ភ្នំពេញ ៖ កីឡាករជើងខ្លាំងទម្ងន់មធ្យមមឿង សុខហ៊ុច អ្នកប្រដាល់ពុទ្ធសេរីវង្សពោសែនជ័យកីឡា ជួបកីឡាករអូបេគីស្ថាន ឈ្មោះចេមស៊ីតប៊េក ខណៈកីឡាករអេលីត ភក្តី អ្នកប្រដាល់របស់ក្លិបប៉ែនកាក់គុនខ្មែរ ឡើងជួបកីឡាករថៃបានឆាសឹក នៃការប្រកួតលក្ខណៈមិត្តភាពអន្តរៈជាតិ នៅលើសង្វៀនស៊ីអិនស៊ី នាថ្ងៃអាទិត្យទី១៥ ខែមីនា ឆ្នាំ២០២០នេះ ។
កីឡាករមឿង សុខហ៊ុយ ដែលគេមើលឃើញថាឡើងប្រកួតស្ទើររាល់សប្តាហ៍ទៅហើយនោះ ត្រូវគេផ្គូផ្គងឲ្យជួបជាមួយកីឡាករជនជាតិអូបេគីស្ថាន ឈ្មោះចេមស៊ីតបេ ក្នុងប្រភេទទម្ងន់៦៣.៥គីឡូក្រាម ដែលអ្នកទាំង២នាក់នេះមិនដែលជួបគ្នាទេនាពេលកន្លងមក ហើយមិនទាន់ដឹងថាកីឡាករអូបេគីស្ថាន ឈ្មោះចេមស៊ីតប៊េក នេះមានវិជ្ជាគុនខ្លាំងប៉ុណ្ណានោះទេ តែកីឡាករដែលហ្វឹកហាត់នៅប្ទេសថៃភាគច្រើនខ្លាំងខាងស្នៀតជើងទាត់ កណ្តាប់ដៃ និងមានកម្លាំងស៊ុហ្វខ្លាំងទៀតផង។
មួយរយៈចុងក្រោយនេះមឿង សុខ ហ៊ុចត្រូវបានគេមើលឃើញថា ដើរលុកលុយរករឿងតាមបណ្តាសង្វៀនទួរទស្សន៍ជាមួយអ្នកប្រដាល់ជើងចាស់ដែលខ្លាំងៗ និងកីឡាករអន្តរជាតិជាច្រើននាក់ដែលមានលទ្ធផលគួរឲ្យសសើរ ជាមួយផ្តួលគូប្រកួតជាបន្តបន្ទាប់មកនោះ។មឿង សុខហ៊ុច គេមានកាយសម្បទារឹងមាំ ព្រមទាំងមានស្នៀតកែង និងជង្គង់ ដែលធ្វើឲ្យគូរប្រកួតរបស់ខ្លួន ពិបាកទប់ទល់ និងជាស្នៀតសម្រាប់ផ្ដួលគូរប្រកួតដ៍អស្ចារទៀតផង។ ការវាយចេញរបស់សុខហ៊ុច ធ្ងន់ហើយរហ័ស ជាពិសេសស្នៀតជើងទាត់ និងជង្គង់ របស់គេខ្លាំងណាស់អាចបញ្ចេញបានភ្លាមៗស្របជាមួយដៃតែម្តង។ ប៉ុន្តែយ៉ាងណា មឿង សុខហ៊ុច ក៏មានចំណុចខ្សោយខ្លះដែរ គឺត្រង់វាយចេញហើយមិនសូវការពាវិញនោះទេដែលធ្វើឲ្យដៃគូប្រកួតឆាប់ដឹងពីចំណុចខ្សោយទាំងនេះ ហើយមួយវិញទៀតគេប្រកួតរាល់សប្តហ៍ពេក មិនសូវមានកម្លាំងគ្រប់គ្រាន់តទល់និងដៃគូនោះទេ។ ចាំមើលមឿង សុខហ៊ុច អាចយកឈ្នះលើកីឡាករអូបេគីស្ថានចេមស៊ីតប៊េក បានឬយ៉ាងណា?។
ដោយឡែកកីឡាករអេលីត ភក្តី ត្រូវជួបជាមួយកីឡាករថៃបានឆាសឹក ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ព្រោះកីឡាករទាំងពីរនាក់ជាអ្នកប្រដាល់មកប្រកួតនៅសង្វៀននេះថ្មីដូចគ្នា បើទោះជាមិនទាន់ដឹងពីប្រវត្តិកីឡាករថៃម្នាក់នេះពិតមែន តែតាមការសង្កេតកន្លងមកកីឡាករថៃភាគច្រើនខ្លាំងខាងស្នៀតជើងទាត់ និងជង្គង់ ចំណែកកណ្តាប់ដៃ និងកែងមិនខ្លាំងប៉ុន្មានទេតែគេអាចប្រើការបាន។
ចំណែកកីឡាករស្រករក្រោយអេលីត ភក្តី គេមានស្នៀតប្រដាល់ល្អ និងវាយខ្លាំងទាំងដៃទាំងជើងតែម្តង ពិសេសស្នៀតកែងរបស់គេ គូប្រកួតទាំងជើងចាស់និងជើងថ្មីពេលប្រកួតជាមួយអេលីត ភក្តី បើហ៊ានប្រហេះច្បាស់ជាបែកដោយស្នៀតកែងរបស់គេមិនខាន។ កីឡាករអេលីត ភក្តី មិនត្រឹមតែមានស្នៀតប្រដាល់ល្អប៉ុណ្ណោះទេ គេក៍មានកម្លាំងស៊ុហ្វក៍រឹងមាំផងដែរ សម្រាប់ការជួបគ្នារវាង អេលីត ភក្តី និងថៃបានឆាសឹក នេះមិនមាននរណាហ៊ានទស្សទាយមុនថានរណាជាអ្នកទទួលបានជ័យជម្នះនោះឡើយ គឺហាសិបភាគរយម្នាក់ប៉ុណ្ណោះ។ ចាំមើលរវាងកីឡាករទាំងពីរនរណាជាអ្នកឈ្នះ?៕
