ភ្នំពេញ ៖ កីឡាករជើងខ្លាំងស្រករក្រោយឈុត សេរីវ៉ាន់ថង អ្នកប្រដាល់មកពីក្លិបរាហ៊ូកីឡាខេត្តបាត់ដំបង ស្វាគមន៍កីឡាករតាញ់ មករា អ្នកប្រដាល់នៃសមាគមន៍កីឡាប្រដាល់ក្រសួងការពារជាតិ មកសងសឹកនិងដណ្តើមប្រាក់លាន ខណៈកីឡាករឌុម កែវដា អ្នកប្រដាល់មកពីក្លិបម្កុដរាជសីហ៍ ឡើងដណ្តើមប្រាក់លាននិងកីឡាករឡុង ឡា អ្នកប្រដាល់មកពីក្លិបអបរំកាយស្រុកអន្លុងវែង នៅលើសង្វៀនស៊ីអិនស៊ី នាថ្ងៃសៅរ៍ទី០២ ខែឧសភា ឆ្នាំ២០២០នេះ។
កីឡាករជើងថ្មី ឈុត សេរីវ៉ាន់ថង ត្រូវជួបជាមួយកីឡាករតាញ់ មករា ក្នុងប្រភេទទម្ងន់៦០គីឡូក្រាម អ្នកទាំងពីធ្លាប់ជួបគ្នាម្តងដោយឈុត សេរីវ៉ាន់ថង យកឈ្នះលើតាញ់ មករា ដោយពន្ទុ។ កីឡាករឈុត សេរីវ៉ាន់ថង គេជាកីឡាករជើងថ្មីមែនតែគេចេះក្បាច់គ្រប់ស្នៀត ទាំងស្នៀតកណ្តាប់ដៃ កែង ជើងទាត់ និងជង្គង់ គេអាចប្រើបានទាំងអស់ ហើយខ្លាំងទៀតផង។
ចំណែកកីឡាករស្រករក្រោយតាញ់ មករា គេក៏ជាអ្នកប្រដាល់ជើងខ្លាំងមួយរូប ក្នុងចំណោមអ្នកប្រដាល់ស្រករក្រោយដូចគ្នា ដែលអ្នកតាមដានកីឡាប្រដាល់កម្ពុជាកំពុងតែចាប់អារម្មណ៍ចំពោះស្នៀតគុនរបស់កីឡាកររូបនេះ ដែលឡើងប្រកួតម្តងៗធ្វើឲ្យអ្នកទស្សនាជក់ចិត្តជាខ្លាំងនោះ ព្រោះគេមានកណ្ដាប់ដៃ និងកម្លាំងជើងទាត់ខ្លាំង តែមិនសូវសំបូរច្ចេកទេសនិងល្បិចកលប្រកួតប៉ុន្មានឡើយ ក៍ប៉ុន្តែគេមានកម្លាំងស៊ុហ្វខ្លាំង។ ចាំមើលតាញ់ មករា អាចសងសឹកឈុត សេរី វ៉ាន់ថង បានដែរឬយ៉ាងណា?។
ដោយឡែកកីឡាករឌុម កែវដា ជួបជាមួយកីឡាករឡុង ឡា វិញក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក។ ឌុម កែវដា គែជាអ្នកប្រដាល់ចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកណ្តាប់ដៃនិងកែង ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។
រីឯឡុង ឡា គេមានស្នៀតខ្លាំងទាំងដៃទាំងជើងនិងកែង ដែលបានធ្វើឲ្យកីឡាករឡុង ឡា ផ្តួលដៃគូជាបន្តបន្ទាប់ទាំងកីឡាករជើងចាស់ និងកីឡាករជើងថ្មីហើយបានធ្វើឲ្យរូបគេឡើងប្រកួតឈានដល់គូឯក និងប្រកួតលក្ខណៈមិត្តភាពអន្តរជាតិ នាពេលកន្លងមក។ ចាំមើលរវាងឡុង ឡា និងឌុម កែវដា នេះនរណាជាអ្នកឈ្នះទទួលបានប្រាក់លាន?៕
