កីឡាបរទេស ៖ ពិតជាមានឥទ្ធិពលខ្លាំងណាស់កីឡាករ Cristiano Ronaldo ពិតជាមិនសរសើរមិនបាន ដោយទើបតែត្រូវបានក្លឹប Man Utd ប្រកាសអំពីវត្តមានវិលត្រលប់ថ្មីថ្មោងមិនដល់១ថ្ងៃផង ក៏នាំឲ្យក្លឹបចំណេញលើរឿងធំ ២ បាត់ទៅហើយ។
រឿងដែលនាំឲ្យក្លឹបចំណេញលើរឿងធំ២នេះ ទី ១) គឺចំនួន Follower លើ Instagram របស់ក្លឹប Man Utd បានកើនឡើងពី ៤៣,១ លានមកដល់ ៤៥ លានហើយត្រឹមតែក្រោយរយៈពេលមិនដល់មួយថ្ងៃស្រួលបួលផងនោះ ពោលជាតួលេខកើនឡើងជិត២លាន Follower ឯណោះ។ ទី ២) គឺភាគហ៊ុនរបស់ក្លឹប Man Utd បានមានការកើនឡើងតម្លៃដល់ទៅ ៩,៨ ភាគរយ ដែលតម្លៃហ៊ុនចាស់គឺ ១៧,៣៨ ដុល្លារ តែក្រោយ Ronaldo មកដល់ឡើងដល់ ១៩,០៩ ដុល្លារ ជារួមតម្លៃផ្សារហ៊ុនរបស់ក្លឹបកើនឡើង ២៩៣ លានដុល្លារត្រឹមមួយពព្រិចភ្នែក។បញ្ជាក់ថា តាមដំណឹងក្លឹប Man Utd ទំនងជាចាយលុយ ១២,៨ លានផោន បូកនឹងកិច្ចព្រមព្រៀងផ្សេងៗជិត ៧ លានផោនទៀត សម្រាប់នាំយក Ronaldo ចេញពី Juventus។ ចំពោះសុពលភាពកុងត្រារបស់កីឡាករព័រទុយហ្គាល់ លឺថាមានរយៈពេល ២ ឆ្នាំ ពោលនឹងផុតនៅចុងខែមិថុនា ឆ្នាំ ២០២៣៕
