ភ្នំពេញ ៖ កីឡាករជើងខ្លាំងវ័យក្មេង អេលីត ភក្តី អ្នកប្រដាល់របស់ក្លិបប៉ែនកាក់គុនខ្មែរ ជួបកីឡាករល្អសាច់សេក គឹមរួន ក្នុងវគ្គពាក់កណ្តាលផ្តាច់ព្រ័ត្រឆ្ពោះទៅដណ្តើមខ្សែក្រវាត់ រីឯកីឡាករថៃជួបកីឡាករថៃដូចគ្នា គឺហ្វាស៊ីថង ប.យុទ្ធភូមិ ជួបរិទ្ធអៃយ៉ារ៉ា ក.សិលាឆ័យ នៅលើសង្វៀនស៊ីអ៊ិនស៊ី នាថ្ងៃសៅរ៍ទី១៤ ខែធ្នូ ឆ្នាំ២០១៩នេះ។
កីឡាករជើងខ្លាំងវ័យក្មេង អេលីត ភក្តី ជួបប្រកួតជាមួយកីឡាករសេក គឹមរួន ក្នុងប្រភេទទម្ងន់៦៣.៥ គ.ក្រ អ្នកទាំងពីរមិនធ្លាប់ជួបគ្នាទេកន្លងមក។ ការជួបគ្នារវាងកីឡាករទាំងពីរពិតជាស្វិតស្វាញជាមិនខាន ព្រោះទំរាំបានឡើងមកដល់វគ្គនេះ កីឡាករម្នាក់ម្នាក់ៗមានការប្រកួតពិតជាមិនធម្មតាឡើយ ដែលបានយកឈ្នះលើកីឡាករថៃរៀងៗខ្លួន តាំងពីវគ្គជម្រុះកន្លងមក។
កីឡាករអេលីត ភក្តី បច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកណ្តាប់ដៃនិងកែង ដែលអាចវាយចេញជាប្រយោលក៏បាន ចូលកៀកក៏បាន ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។ ក្រុមអ្នកតាមដានកីឡាប្រដាល់និយាយថា កីឡាករអេលីត ភក្តី មួយរយៈចុងក្រោយនេះកំពុងក្តោបក្តាប់សំណាងឈ្នះម្តងហើយម្តងទៀត ស្ទើរតែគ្រប់ការប្រកួតតែម្តង ខណៈដែលសំណាងដែលកីឡាកររូបនេះទទួលបាននោះ គឺមិនមែនបានដោយភាពចៃដន្យនោះទេ ប៉ុន្តែគឺបានមកពីសមត្ថភាពពិតៗតែម្តង។
ចំណែកកីឡាករសេក គឹមរួន ការប្រកួតរបស់គេកន្លងមក បើជួបគូប្រកួតខ្លាំងគេក៍ខ្លាំង តែជួបគូប្រកួតខ្សោយគេក៍ខ្សោយទៅតាមនោះដែរ តែគេប្រកួតឈ្នះច្រើនជាងចាញ់ ដែលបានធ្វើឲ្យអ្នកគាំទ្រចាប់អារម្មណ៍ពីមួយប្រកួតទៅមួយប្រកួតចង់ទស្សនានៃការឡើងរេញរបស់គេ។ស្នៀតខ្លាំងរបស់កីឡាករសេក គឹមរួន គឺកណ្តាប់ដៃនិងស្នៀតជើងទាត់ ហើយគេជាកីឡាករមានចិត្តប្រដាល់ធំ ព្រមទាំងកម្លាំងស៊ុហ្វខ្លាំងថែមទៀត។ ចាំមើលរវាងកីឡាករសេក គឹមរួន និងកីឡាករអេលីត ភក្តី នណាជាអ្នកឈ្នះបានឡើងទៅវគ្គផ្តាច់ព្រ័ត្រ?។
ដោយឡែកកីឡាករថៃហ្វាស៊ីថង ប.យុទ្ធភូមិ ជួបរិទ្ធអៃយ៉ារ៉ា ក.សិលាឆ័យ ក្នុងវគ្គពាក់កណ្តាលផ្តាច់ព្រ័ត្រ នេះត្រូវអ្នកតាមដានកីឡាប្រដាល់ក្នុងស្រុកលើកឡើងថា ការជួបគ្នារវាងកីឡាករថៃដូចគ្នានេះមិនសូវល្អមើលឡើយព្រោះ ពួកគេវាយមិនអស់ពីសមត្ថភាព ដោយគួកគេជិះឡានមកជាមួយគ្នា ដេកជាមួយគ្នាដូចនេះការចាញ់ឈ្នះអាចអោយកីឡាករណាម្នាក់ក៍បាន។ ចាំមើលកីឡាករម្នាក់ណាបានឡើងទៅវគ្គផ្តាច់ព្រ័ត្រ?៕
