ភ្នំពេញ ៖ លើកឡើងក្នុងពិធីប្រកាស និងសំណេះ សំណាលជាមួយសមាជិកគណបក្សប្រជាជនកម្ពុជាចំនួន៣៨៩រូប មកពីមូលដ្ឋានសង្កាត់ទាំង៧ នៃខណ្ឌបឹងកេងកង នាល្ងាចថ្ងៃទី២៤ ខែមករា ឆ្នាំ២០២៥នេះ ឯកឧត្តម បណ្ឌិត អ៊ិត សំហេង តំណាងរាស្ត្រមណ្ឌលរាជធានីភ្នំពេញ និងជាប្រធានក្រុមការងារចុះជួយមូលដ្ឋានខណ្ឌបឹងកេងកង បានមានប្រសាសន៍ថា រក្សាចាស់បង្កើតថ្មី ហើយថ្មីនិងចាស់គឺមានតម្លៃស្មើរគ្នា។
ឯកឧត្តម បណ្ឌិត បន្តថា សមាជិក សមាជិកា បងប្អូនកូនក្មួយទាំងអស់ពិតជាដើរលើផ្លូវត្រូវ ក្នុងការមកចូលរួមរស់ជាមួយគណៈបក្សប្រជាជនកម្ពុជានាពេលនេះ ព្រោះគណបក្សប្រជាជនកម្ពុជា គឺជាគណបក្សចាស់ទុំជាងគេ ហើយសមាជិក សមាជិកា ទាំងអស់ត្រូវតែស្រលាញ់ថ្នាក់ដឹកនាំ និងស្រលាញ់គណបក្សឲ្យបានស្មើរៗគ្នា ហើយត្រូវជៀសវាងឲ្យផុតពីការលាបព័ណ៍គ្នា បើទោះជាអ្នកនេះនៅបក្សនេះ អ្នកនោះនៅបក្សនោះក៍ដោយ ព្រោះយើងរស់នៅក្នុងដំបូលសន្តិភាពជាមួយគ្នា។
ឯកឧត្តម បណ្ឌិត បន្តទៀតថា ជំនាន់អ៊ុំ ជំនាន់ឪពុកម្តាយក្មួយ រស់ក្នុងរបបខ្មែរក្រហមគឺពិបាកណាស់រស់១ថ្ងៃ ភ័យ១ថ្ងៃ មិនដែលបានសុខឡើយ មិនដូចនៅជំនាន់ក្មួយៗនេះទេ គឺមានសិទ្ធិសេរីភាព ពេញលេញល្អណាស់ មានសិទ្ធិបញ្ចេញមតិ ផ្ទាល់ខ្លួន និងសិទ្ធិសព្វបែបយ៉ាង ទាំងអស់ក្នុងការរស់នៅ ហើយបើគ្មានថ្ងៃ៧មករា ក៍គ្មានថ្ងៃ២៣តុលានាទីក្រុងប៉ារីស ហើយបើមិនមានថ្ងៃទាំងអស់នេះ ក៍គ្មានអ្វីៗនាពេលបច្ចប្បន្ននេះដែរ។
ឯកឧត្តម បណ្ឌិត បន្តថាគណបក្សប្រជាជនកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា មិនត្រឹមតែបានរំដោះប្រទេសជាតិ និងប្រជាជនទាំងមូល ពីរបបប្រល័យពូជសាសន៍ប៉ុល ពតដ៏សាហាវយង់ឃ្នង នៅថ្ងៃទី០៧ ខែមករា ឆ្នាំ១៩៧៩ ប៉ុណ្ណោះទេ គឺថែមទាំងបានដឹកនាំ និងកសាងប្រទេសជាតិតាំងពីបាតដៃទទេរ រហូតមានសុខសន្តិភាព ស្ថិរភាព នយោបាយពេញលេញ និងមានការអភិវឌ្ឍរីកចំរើនលើគ្រប់វិស័យតែម្តងនាបច្ចប្បន្ននេះ។
ជាចុងក្រោយឯកឧត្តម បណ្ឌិត អ៊ិត សំហេង បានផ្តាំផ្ញើរដល់សមាជិក សមាជិកាទាំងអស់ត្រូវបន្តសហការ គ្នាឲ្យបានរឹងមាំ ព្រោះក្មួយៗអាចជួយគណបក្ស និងជួយជាតិបានដោយប្រើបណ្តាញសង្គមឆ្លើយតបទៅពួកអគតិមួយចំនួន ដើម្បីកុំឲ្យពួកនិយមជ្រុលកើតឡើងនៅកម្ពុជា ហើយនាំគ្នាខិតខំឃោសនាផ្សពផ្សាយអំពី កម្មវិធីនយោបាយរបស់គណៈបក្សប្រជាជនកម្ពុជា យើងឲ្យបានគ្រប់ៗគ្នាដើម្បីឈានទៅរកជ័យជំនះក្នុងការបោះឆ្នោត ខាងមុខបន្តទៀត។
គួរបញ្ជាក់ថា ក្នុងនោះផងដែរ ឯកឧត្តម បណ្ឌិត អ៊ិត សំហេង និងក្រុមការងារចុះជួយមូលដ្ឋានខណ្ឌបឹងកេងកង បានប្រគល់ជូនថវិការជូនដល់សមាជិក សមាជិកាទាំង៣៨៩រូប ដោយក្នុងម្នាក់ៗទទួលបាន២ម៉ឺនរៀល៕