ភ្នំពេញ ៖ កីឡាករ ឌុម កែវដា អ្នកប្រដាល់របស់ក្លិបម្កុដរាជសីហ៍ ត្រូវជួបប្រកួតជាមួយកីឡាករថៃភេតសាកេត រីឯកីឡាករទេស ជីវ៉ា អ្នកប្រដាល់នៃក្លិបទីបញ្ជាការដ្ឋានកងពលតូចលេខ៧០ ជួបកីឡាករថៃឌែនភិឈិត ខណៈខាំ ខ្លានាង អ្នកប្រដាល់នៃក្លិបរហាប់ស្វាយប៉ាកជួបកីឡាករថៃផាយ៉ាក់អ៊ីសាន នាថ្ងៃទី០៨ ខែកក្កដា ឆ្នាំ២០១៩នេះ នៅលើសង្វៀនស៊ីអិនស៊ី។
កីឡាករឌុម កែវដា ជួបជាមួយកីឡាករថៃភេតសាកេត នេះក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនដែលជួបគ្នាទេនៅសង្វៀននេះ។ កីឡាករជើងខ្លាំងវ័យក្មេង ឌុម កែវដា កន្លងមកទទួលបានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកណ្តាប់ដៃនិងកែង ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។
នាពេលបច្ចប្បន្ននេះកីឡាករឌុម កែវដា គេរាងធ្លាក់នៃស្នៀតគុនដែលមើលទៅហាក់មិនខ្លាំងដូចមុន តែយ៉ាងណាក្នុងការប្រកួតនេះត្រូវបានអ្នកវិភាគប្រដាល់អះអាងថា ឌុម កែវដា មានសង្ឃឹមឈ្នះហាសិបភាគរយប៉ុណ្ណោះ។ ចាំមើលកីឡាករឌុម កែវដា អាចយកឈ្នះលើកីឡាករថៃ ភេតសាកេត បានដែរឫយ៉ាងណា?។
រីឯកីឡាករទេស ជីវ៉ា ត្រូវជួបកីឡាករថៃឌែនភិឈិត ដែលកីឡាករថៃម្នាក់នេះធ្លាប់មកប្រកួតនៅប្រទេសកម្ពុជាច្រើនលើកមកហើយ ស្នៀតខ្លាំងរបស់គេគឺជើងទាត់ ជង្គង់ និងស្នៀតកាច់ផ្តួល។ ចំណែកកីឡាករទេស ជីវ៉ា វិញគេក៍ខ្លាំងខាងស្នៀតជើងទាត់ និងជង្គង់ដែរ តែគេមិនសូវមានល្បិចកលប្រកួតច្រើនសំបូរបែបពិសេសគឺស្នៀតកែង កណ្តាប់ដៃ និងការចាប់កាច់ផ្តួលគូប្រកួតនោះឡើយ។ ចាំមើលកីឡាករទេស ជីវ៉ា ជាអ្នកឈ្នះឬកីឡាករថៃឌែនភិឈិត
ដោយឡែកកីឡាករស្រករក្រោយខាំ ខ្លានាង គេនិងត្រូវជួបប្រកួតជាមួយអ្នកប្រដាល់ថៃឈ្មោះផាយ៉ាក់អ៊ីសាន ក្នុងប្រភេទទម្ងន់៥១គីឡូក្រាម ដែលកីឡាករថៃម្នាក់នេះក៍ធ្លាប់មកប្រកួតនៅសង្វៀនប្រទេសកម្ពុជា ជាច្រើនដងផងដែរមានឈ្នះមានចាញ់ ជាមួយកីឡាករលំដាប់ៗរបស់កម្ពុជា។
ខាំ ខ្លានាង គេក៏ជាអ្នកប្រដាល់ជើងខ្លាំងមួយរូប ក្នុងចំណោមអ្នកប្រដាល់ស្រករក្រោយដូចគ្នា ដែលអ្នកតាមដានកីឡាប្រដាល់កម្ពុជាកំពុងតែចាប់អារម្មណ៍ចំពោះស្នៀតគុនរបស់កីឡាកររូបនេះ ដែលឡើងប្រកួតម្តងៗធ្វើឲ្យអ្នកទស្សនាជក់ចិត្តជាខ្លាំងនោះ។ ជាមួយនិងស្នៀតខ្លាំងទាំងដៃទាំងជើងនិងកែង បានធ្វើឲ្យកីឡាករខាំ ខ្លានាង ផ្តួលដៃគូជាបន្តបន្ទាប់ទាំងកីឡាករជើងចាស់ និងកីឡាករជើងថ្មីហើយបានធ្វើឲ្យរូបគេឡើងប្រកួតឈានដល់គូឯក និងប្រកួតលក្ខណៈមិត្តភាពអន្តរជាតិ។ ចាំមើលរវាងខាំ ខ្លានាង និងកីឡាករថៃផាយ៉ាក់អ៊ីសាន នេះនរណាជាអ្នកឈ្នះ?៕
