ភ្នំពេញ ៖ សាលាសង្កាត់ពញ្ញាពន់ នាថ្ងៃទី៣១ ខែមីនា ឆ្នាំ២០២៥ នេះ បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុ នៅក្នុងភូមិវែង និងភូមិព្រៃពង្រ ស្ថិតក្នុងសង្កាត់ពញ្ញាពន់ ខណ្ឌព្រែកព្នៅ រាជធានីភ្នំពេញ ដែលមានការចូលរួមពីលោកបណ្ឌិត ពឹង រតន: អនុប្រធានមន្ទីរដែនដីនគរូបនីយកម្មរាជធានីភ្នំពេញ លោកឌិត និមល អភិបាលរងខណ្ឌព្រែកព្នៅ លោកស៊ូ ស៊ីវុត្ថា ប្រធានការិយាល័យរៀបចំដែនដី នគរូបនីយកម្មសំណង់ សុរិយោដី និងភូមិបាលខណ្ឌព្រែកព្នៅ និងមន្ត្រីក្រោមឱវាទ ព្រមទាំងមន្ត្រីសង្កាត់ និងប្រជាពលរដ្ឋជាច្រើនរូបផងដែរ។
ក្នុងឱកាសនោះលោក ស៊ូ ស៊ីវុត្ថា បានមានប្រាសាសន៍ថា សូមអរគុណសន្តិភាព អរគុណសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ការចែកវិញ្ញាបនបត្រសម្គាល់ម្ចាស់អចលនវត្ថុ នាថ្ងៃនេះជាកាដូរបស់រាជរដ្ឋាភិបាល ជូនដល់បងប្អូនប្រជាពលរដ្ឋ ក្នុងភូមិវែង និងភូមិព្រៃពង្រ ស្ថិតក្នុងសង្កាត់ពន្សាំង យើងនេះ ហើយលោកក៍សូមអរគុណដល់មន្ត្រីថ្នាក់សង្កាត់ និងភូមិ ដែលបានជួយសម្រួលដល់ក្រុមការងារមន្ត្រីភូមិបាលខណ្ឌព្រែកព្នៅយើង សម្រចបានដោយរលូនតាំងពីចាប់ផ្តើមរហូតមកដល់ថ្ងៃចែកវិញ្ញាបនបត្រសម្គាល់ម្ចាស់អចលនវត្ថុ នេះ។
ចំណែកលោកបណ្ឌិត ពឹង រតន: បានណែនាំឱ្យប្រជាពលរដ្ឋដែលទទួលបានវិញ្ញាបនបត្រសម្គាល់ម្ចាស់អចលនវត្ថុ ទាំងអស់សូម ទុកដាក់បណ្ណឱ្យមានសណ្តាប់ធ្នាប់ មានការប្រុងប្រយ័ត្នខ្ពស់ កុំឱ្យបាត់បង ឬខូចខាត សម្រាប់យកទៅប្រើប្រាស់ទៅថ្ងៃមុខ។ លោកបាន បញ្ជាក់ថាការចែកជូន វិញ្ញាបនបត្រសម្គាល់អចលនៈវត្ថុជូនដល់ប្រជាពលរដ្ឋនៅក្នុងភូមិវែង និងភូមិព្រៃពង្រ ស្ថិតក្នុងសង្កាត់ពញ្ញាពន់ នេះ គឺធ្វើឡើងរយៈពេល៥ថ្ងៃគឺចាប់ពីថ្ងៃទី៣១ ដល់ថ្ងៃទី០៤ ខែមីនា ឆ្នាំ២០២៥ សាលាសង្កាត់ពញ្ញាពន់ ខណ្ឌព្រែកព្នៅ។ បើផុតរយៈពេលនេះគឺត្រូវទៅយកនៅ មន្ទីររៀបចំដែនដីនគរូបនីយកម្ម សំណង់ និងសុរិយោដី ដែលមានទីតាំងនៅជិតទីស្ដីការគណៈរដ្ឋមន្ដ្រី។
ដោយឡែកលោកឌិត និមល បានបញ្ជាក់ថា ការចុះបញ្ជីក្បាលដីនេះបានផ្តល់នូវសារប្រយោជន៍ ដល់ប្រជាពលរដ្ឋ គឺធានាបាននូវភាពកក់ក្តៅ សុវត្ថិភាពដីធ្លី និង សិទ្ធិ កាន់កាប់ដីធ្លីពេញលេញជូនដល់ប្រជាពលរដ្ឋគ្រប់រូប ហើយម្យ៉ាងទៀត សម្រាប់ធ្វើជាភស្តុតាង ក្នុងការកាន់កាប់ដីធ្លីរបស់ខ្លួន ចៀសវាង ការរំលោភ បំពានលើដីធ្លី។ ហើយប័ណ្ណនេះក៏អាចផ្តល់លទ្ធភាពដល់បងប្អូនប្រជាពលរដ្ឋ យកទៅប្រើប្រាស់ ដាក់ធានាក្នុងការខ្ចីលុយ ពីធនាគារយកមកប្រកបរបរ ធ្វើអាជីវកម្មផ្សេងៗថែមទៀតផង៕
