កីឡាបរទេស ៖ លោក Josep Maria Bartomeu ប្រធានក្លឹប FC Barcelona មិនពេញចិត្តសម្រាប់ការកាត់ក្ដីរបស់ VAR ប៉ុន្មានប្រកួតនេះទេ ដោយលោកអះអាងថាដូចជាលំអៀងទៅក្រុមតែមួយ។
VAR បានជួយក្រុម Real Madrid ទទួលបានបាល់ប៉េណាល់ទី១១ម៉ែត្រកាលពីប្រកួតទល់ក្រុម Getafe កន្លងទៅ ហើយកាលពីយប់មិញនេះទៀត ពួកគេក៏បានបាល់ប៉េណាល់ទី១គ្រាប់ទៀតដែរ ក្រោយពីអាជ្ញាកណ្ដាលពិនិត្យ VAR ទៅ។ ២ប្រកួតនេះ ក្រុម Real Madrid ឈ្នះ១គ្រាប់ដូចគ្នា ហើយសុទ្ធតែប៉េណាល់ទីទាំងអស់។
ដោយបច្ចុប្បន្ន Real Madrid នាំមុខ Barcelona ៤ពិន្ទុ ខណៈការប្រកួតនៅសល់៤ប្រកួតទៀត។ជាមួយភាពចៃដន្យ២ប្រកួតជាប់គ្នានេះហើយ ទើបលោក Josep Maria Bartomeu ប្រធានក្លឹប Barcelona និយាយដោយមិនចុចឈ្មោះក្រុមចំថា VAR ហាក់ដូចជាលំអៀងទៅក្រុមតែមួយ ហើយក្រុមមួយនោះដដែលៗតែម្ដង។
លោក Bartomeu សង្កត់ធ្ងន់ថាលោកមិនមានអារម្មណ៍ល្អទេ នៅពេលលីគល្អជាងគេនៅលើលោក តែមាន VAR ដែលមិនដូចអ្វីគ្រប់គ្នាសង្ឃឹម។ វាមិនយុត្តិធម៌ឡើយ ដែលកើតឡើងទៅលើក្លឹបតែមួយរហូត៕
