ភ្នំពេញ ៖ វត្តនៅក្នុងខណ្ឌព្រែកព្នៅ មានចំនួន១៨វត្ត សុទ្ធតែបានទទួលការកាន់វេនបិណ្ឌតាមប្រពៃណី រយៈពេលកន្លៈខែពីប្រជាពុទ្ធបរិស័ទ្ធចំណុះជើងវត្ត និងមកពីទីជិតឆ្ងាយទាំងអស់ មិនមានវត្តណាមួយដាច់ចង្ហាន់ នាក្នុងរដូវភ្ជុំបិណ្ឌនេះឡើយ។
ដើម្បីគោរពតាមទំនៀម ទម្លាប់ប្រពៃណីព្រះពុទ្ធសាសនានៅក្នុងពិធីបុណ្យភ្ជុំបិណ្ឌរយៈពេលកន្លៈខែ ដោយចាប់ផ្តើមពីថ្ងៃ១រោចខែភទ្របទរហូតដល់ថ្ងៃ១៥រោចនេះ ពុទ្ធបរិស័ទ្ធតែងតែនាំគ្នាធ្វើជារៀង រាល់ឆ្នាំ ដែលចំណុះជើងវត្តមួយចំនួន ក៏បានទៅកាន់វេននៅស្រុកកំណើតមួយចំនួនទៀត ក៏បានទៅកាន់វេននៅជិតផ្ទះរបស់ខ្លួនផងដែរ។
នេះគឺជាការប្រតិបត្តិ ទៅតាមទំនៀមទំលាប់ប្រពៃណីពីដូនតា ហើយការរៀបចំធ្វើពិធីបុណ្យនេះឡើងក្នុងគោលបំណង ដើម្បីនាំយកចង្ហាន់ មានបាយ សម្ល នំចំណី ផ្លែឈើ ទៀនធូប ផ្កាភ្ញី ថវិកានិងទេយ្យទានមួយចំនួន ថ្វាយព្រះរតនត្រ័យ និងដាក់បាត្រប្រគេនដល់ព្រះសង្ឃ បួងសួងឧទ្ទិសកុសលផលបុណ្យជូនដល់ មាតា បិតា ជីដូនជីតា កូនចៅ និងញាត្តិការទាំងប្រាំពីរសន្តាន ដែលបានចែកស្ថានទៅក្នុងលោកខាងមុខឲ្យចាកផុតពីទុក្ខទោស ហើយបានទៅកើតក្នុងសុខគតិភពកុំបីឃ្លៀងឃ្លាតឡើយ។
ពិធីបុណ្យនេះ មិនត្រឹមតែបង្ហាញពីភាពកត្តញ្ញូរបស់កូនចៅ ចំពោះអ្នកមានគុណប៉ុណ្ណោះទេ ប៉ុន្ដែនៅ មានអត្ថនយ័សំខាន់មួយទៀត គឺ ការពិចារណានូវសង្សារវដ្ដ ដែលមនុស្សកើតមកតែងតែស្លាប់ទៅវិញ ជាធម្មតាដែលអាចជំរុញទឹកចិត្តអោយលះបង់អំពើបាបហើយខិតខំធ្វើតែអំពើល្អដើម្បីវៀរចាកពីអបាយភូមិទាំង៤ មាននរក ប្រេតជា តិរិច្ឆាន និង អសុរកាយដើម។
ហើយបុណ្យកាន់បិណ្ឌនេះក៏ទុកថា ជាឱកាសសម្រាប់មនុស្សធ្វើសេចក្តីល្អ គឺល្អទាំងកាយ ទាំងវាចា ទាំងចិត្ត បើទោះជាធ្វើល្អបានតែក្នុងរយៈពេលដ៏ខ្លីនេះក៏ដោយ ក៏ជាឧបនិស្ស័យមួយដែលប្រសើរជាងអត់សោះ ហើយក៏ជាការក្រើនរំលឹកដល់ចិត្តមនុស្សឱ្យគិតដល់សេចក្តីល្អ និងស្គាល់រសជាតិនៃសេចក្តីល្អផងដែរ។
បើតាមមន្ត្រីក្រសួងធម្មការ និងសាសនាខណ្ឌព្រែកព្នៅបានឲ្យដឹងថា នៅក្នុងខណ្ឌព្រែកព្នៅ ដែលមានវត្តចំនួន១៨ មិនមានវត្តណាមួយដាច់ចង្ហាន់ នាក្នុងរដូវភ្ជុំបិណ្ឌនេះឡើយ។ហើយនៅថ្ងៃទីសុក្រទី១៩ ខែកញ្ញា ឆ្នាំ២០១៩នេះ ដែលត្រូវនឹងវេនទី៦ លោកសុខ សម្បត្តិ អភិបាលនៃគណអភិបាលខណ្ឌព្រែកព្នៅ រួមនឹង មន្ដ្រីក្នុងសាលាខណ្ឌទាំងមូល បាននាំយកនូវចង្ហាន់វន័ជនព្រម ទាំងគ្រឿង ឧបភោគ បរិភោគ មួយចំនួនដើម្បីយកទៅប្រគេនព្រះសង្ឃចំនួន៣វត្តមានវត្តច័ន្ទបុរីវង្ស វត្តសុវណ្ណរាសីរតនារាម និងវត្តអង្គសេរីសួស្តី។
លោកសុខ សម្បត្តិ អភិបាលខណ្ឌព្រែកព្នៅ បានថ្លែងអំណរគុណដល់ បងប្អូន ប្រជាពុទ្ធបរិស័ទ ទាំងអស់ដែលបានចំណាយពេលវេលាដ៍មានតម្លៃ អញ្ជើញមកចូលរួមកាន់បិណ្ឌ នៅតាមបណ្តាវត្តក្នុងខណ្ឌព្រែកព្នៅ ដើម្បីរួមចំណែកក្នុងការជួយ ទ្រទ្រង់ដល់វិស័យព្រះពុទ្ធសាសនាដែលជាសាសនារបស់រដ្ឋ និងជួយថែរក្សាប្រពៃណី ទំនៀមទំលាប់កេរដំណែលរបស់ដូនតាយើងតរៀងរហូតមកនោះ៕
