និងកីឡាករសោម វិឆ័យ នរណាជាអ្នកទទួលបានជ័យជំនះ៕
