ភ្នំពេញ ៖ មានប្រសាសន៍ក្នុង កិច្ចប្រជុំគណៈបញ្ជាការឯកភាពខណ្ឌ កាលពីរសៀលថ្ងៃទី១៣ ខែសីហា ឆ្នាំ២០២៤ លោកសុខ សម្បត្តិ អភិបាលនៃគណៈអភិបាលខណ្ឌបឹងកេងកង បានណែនាំឲ្យការិយាល័យសាធារណការ ដោយសហការជាមួយអាជ្ញាធរខណ្ឌ សង្កាត់ ដើម្បីចុះមើលផ្លូវដែលទទួលរងការខូចខាត និងចុះមើលប្រព័ន្ធប្រឡាយលូតាមបណ្តាសង្កាត់ទាំង៧ ក្នុងភូមិសាស្ត្រខណ្ឌបឹងកេងកង នារដូវភ្លៀងនេះ ហើយការគ្រប់គ្រងនិងថែរក្សាសន្តិសុខ សណ្តាប់ធ្នាប់សាធារណៈ ក៍ត្រូវថែរក្សាឲ្យបានល្អផងដែរ ដើម្បីទទួលបានការជឿជាក់ពីបងប្អូនប្រជាពលរដ្ឋប្រកបដោយប្រសិទ្ធភាពខ្ពស់។
លោក សុខ សម្បត្តិ បានមានប្រសាសន៍លើកឡើងទៀតថា ការិយាល័យសាធារណការ ត្រូវបង្កើតក្រុមការងារ ដោយសហការជាមួយសង្កាត់ទាំង៧ ក្នុងការចុះមើលផ្លូវដែលទទួលរងការខូចខាត ដូចជា គ្រលុកសំបុកមាន់ ត្រូវធ្វើការជួសជុលឡើងវិញជាបន្ទាន់ កុំទុកឲ្យទទួលរងការខូចខាតធ្ងន់ធ្ងរ ក្នុងការជួសជុលអស់ថវិកាច្រើន។ ការងារមួយទៀត ពាក់ព័ន្ធប្រព័ន្ធលូ ក៏ត្រូវចុះពិនិត្យមើលស្ថានភាពលូនៅតាមបណ្ដាមូលដ្ឋានសង្កាត់ទាំង៧ មានន័យថា បើកន្លែងណាទទួលរងការខូចខាត ឬបាក់បែក ក៏ត្រូវតែធ្វើការជួសជុលឡើងវិញជាបន្ទាន់ផងដែរ។
ប្រធានគណៈបញ្ជាកាឯកភាពខណ្ឌបានបន្ថែមថា ចំពោះមែកឈើដែលបាំងស្តុប និងទឹកដក់នៅចិញ្ចើមផ្លូវ ក៏ជាការងារដែលត្រូវតែធ្វើផងដែរ ពោលគឺត្រូវកាយទឹកដក់ទាំងនោះឲ្យហូរចូលលូ មិនត្រូវទុកឲ្យស្អុយនៅតាមបណ្ដាផ្លូវសាធារណៈនោះទេ។ ពាក់ព័ន្ធនឹងការងារនេះផងដែរ លោកប្រធានគណបញ្ជាករឯកភាពខណ្ឌ ក៏បានណែនាំដល់សង្កាត់ទាំង៧ ត្រូវយកចិត្តទុកដាក់លើការងារនេះ គឺត្រូវជំរុញឲ្យមន្ត្រីចុះទៅដល់មូលដ្ឋាន ដើម្បីពិនិត្យស្ថានភាពជាក់ស្ដែងតែម្តង។ ជាងនេះទៅទៀត អាជ្ញាធរខណ្ឌ សង្កាត់ ត្រូវចុះណែនាំប្រជាពលរដ្ឋ ឲ្យពួកគាត់ទុកដាក់ វេចខ្ចប់សំរាមឲ្យបានល្អ កុំទុកដាក់សំរាមនៅលើគម្របលូ មាត់លូ ដែលបង្កឲ្យស្ទះលូ ពេលដែលភ្លៀងធ្លាក់ម្ដងៗ។
ជាចុងក្រោយលោកសុខ សម្បត្តិ ក៍បានធ្វើការណែនាំដល់គណៈបញ្ជាការឯកភាពរដ្ឋបាលសង្កាត់ទាំង៧ ត្រូវអនុវត្តឲ្យបានជោគជ័យនូវ គោលនយោបាយភូមិ សង្កាត់ មានសុវត្ថិភាព និងបន្តប្រឹងប្រែងបំពេញតួនាទី ភារកិច្ច និងបេសកកម្ម ឲ្យកាន់តែសកម្មថែមទៀត ក្នុងការបង្ការ ទប់ស្កាត់ បង្ក្រាប នូវរាល់បទល្មើសផ្សេងៗក្នុងដែនសមត្ថកិច្ច សំដៅកសាងបាននូវទំនុកចិត្ត និងការជឿជាក់ពីបងប្អូនប្រជាពលរដ្ឋប្រកបដោយប្រសិទ្ធភាពខ្ពស់៕
