កីឡាករបរទេស ៖ ខ្សែប្រយុទ្ធរបស់ក្លិប Atletico Madrid ចំនួន៣នាក់បានរងរបួសក្នុងនោះមាន កីឡាករAlvaro Morata កីឡាករDiego Costa និងកីឡាករ Joao Felix ដែលមិនអាចជួយក្រុម Atletico Madrid លេងទល់ក្រុម Liverpool បានទេ ក្នុងការប្រកួត UEFA Champions League នៅចុងខែកុម្ភៈនេះ ដោយសារតែរូបគេមានរបួស។
របួសរបស់ Morata នេះកើតឡើងអំឡុងពេលរូបគេលេងទល់ក្រុម Real Madrid កាលពីចុងសប្ដាហ៍កន្លងទៅ។ របួសជើងខាងស្ដាំនេះ មិនទាន់អាចបញ្ជាក់ថានឹងត្រូវសម្រាកប៉ុន្មាននោះទេ តែអ្វីដែលច្បាស់នោះគឺរូបគេនឹងមិនអាចលេងបានឡើយ ក្នុងការប្រកួតទល់ក្រុម Liverpool នៅថ្ងៃទី១៨ ខែកុម្ភៈ ឆ្នាំ២០២០ខាងមុខ។ មិនត្រឹមតែម្នាក់នេះទេ សូម្បីតែ Diego Costa និង Joao Felix ក៏មិនអាចចូលជួយក្រុមបានដែរ ដោយសាររបួសមិនទាន់ជាសះស្បើយ។
ក្រុមរបស់លោក Simone កំពុងមានបញ្ហាខ្សែប្រយុទ្ធរបួសអស់ទៅហើយ។ ខណៈដែលលទ្ធផលចាញ់ក្រុម Real Madrid កាលពីចុងសប្ដាហ៍កន្លងទៅ បានធ្វើឱ្យពួកគេធ្លាក់ដល់លេខ៦ក្នុងតារាង La Liga ផងដែរ៕
