ភ្នំពេញ: សូត្រ ប៊ុនធីក្លិបបក្សីស្លាបដែកត្រូវបានផ្គូរផ្គងឲ្យប្រកួតជាមួយអ្នកប្រដាល់ថៃឈ្មោះឆោម ដេត(Chom Deth)ដោយប្រកួតគ្នាក្នុងប្រភេទទម្ងន់៦០គីឡូក្រាម លើសង្វៀនអាស៊ីអាគ្នេយ៍យប់ថ្ងៃទី២៣មិថុនា។
នេះជាលើកដំបូងហើយដែលអ្នកប្រដាល់ថៃរូបនេះមកប្រកួតនៅស្រុកខ្មែរមិនមាននរណាដឹងថាគេមានសមត្ថភាពប៉ុណ្ណានោះឡើយ ។ចំពោះប៊ុនធីគេជាអ្នកប្រដាល់ចូលចិត្តប្រើកែង និង ជង្គង់ដើម្បីវាយប្រហារគូប្រកួត ។ ប៊ុនធីមានប្រវត្តិប្រកួតចំនួន១០៧ដង ឈ្នះ៨២ដង ចាញ់២១ដងនិងស្មើពិន្ទុ៤ដង ។
ចំពោះអ្នកប្រដាល់ថៃឆោម ដេតវិញនោះគេមានប្រវត្តិប្រកួតចំនួន៦៥ដង ឈ្នះ៥៥ដង ចាញ់៩ដង និង ស្មើពិន្ទុ ១ ដង ។ជំនួបមួយនេះមិនដឹងថានរណាជួបសំណាងល្អនោះឡើយ ។
អ្នកប្រដាល់ទម្ងន់ធ្ងន់កម្ពុជាតូច ទូ សមាគមប្រដាល់ក្រសួងការពារជាតិត្រូវជួបប្រកួតជាមួយអ្នកប្រដាល់អាល់បានីហ្គេន ស៊ី(Gen Ci)ដោយប្រកួតគ្នាក្នុងប្រភេទទម្ងន់៦៩គីឡូក្រាម ។
អ្នកប្រដាល់ជនជាតិអាល់បានីហាត់នៅស្រុកថៃរូបនេះធ្លាប់មកប្រកួតនៅស្រុកខ្មែរ២-៣ដងហើយ ។ទោះបីគេជាអ្នកប្រដាល់ថ្មីទើបតែធ្លាប់ប្រកួតបានបន្តិចបន្តួចមែនតែការប្រកួតរបស់គេនៅស្រុកខ្មែរគឺមានឈ្នះមានចាញ់ជាធម្មតា ។
នេះជាលើកដំបូងហើយដែលតូច ទូគេជួបប្រកួតជាមួយអ្នកប្រដាល់រូបនេះ ។ តាមពិតតូច ទូជាអ្នកប្រដាល់ចាស់វស្សាហើយគ្រាន់តែគេមិនសូវមានឈ្មោះបោះសម្លេងតែប៉ុណ្ណោះ។ការជួបគ្នាលើកដំបូងនេះទាំងសងខាងសុទ្ធតែមានឱកាសដើម្បីឈ្នះដូចគ្នា ។
ក្បាច់របស់តូច ទូដើម្បីយកឈ្នះហ្គេន ស៊ីគឺវាយប្រហារជើងក្រោមតែបើការវ៉ៃជើងក្រោមនេះមិនបានសម្រេចទេនោះគេអាចនឹងវេទនាដោយសារកណ្ដាប់ដៃអ្នកប្រដាល់ឆ្លងដែនរូបនេះ ។
តូច ទូមានប្រវត្តិប្រកួតចំនួន៦០ដង ឈ្នះ៤៥ដង ចាញ់១៣ដងនិងស្មើពិន្ទុ ២ ដង ។ ចំពោះហ្គេន ស៊ីវិញគេមានប្រវត្តិប្រកួតចំនួន២៩ដង ឈ្នះ២២ ដង និង ចាញ់៧ដង ។ នរណជាអ្នកខ្លាំង ?
