ភ្នំពេញ ៖ បើយោងតាមប្រភព និងរូបភាពសហព័ន្ធកីឡាបាល់ទាត់កម្ពុជា និងការបង្ហោះលើផេក(Cambodia SEA GAMES 2023) ក្នុងទិសស្លោក#យើងនាំគ្នាឆ្ពោះទៅស៊ីហ្គេម_អាស៊ានប៉ារ៉ាហ្គេម_ឆ្នាំ២០២៣_ទាំងអស់គ្នា #កីឡារស់ក្នុងសន្ដិភាព_SPORTS_LIVE_IN_PEACE បានបញ្ជាក់អោយដឹងនៅរសៀលថ្ងៃទី១៤ ខែតុលា ឆ្នាំ២០២១ថា, សហព័ន្ធកីឡាបាល់ទាត់កម្ពុជា បានប្រកាសថា កីឡាករជម្រើសជាតិកម្ពុជា៦រូប ត្រូវបានរកឃើញវិជ្ជមានកូវីដ-១៩ អំឡុងបំពេញបេសកកម្មក្នុង ការប្រកួតជម្រុះពានរង្វាន់ AFC Asian Cup China 2023 នៅប្រទេសបារ៉ែន គឺមានកីឡាករ ចាន់ វឌ្ឍនាកា, គួច សុកុម្ភៈ, សឿយ វិសាល, សារ៉េត គ្រីយ៉ា, កែវ សុខសិលា និង អ៊ាន ពិសី។
បច្ចុប្បន្នកីឡាករកម្ពុជាទាំង៦រូប កំពុងសម្រាកព្យាបាលនៅសណ្ឋាគារមួយ ដែលរៀបចំដោយក្រសួងសុខាភិបាលប្រទេសបារ៉ែន។ រីឯកីឡាករ និងក្រុមការងារក្រុមជម្រើសជាតិកម្ពុជាផ្សេងទៀត មិនមានបញ្ហាអ្វីនោះទេ បន្ទាប់ពីធ្វើតេស្ដ PCR ហើយពួកគេ នឹងត្រូវចាកចេញពីបារ៉ែននាល្ងាចនេះ លើកលែងតែកីឡាករវិជ្ជមានកូវីដ-១៩ ដែលត្រូវសម្រាកព្យាបាលនៅបារ៉ែន រហូតជាសះស្បើយ។ នេះបើយោងតាមសហព័ន្ធកីឡាបាល់ទាត់កម្ពុជា។
គួរបញ្ជាក់ថា ការឆ្លងជំងឺរាតត្បាតជាសកលរបស់កីឡាករជម្រើសជាតិខាងលើ កើតមានឡើងអំឡុងពេលក្រុមគោព្រៃកម្ពុជា ធ្វើការប្រកួតជម្រុះ Play-Off ជាមួយកោះហ្គាំ ដោយបានយកឈ្នះទាំង២ជើង ក្នុងលទ្ធផល ៣-១ ដើម្បីឡើងទៅវគ្គជម្រុះជុំទី៣ នៃពានរង្វាន់ AFC Asian Cup China 2023៕
