ភ្នំពេញ ៖ កីឡាករប៊ឺត សង្ឃឹម អ្នកប្រដាល់របស់ក្លិបរ៉ាហាប់ស្វាយប៉ាក ជួបកីឡាករសេក គឹមសាន្ត អ្នកប្រដាល់មកពីក្លិបអង្គរមានជ័យខេត្តសៀមរាប ខណៈកីឡាករអេ ណារ័ត្រ អ្នកប្រដាល់នៃក្លិបសមាគមកីឡាប្រដាល់ក្រសួងកសិកម្ម ជួបកីឡាករវ៉ាន់ វឿន អ្នកប្រដាល់មកពីក្លិបឃ្លាំងមឿងកីឡាខេត្តពោធិសាត់ ក្នុងវគ្គពាក់កណ្តាលផ្តាច់ព្រ័ត្រឆ្ពោះទៅដណ្តើមជើងឯក រីឯធឿន ធារ៉ា អ្នកប្រដាល់នៃក្លិបសមាគមកីឡាប្រដាល់ក្រសួងកសិកម្ម ឡើសាកស្នៀតគុននិងកីឡាករឡុង សុវណ្ណឌឿន នៅលើសង្វៀនស៊ីអិនស៊ី នាថ្ងៃទី២៤ ខែឧសភា ឆ្នាំ២០២០។
ការជួបគ្នារវាងកីឡាករប៊ឺត សង្ឃឹម និងកីឡាករសេក គឺមសាន្ត នេះពិតជាធ្វើឲ្យអ្នកគាំទ្រកីឡាករទាំងសងខាងភ័យបុកពោះ បារម្មណ៍ជំនួសអ្នកទាំងពីរមិនខានព្រោះម្នាក់សុទ្ធតែបានបង្ហាញភាពខ្លាំងតាំងពីវគ្គជម្រុះកន្លងមក។ ប៊ឺត សង្ឃឹម ជាកីឡាករវ័យក្មេងកំពុងតែឡើងកូដ ដែលចេះប្រើក្បាចខ្មែរបុរាណគ្រប់ស្នៀត ចិត្តប្រដាល់ធំ ហើយព្រមទាំងមានកម្លាំងស៊ុហ្វខ្លាំងថែមទៀតផង។
ចំណែកកីឡាករសេក គឹមសាន្ត គេមានស្នៀតកណ្តាប់ដៃ និងកែងវាយចេញបានល្អ វាយមួយៗមែនតែចំគោលដៅ កីឡាកររូបនេះវ័យក្មេងមែនតែវាយមិនងាយច្រឡោតជាមួយគូប្រកួតនោះទេ។ ចាំមើលរវាងកីឡាករសេក គឹមសាន្ត និងកីឡាករប៊ឺត សង្ឃឹម នរណាជាអ្នកឈ្នះឡើងទៅវគ្គបន្ត?។
ចំណែកអ្នកប្រដាល់គុនខ្មែរវ័យក្មេងអេ ណារ័ត្ន ជួបជាមួយកីឡាករវ៉ាន់ វឿន ក៍ពង់ធ្វើឲ្យអ្នកតាមដានចាប់អារម្មណ៍ផងដែរ ដែលអេ ណារ័ត្ន កំពុងមានឈ្មោះបោះសំឡេង មួយរូប នាបច្ចប្បន្ននេះ រូបគេខ្លាំងខាងកណ្តាប់ដៃ និងជង្គង់ ហើយការវាយរល់លើរូបគេមិនត្រូវការ ស្ទាបស្ទង់ដៃគូច្រើននោះទេ ដ្បិតទម្លាប់របស់គេឡើងរេញគឺ ចូលបុកវាយមិនរាថយ ទោះបីលទ្ធផល ឈ្នះឬ ចាញ់ បែបណាក្ដី។
រីឯកីឡាករវ៉ាន់ វឿន គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួស វ៉ាន់ វឿន នោះគឺខ្លាចតែចាញ់កម្លាំងស៊ុហ្វថៃមួយមុខប៉ុណ្ណោះ។ ក្នុងការប្រកួតនេះគេមិនហ៊ានអះអាងមុនថា វ៉ាន់ វឿន ជាអ្នកឈ្នះលើអេ ណារ័ត្ន នោះទេ។ ចាំមើលតើ វ៉ាន់ វឿន ជាអ្នកឈ្នះឬកីឡាករអេ ណារ័ត្ន?។
ដោយឡែកធើន ធារ៉ា ដែលបាត់មុខមួយរយៈពីសង្វៀននោះ ពេលនេះឡើងមកសុំសាកល្បងវិជ្ជាគុននិងកីឡាករឡុង សុវណ្ណឌឿន តែលទ្ធផលយ៉ាងណានោះក៍មិនមានអ្នកតាមដានកីឡាប្រដាល់ហ៊ានអះអាងមុនថាអ្នកណាជាអ្នកឈ្នះនោះដែរ។ ចាំមើលធើន ធារ៉ា និងឡុង សុវណ្ណឌឿន នរណាជាអ្នកឈ្នះ?៕
