ភ្នំពេញ ៖ កីឡាករកម្ពុជា៣គូឡើងសាកកណ្តាប់ដៃគ្នានៅលើសង្វៀនស៊ីអិនស៊ីក្នុងនោះមានកីឡាករពុទ្ធ ឆាយរិទ្ធី អ្នកប្រដាល់នៃក្លិបពុទ្ធសេរីវង្សកីឡាពោធិសែនជ័យ ជួបកីឡាករគឹម វាសនា អ្នកប្រដាល់របស់ក្លិបកងពលតូចទ័ពពិសេសឆ័ត្រយោង៩១១ រីឯសេក គឹមរួន អ្នកប្រដាល់មកពីក្លិបម្កុដរាជសីហ៍ ជួបកីឡាករឡុង ឡា អ្នកប្ដាល់របស់ក្លិបសាលវ័នកីឡា ខណៈកីឡាករសេក គឹមសាន្ត អ្នកប្រដាល់មកពីក្លិបអង្គរមានជ័យខេត្តសៀមរាប ជួបជាមួយកីឡាករនីម នន របស់ក្លិបកងពលតូចទ័ពពិសេសឆ័ត្រយោង៩១១ នាថ្ងៃទី២៥ ខែមេសា ឆ្នាំ២០២០។
កីឡាករពុទ្ធ ឆាយរិទ្ធី ជួបជាមួយកីឡាករគឹម វាសនា នេះក្នុងប្រភេទទម្ងន់៦៧គីឡូក្រាម ដែលពួកគេទាំងពីរនាក់នេះមិនដែលជួបគ្នាទេកន្លងមក។ ពុទ្ធ ឆាយរិទ្ធី គេអ្នកប្រដាល់ម្នាក់ដែលគូប្រកួតល្មមៗពិបាកក្នុងការបង្ក្រាបគេណាស់ព្រោះតែ ឆាយរិទ្ធីគេជាអ្នកប្រដាល់ដែល មានស្នៀតជើងទាត់ និងកណ្តាប់ដៃខ្លាំង និងធ្ងន់ ហើយមានចិត្តប្រដាល់ធំថែមទៀត។
ចំណែកកីឡាករគឹម វាសនា ពេលនេះគេរឹងមាំទាំងកាយសម្បទា ខ្លាំងទាំងស្នៀតប្រដាល់ បន្ទាប់ពីគេជួបប្រកួតជាមួយថៃច្រើននាក់កន្លងមកនេះ។ គឹម វាសនា ឥឡូវគេជាជើងខ្លាំងរបស់កម្ពុជា ក្នុងប្រភេទទម្ងន់៦៧ គីឡូក្រាមនេះ ព្រោះគេមានកណ្តាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ កែង ក៏ល្អថែមទៀតផងដែរ។ ចាំមើលការប្រកួតនេះ គឹម វាសនា និងពុទ្ធ ឆាយរិទ្ធី នរណាជាអ្នកឈ្នះនោះ?។
រីឯកីឡាករសេក គឹមរួន ជួបជាមួយឡុង ឡា ក្នុងប្រភេទទម្ងន់៦៣.៥គីឡូក្រាម អ្នកទាំងពីរក៍មិនធ្លាប់ជួបគ្នាដែរកន្លងមក។ សេក គឹមរួន បើជួបគូប្រកួតខ្លាំងគេក៍ខ្លាំង តែជួបគូប្រកួតខ្សោយគេក៍ខ្សោយទៅតាមនោះដែរ ស្នៀតខ្លាំងរបស់គេ គឺកណ្តាប់ដៃនិងស្នៀតជើងទាត់ ហើយគេជាកីឡាករមានចិត្តប្រដាល់ធំ ព្រមទាំងកម្លាំងស៊ុហ្វខ្លាំងថែមទៀត។ចំណែកកីឡាករស្រករក្រោយឡុង ឡា គេមានស្នៀតខ្លាំងទាំងដៃទាំងជើងនិងកែង ហើយស្នៀតខ្លាំងទាំងនេះបានធ្វើឲ្យកីឡាករឡុង ឡា ផ្តួលដៃគូជាបន្តបន្ទាប់ទាំងកីឡាករជើងចាស់ និងកីឡាករជើងថ្មី ។ ចាំមើលរវាងឡុង ឡា និងកីឡាករសេក គឹមរួន នេះនរណាជាអ្នកឈ្នះ?។
ដោយឡែកសេក គឹមសាន ត្រូវជួបជាមួយកីឡាករនីម នន ក្នុងប្រភេទទម្ងន់៦០គីឡូក្រាម អ្នកទាំងពីរមីនធ្លាប់ជួបគ្នាទេកន្លងមក។ សេក គឹមសាន្ត គេមានស្នៀតកណ្តាប់ដៃ និងកែងវាយចេញបានល្អ វាយមួយៗមែនតែចំគោលដៅ កីឡាកររូបនេះវ័យក្មេងមែនតែវាយមិនងាយច្រឡោតជាមួយគូប្រកួតនោះទេ ហើយវាយមិនមើលស្រាលដៃគូឡើយ តែយ៉ាងណាការប្រកួតដែលគេមើលថាអាចផ្តួលបានគឺគេមិនប្រោសនោះទេ។ ចំណែកនីម នន ជាកីឡាករស្រករក្រោយតែស្នៀតប្រយុត្តិរបស់គេគ្រាន់បើ ស្នៀតខ្លាំងរបស់គេបានទាំងដៃ ទាំងជើងព្រមគ្នាតែម្តង តែយ៉ាងណាគេនៅអន់ខាងកម្លាំងស៊ុហ្វ បើគូប្រកួតវាយបុកតែបីឬបួនទឹកនោះ គឺគេអស់ស៊ុហ្វហើយ។ ចាំមើលរវាងកីឡាករកម្ពុជានីម នន និងកីឡាករសេក គឹមសាន នេះនរណាជាអ្នកឈ្នះ?៕
