ភ្នំពេញ ៖ នាព្រឹកថ្ងៃទី១៩ ខែកុម្ភៈ ឆ្នាំ២០២០នេះ ត្រូវបានសមត្ថកិច្ចខណ្ឌទួលគោក ហៅតារាហ្វេសប៊ុក និងជាអ្នកលក់ផលិតផលតាមប្រព័ន្ធអនឡាញដ៏ល្បីឈ្មោះតាមការ Liveវីដេអូស្លៀកពាក់សិចស៊ីស្រើបស្រាលសម្ញែងអស់កេរខ្មាសនៅលើបណ្ដាញសង្គមហ្វេសប៊ុក អ្នកនាងវ៉ែន រចនា ហៅ ថៃ ស្រីនាង ទៅអប់រំណែនាំ និងធ្វើកិច្ចសន្យាបញ្ឈប់សកម្មភាពLiveវីដេអូស្លៀកពាក់សិចស៊ី។
ការកោះហៅទៅព្រមាន និងអប់រំនេះ បានធ្វើឡើង ខណៈដែលសម្តេចតេជោ ហ៊ុន សែន កាលពីថ្ងៃទី១៧ ខែកុម្ភៈ ឆ្នាំ២០២០ បានថ្លែងនៅក្នុងកិច្ចប្រជុំក្រុមប្រឹក្សាជាតិដើម្បីស្ត្រី ដោយបានបញ្ជាឲ្យក្រសួងប្រៃសណីយ៍ និងទូរគមនាគមន៍ត្រូវចាត់វិធានការក្ដៅបិទរាល់ការLiveលក់ផលិតផលតាមបណ្ដាញសង្គមហ្វេសប៊ុក ដែលមានភាពសិចស៊ីបញ្ចេញអស់កេរខ្មាសនាំឲ្យប៉ះពាល់ដល់សង្គម និងមានអំពើចាប់រំលោភលើកុមារជាដើម។
ដោយឡែកបើយោងតាមកិច្ចសន្យារបស់ ថៃ ស្រីនាង បានទទួលស្គាល់កំហុសដោយបញ្ជាក់ថាចំពោះការLive លក់ផលិតផល និងសម្លៀកបំពាក់លក់តាមOnline រយៈពេលកន្លងមក នាងបានស្លៀកពាក់មានភាពស៊ិចស៊ី លិចលើ ខើចក្រោម ដែលធ្វើឲ្យប៉ះពាល់ដល់តម្លៃ និងកិត្តិយសរបស់ស្ដ្រីខ្មែរ វប្បធម៌ប្រពៃណីជាតិ និងច្បាប់ជាធរមាន។
នៅក្នុងកិច្ចសន្យាដដែលនេះ អ្នកលក់ផលិតផលសិចស៊ី ថៃ ស្រីនាង បានបន្តទៀតថា នាងសូមសន្យាថា នឹងដកចេញនូវរាល់រូបភាពស៊ិចស៊ី អាក្រាត ក្នុង Page របស់ខ្លួនដែលបានផុសកន្លងមក។ដូច្នេះសូមសន្យាថាឈប់បង្ហោះរូបភាព ស៊ិចស៊ី អាក្រាត ដែលនាំឲ្យប៉ះពាល់ដល់សេចក្ដីថ្លៃថ្នូរទំនៀមទម្លាប់ប្រពៃណីខ្មែរទៀតឡើយ ប្រសិនជាថ្ងៃក្រោយនាងមិនគោរពតាមកិច្ចសន្យាខាងលើនាងសុខចិត្ដទទួលខុសត្រូវចំពោះមុខច្បាប់ទាំងស្រុងចាប់ពីថ្ងៃនេះតទៅ។
ជាមួយគ្នានេះ ក្រៅតែពីធ្វើកិច្ចសន្យាខាងលើ ថៃ ស្រីនាង ក៏បានធ្វើវីដេអូសុំទោសជាសាធារណៈដោយលើកឡើងថា នាងខ្ញុំសូមធ្វើការសុំទោសដល់មហាជនព្រោះកន្លងមក បានធ្វើការបង្ហោះចែករំលែករូបភាព និងវីដេអូ ដែលមានលក្ខណៈសិចស៊ីជ្រុលហួសនាំឲ្យប្រាសចាកពីប្រពៃណី និងទំនៀមទម្លាប់ខ្មែរ ពិសេសធ្វើឲ្យប៉ះពាល់ដល់កិត្តិយសរបស់ស្ត្រីខ្មែរ។ ខ្ញុំសង្ឃឹមថា បងប្អូន និងក្រសួងពាក់ព័ន្ធទាំងអស់ នឹងអនុគ្រោះលើកលែងកំហុសដល់នាងខ្ញុំ នាងខ្ញុំក៏បានសន្យាឈប់បន្តសកម្មភាពនេះទៀតដែរ។
ដោយឡែកបើតាមប្រភព បានបង្ហើបថា សមត្ថកិច្ច នឹងបន្ដស្រាវជ្រាវចាត់វិធានការចំពោះអ្នកលក់ផលិតផលតាមអនឡាញលើបណ្ដាញសង្គម Facebookឯទៀត ដែលសិចស៊ី និងបញ្ចេញកេរខ្មាសជ្រុលហួសហេតុទៅអប់រំ និងធ្វើកិច្ចសន្យាផងដែរ៕
