(ភ្នំពេញ)៖ លោកវរសេនីយ៍ត្រី តូច គឹមសុង នាយនគរបាលប៉ុស្ដិ៍រដ្ឋបាលសង្កាត់ឫស្សីកែវ តំណាងឱ្យលោក មូល វិរះ ចៅសង្កាត់ និងលោកវរសេនីយ៍ឯក ហ៊ាង ថារេត អធិការខណ្ឌ បានដឹកនាំក្រុមការងារចុះសួរសុខទុក្ខ និងឧបត្ថម្ភគ្រឿងឧបភោគ បរិភោគ ហើយនឹងថវិកា ដើម្បីជួយសម្រាលបន្ទុកជីវភាពមួយចំនួនដល់អតីតយុទ្ធជនកម្ពុជា ដែលរស់នៅក្នុងមូលដ្ឋានខណ្ឌពោធិ៍សែនជ័យ នាព្រឹកថ្ងៃទី៣១ ខែតុលា ឆ្នាំ២០២២។
បើតាមលោកវរសេនីយ៍ត្រី តូច គឹមសុង ដែលបានលើកឡើងនៅក្នុងសកម្មភាពចុះសួរសុខទុក្ខ និងឧបត្ថម្ភគ្រឿងឧបភោគ បរិភោគ និងថវិកា ដើម្បីជួយសម្រាលបន្ទុកជីវភាពមួយចំនួនដល់អតីតយុទ្ធជនកម្ពុជា នេះគឺបានយកចិត្តទុកដាក់រៀបចំធ្វើឡើងក្រោយពីក្នុងនាមប៉ុស្ដិ៍រដ្ឋបាលសង្កាត់ ក៏ដូចជារូបលោកផ្ទាល់ បានទទួលដំណឹង ថាក្រៅពីអតីតយុទ្ធជនកម្ពុជាខាងលើនេះ បានជួបឧបត្ថវៈហេតុដួលបាក់ដៃ ហើយក៏មានភរិយាកំពុងសម្រាកព្យាបាលជម្ងឺនៅឯមន្ទីរពេទ្យ ជាមួយនឹងកូនៗក្នុងបន្ទុកបាននិងកំពុងមានជម្ងឺរលាកស្រោមខួរ ហើយនឹងបាត់បង់ការងារធ្វើ ក្នុងការរកស៉ីទទួលទានចិញ្ចឹមជីវិត ដោយជួបបញ្ហាកង្វះខាតយ៉ាងខ្លាំងក្នុងជីវភាពរស់នៅ។
លោកវរសេនីយ៍ត្រី តូច គឹមសុង បានលើកឡើងទៀតថា សកម្មភាពចុះសួរសុខទុក្ខ និងឧបត្ថម្ភគ្រឿងឧបភោគ បរិភោគ និងថវិកា ដើម្បីជួយសម្រាលបន្ទុកជីវភាពមួយចំនួនដល់អតីតយុទ្ធជនកម្ពុជា នេះដែរគឺបានយកចិត្តទុកដាក់រៀបចំធ្វើឡើងបន្ទាប់ពីប៉ុស្ដិ៍នគរបាលរដ្ឋបាលសង្កាត់ បានទទួលការគាំទ្រ និងឧបត្ថម្ភជា អង្ករ៥០គីឡូ, មី២កេស, ទឹកផ្លែឈើ២កេស, ទឹកដោះគោ២យួរ, ទឹកសុទ្ធ២កេស, ទឹកត្រី១កេស, ទឹកសុីអុីវ២យួរ, ត្រីខពីយួរ, ប្រេងឆា១ប៊ីដុង៥លីត្រ, និងថវិកា២០មុឺនរៀល ដោយក្ដីមនោសញ្ចេតនារីករាយ និងរាប់អានជួយជ្រោមជ្រែងពីសំណាក់បងប្អូនប្រជាពលរដ្ឋ និងសប្បុរសជននានា ក្នុងមូលដ្ឋាន។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានសមាគមអតីតយុទ្ធជនកម្ពុជា កាលពីថ្ងៃទី១៧ ខែមិថុនា ឆ្នាំ២០២២ បានដាក់ចេញតាមរយៈការអំពាវនាវ នៅក្នុងសារលិខិតមួយ ចំនួន៧ចំណុច នៃខួបលើកទី១៥ ទិវាអតីតយុទ្ធជនកម្ពុជា ២១ មិថុនា ឆ្នាំ២០២២។
ក្នុងសារលិខិតរបស់សម្តេចតេជោ ហ៊ុន សែន ក្នុងឱកាសខួបលើកទី១៥ នៃទិវាអតីតយុទ្ធជនកម្ពុជា បានអំពាវនាវដូចតទៅ៖
ទី១៖ បងប្អូនអតីតយុទ្ធជនកម្ពុជា សូមបន្តរក្សាស្មារតីវីរភាពដ៏ឧត្តុងឧត្តម និងសេចក្ដីថ្លៃថ្នូរ ជាពលរដ្ឋឆ្នើមរបស់ជាតិមាតុភូមិ ដើម្បីបន្តធ្វើជាគំរូល្អក្នុងសង្គមជាតិ។ រាជរដ្ឋាភិបាល និងប្រជាជនកម្ពុជាទូទាំងប្រទេស ពិតជាចងចាំជានិច្ចនូវការលះបង់ និងគុណបំណាច់ដ៏ធំធេងរបស់បងប្អូនអតីតយុទ្ធជនគ្រប់រូប ចំពោះជាតិមាតុភូមិជាទីស្នេហានៃយើង។
ទី២៖ គ្រប់ក្រសួង ស្ថាប័ន អង្គភាព និងអាជ្ញាធរដែនដីគ្រប់ថ្នាក់ ត្រូវរៀបចំគណៈប្រតិភូចុះសួរសុខទុក្ខបងប្អូន អតីតយុទ្ធជនតាមមូលដ្ឋាន និងយុទ្ធជន យុទ្ធនារី ជាពិសេស យុទ្ធជនយុទ្ធនារី ក្នុងអង្គភាពកងកម្លាំងប្រដាប់អាវុធ សម្ព័ន្ធមេត្រីភាព យុទ្ធជន យុទ្ធនារី ដែលកំពុងសម្រាកព្យាបាលនៅតាមមន្ទីរពេទ្យ និងជនពិការនៅតាមមណ្ឌលយោធិនពិការ ដើម្បីលើកទឹកចិត្ត និងផ្សារភ្ជាប់មនោសញ្ចេតនាជាមួយអតីតយុទ្ធជន និងយុទ្ធជន យុទ្ធនារី។
ទី៣៖ ក្រសួងព័ត៌មាន ត្រូវណែនាំប្រព័ន្ធឃោសនារបស់រដ្ឋនិងឯកជន ឱ្យជួយផ្សព្វផ្សាយសារាចរ និងសារលិខិតរបស់រាជរដ្ឋាភិបាលក្នុងឱកាសខួបលើកទី១៥ ទិវាអតីតយុទ្ធជនកម្ពុជា ក៏ដូចជាសមិទ្ធផលនានាពាក់ព័ន្ធនឹងវិស័យអតីតយុទ្ធជនឱ្យសាធារណជនជាតិនិងអន្តរជាតិបានយល់ដឹង និងជ្រួតជ្រាបកាន់តែទូលំទូលាយបន្ថែមទៀត។
ទី៤៖ ក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវបន្តអនុវត្តឱ្យបានល្អ និងមានប្រសិទ្ធភាពនូវការផ្តល់សេវារបបសន្តិសុខសង្គមសម្រាប់អតីតយុទ្ធជន និងគ្រួសារអតីតយុទ្ធជន តាមរយៈបេឡាជាតិអតីតយុទ្ធជន នៅទូទាំងប្រទេស។ ម៉្យាងវិញទៀត ក្រសួងត្រូវខិតខំជំរុញការអនុវត្តគម្រោងសាងសង់ផ្ទះជូនអតីតយុទ្ធជន និងគ្រួសារដូចដែលបានបញ្ចូល ក្នុងផែនការវិនិយោគសាធារណៈរបស់រាជរដ្ឋាភិបាល។
ទី៥៖ ក្រសួងរៀបចំដែនដី នគរូបនីយកម្ម និងសំណង់ និងក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវសហការជាមួយក្រសួង ស្ថាប័នពាក់ព័ន្ធ បន្តជំរុញការអនុវត្តគោលនយោបាយ ស្តីពីការផ្តល់សម្បទានដីសង្គមកិច្ច ជូនអតីតកងកម្លាំងប្រដាប់អាវុធ និងគ្រួសារឲ្យកាន់តែមានប្រសិទ្ធភាពខ្ពស់។
ទី៦៖ ក្រសួងស្ថាប័នពាក់ព័ន្ធ អាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទ ត្រូវចូលរួមក្នុងការជួយឧបត្ថម្ភគាំទ្រដល់អតីតយុទ្ធជន ជាពិសេស ត្រូវយកចិត្តទុកដាក់ជួយឧបត្ថម្ភគាំទ្រដល់គ្រួសារអតីតយុទ្ធជនដែលកំពុងជួបប្រទះការលំបាក។
ទី៧៖ សមាគមអតីតយុទ្ធជនកម្ពុជាគ្រប់ថ្នាក់ ត្រូវបន្តពង្រឹងពង្រីកសកម្មភាពរបស់សមាគមតាមស្មារតី នៃសេចក្តីសម្រេចចិត្តមហាសន្និបាតតំណាងសមាគមអតីតយុទ្ធជនកម្ពុជាទូទាំងប្រទេសលើកទី២។
សមាគមអតីតយុទ្ធជនកម្ពុជា ត្រូវបន្តធ្វើជាស្នូលក្នុងការលើកកម្ពស់តួនាទីអតីតយុទ្ធជននៅក្នុងសង្គម និងលើកទឹកចិត្ត ឲ្យបងប្អូនអតីតយុទ្ធជនប្រកាន់ខ្ជាប់នូវស្មារតីសាមគ្គីភាព និងការជួយជ្រោមជ្រែងគ្នាទៅវិញទៅមក ព្រមទាំងចូលរួម ឲ្យបានសកម្មក្នុងចលនាប្រឡងប្រណាំង ៣ពូកែ ដើម្បីជាប្រយោជន៍ដល់បងប្អូន និងប្រទេសជាតិ។
សូមជម្រាបផងដែរថា ថ្ងៃទី២១ ខែមិថុនា ឆ្នាំ២០២២ គឺជាទិវាប្រវត្តិសាស្ត្រ ប្រកបដោយមោទនភាពបំផុត ដែលបងប្អូនអតីតយុទ្ធជន និងប្រជាពលរដ្ឋ នៅទូទាំងកម្ពុជា ប្រារព្ធខួបលើកទី១៥ ទិវាអតីតយុទ្ធជនកម្ពុជា ដើម្បីរំឭកដល់គំរូវីរភាពដ៏មោះមុត និងគុណបំណាច់ដ៏ធំធេងរបស់វីរយុទ្ធជន យុទ្ធនារី នៃកងកម្លាំងប្រដាប់អាវុធ និងប្រជាពលរដ្ឋ គ្រប់ស្រទាប់ដែលបានពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិជាទីស្នេហានៃយើង៕ 
