ភ្នំពេញ ៖ នៅសល់៥១ថ្ងៃទៀតប៉ុណ្ណោះ ដល់ថ្ងៃដែលប្រទេសកម្ពុជាយើងរៀបចំការប្រកួតកីឡាស៊ីហ្គេម លើកទី៣២ និងអាស៊ានបារ៉ាហ្គេម លើកទី១២ ហើយអាជ្ញាធរតាំងពីថ្នាក់ភូមិ សង្កាត់ រហូតដល់ខណ្ឌបឹងកេងកងរបស់យើង ត្រូវរៀបចំសន្តិសុខ សណ្តាប់ធ្នាប់ ដើម្បីទទួលស្វាគមន៍មេដឹកនាំ និងប្រតិភូកីឡាមកពីបណ្តាប្រទេសនានា ដោយកម្លាំងរបស់យើត្រូវធ្វើឲ្យបានល្អឲ្យដូច កាលដែលយើងទទួលស្វាគមន៍កិច្ចប្រជុំកំពូលអាស៊ាន កន្លងមកផងដែរ។
យើងទាំងអស់គ្នាបាននិងកំពុងចូលរួមជាមួយរាជរដ្ឋាភិបាល ប្តេជ្ញាចិត្តខ្ពស់ក្នុងការត្រៀមរៀបចំគ្រប់ផែនការសកម្មភាពទាំងអស់ឱ្យបានគ្រប់ជ្រុងជ្រោយ ដើម្បីជំរុញឱ្យព្រឹត្តិការណ៍កីឡាជាប្រវត្តិសាស្ត្រលើកដំបូងរបស់កម្ពុជា ក្រោយរង់ចាំអស់រយៈពេល៦៥ឆ្នាំនេះ ឲ្យទទួលបានជោគជ័យដ៏ធំធេងជូនជាតិ និងកំណត់ត្រាជាប្រវត្តិសាស្ត្រអាស៊ានផងដែរ»។ ទាំងនេះគឺជាការលើកឡើងរបស់លោក សុខ សម្បត្តិ អភិបាលនៃគណអភិបាលខណ្ឌបឹងកេងកង ក្នុងកិច្ចប្រជុំគណៈបញ្ជាការឯកភាពរដ្ឋបាលខណ្ឌបឹងកេងកង នាថ្ងៃទី១៥ ខែមីនា ឆ្នាំ២០២៣នេះ។
លោកបន្តថា ការងារសន្តិសុខសណ្តាប់គឺសំខាន់ណាស់ ក្នុងការរស់នៅរបស់បងប្អូនប្រជាពលរដ្ឋគ្រប់រូប ក៍ដូចជាទទួលបានសុវត្ថិភាពក្នុងការធ្វើដំណើរក្បួនថ្នាក់ដឹកនាំ និងប្រជាពលរដ្ឋគ្រប់រូបទាំងអស់ផងដែរ ហើយគណៈបញ្ជាការឯកភាពខណ្ឌគឺធ្វើរហូត មិនគិតថាថ្ងៃបុណ្យ ឬថ្ងៃឈប់សម្រាកនោះទេ។
លោកបន្តថា ក្នុងការរៀបចំសន្តិសុខ សណ្តាប់ធ្នាប់នេះផងដែរកម្លាំងរបស់យើង ត្រូវមើលឲ្យមែនទែននៅតំបន់ផ្សារដែលមានរថយន្តចតគ្មានសណ្តាប់ធ្នាប់ ដែលបានធ្វើឲ្យបាត់បង់សោភ័ណ្ឌភាពផ្សារ និងមានការកស្ទះ ពិបាកក្នុងការធ្វើដំណើររបស់ប្រជាពលឆ្លងកាត់ជារៀងរាល់ថ្ងៃ។ ម៉្យាងទៀតត្រូវកំណត់គោលដៅកន្លែងណាដែលអាចមានបញ្ហា ពិសេសដីឡូត៍ដែលទុកចោលត្រូវផ្សព្វផ្សាយឲ្យម្ចាស់សំអាត កាំឆ្កាព្រៃឲ្យអស់ ជាងនេះទៅទៀតត្រូវត្រួតពិនិត្យមើលក្រែងមានផ្លូវសំបុកមាន់ និងការូឡាដែលអាចមានបែកបាក់ជាអន្លើ ត្រូវរាយការណ៍និងជួសជុលជាបន្ទាន់។
ក្នុងនោះផងដែរលោកអភិបាលខណ្ឌ ក៍បាននែនាំដល់សង្កាត់ត្រូវផ្តល់របាយការណ៍ការងាររបស់ខ្លួន ជារៀងរាល់ថ្ងៃ ពិសេសត្រូវចុះពិនិត្យ ទង់ជាតិដាក់ឲ្យបានគ្រប់ផ្ទះ និងនែនាំដល់សណ្ឋាគារ ខុនដូ ផ្ទះសំណាក់ ត្រូវថតលិខិតឆ្លងដែន និងអត្តសញ្ញាណប័ន គ្រប់អ្នកដែលមកស្នាក់នៅទាំងអស់ គឺត្រូវធ្វើរហូតតែម្តង។ ជាចុងក្រោយលោកក៍បានជំរុញឲ្យកម្លាំងមានសមត្ថកិច្ចទាំងថ្នាក់ខណ្ឌ និងសង្កាត់ទាំងអស់ត្រូវបន្តឃ្លាំមើល ក្នុងមូលដ្ឋានរបស់ខ្លួនក្រែងមានជនឆ្លៀតឱកាសលួចធ្វើសកម្មភាពខុសច្បាប់ផ្សេងៗ៕
