កីឡាបរទេស ៖ កីឡាករជើងស៊ុតរបស់ក្រុម PSG គឺMbappe វ័យ២១ឆ្នាំបានបង្ហាញកាយវិការមិនពេញចិត្តជាមួយលោក Thomas Tuchel ដែលបានប្ដូររូបគេចេញក្នុងតង់ទីពីរ កាលពីប្រកួតទល់ក្រុម Montpellier កាលពីពេលកន្លងមកថ្មីៗនេះ ហើយក្រុម Real Madrid បានបង្ហាញគម្រោងសាច់ប្រាក់២៥០លានផោន សម្រាប់ដេញថ្លៃទិញយកខ្សែប្រយុទ្ធ Kylian Mbappe នៅរដូវក្ដៅខាងមុខនេះ។
ប្រភពនៅប្រទេសបារាំងបានបញ្ជាក់ថាទំនាក់ទំនងរវាងគេទាំងពីរ( Mbappe និងThomas Tuchel ) មិនល្អឡើយប៉ុន្មានសប្ដាហ៍កន្លងមកនេះ មិនមែនទើបកើតឡើងនោះទេ។ កត្តានេះហើយ ទើបបានជាក្រុម Real Madrid ឆក់ឱកាស និងត្រៀមសាច់ប្រាក់ជាស្រេច ដើម្បីយកឱ្យបានខ្សែប្រយុទ្ធរបស់បារាំងនៅរដូវក្ដៅខាងមុខ។
កីឡាករMbappe នារដូវកាលនេះរកបាន១៤គ្រាប់ហើយក្នុងលីគកំពូលបារាំង ក្នុងការចូលលេង១៦ប្រកួតរបស់គេ។ បើគិតជារួមវិញ តាំងពីផ្លាស់ចូលលេងឱ្យក្រុម PSG នៅឆ្នាំ២០១៧មក អតីតកីឡាករ Monaco នេះបង្ហាញខ្លួនសរុប១១២ប្រកួត និងរកបាន៨២គ្រាប់៕
