រឿង សោភ័ណ្ឌ ស្វាគមន៍កីឡាករតួកគី ខណៈបាង កាយាកជួបកីឡាករថៃមកសុំ​សា​ក​ស្នៀ​ត​​គុនខ្មែរ

ភ្នំពេញ ៖ កីឡាករជើងខ្លាំងរឿង សោភ័ណ្ឌ អ្នកប្រដាល់របស់ក្លិបម្កុដរាជសីហ៍ ដឹកដៃ​កីឡាករ​ជើង​ខ្លាំង​វ័យក្មេងបាង កាយាក អ្នកប្រដាល់នៃសមាគមកីឡាប្រដាល់ក្រសួងកសិកម្ម ឡើងស្វាគមន៍​កី​ឡា​ករតួកគី ម៉ីត អាតាកាន់ និងកីឡាករថៃភូតាក់វ៉ាន់ បេឡេបូរីរ៉ាំ មកសុំ​សា​ក​ស្នៀ​ត​​គុនខ្មែរ​លើ​សង្វៀ​ន​ស៊ីអិនស៊ី នាល្ងាច​ថ្ងៃសៅរ៍ទី១៤ ខែមីនា ឆ្នាំ​២០២០នេះ។

កីឡាករជើងខ្លាំងរឿង សោភ័ណ្ឌ ​ជា​អ្នក​ប្រដាល់​ដែល​ឡើង​ប្រកួត​កម្រ​ចាញ់​គូរប្រ​កួ​ត​ណាស់​ព្រោះរូបគេ ប្រកួត​មិន​ចេះ​លាក់ ​កម្លាំង​និង​មាន​ស្នៀត​ពិសេស​ដើម្បី​ផ្តួល​ដៃ​គូ​ឲ្យ​សន្លប់​ថែម​ទៀត។ ដោយអ្នក​ប្រដាល់​រូប​នេះ មាន​បទពិសោធ​ន៍​និង​​តិចនិក​​ក្នុង​ការប្រកួត​ច្រើនទាំង​ការប្រកួតលក្ខណៈមិត្តភាពជាតិ និងអន្តរៈជាតិ។

​កីឡាករដែល​មាន​ដើម​កំណើត នៅ​ឃុំ​ពើក ស្រុក​អង្គ​ស្នួល ខេត្ត​កណ្តាល រឿង សោភ័ណ្ឌ មួយ​រយៈ​ពេល​ចុង​ក្រោយនេះ​មានការ​រីក​ចំ​រើន​ជាង​មុនច្រើនទាំងស្នៀត​គុណ​ទាំងកម្លាំង​ស៊ុហ្វ ពោ​ល​គឺគេ​ហ្វឹកហាត់បាន​ជាប់លាប់ ធ្វើអោយ​កម្លាំង​ស៊ុហ្វ​របស់​គេ​ធានា​បាន​ក្នុងការ​ប្រកួត​ប្រាំ​ទឹក​ដោយ​គ្មានបញ្ហាឡើយ។ ក្នុងការប្រកួតនេះត្រូវអ្នកតាមដានលើកឡើងថា កី​ឡាករបរទេសឈ្មោះម៉ីត អាតាកាន់ មិនមែនជាដៃគូររបស់កីឡាកររឿង សោភ័ណ្ឌ នោះទេ ព្រោះកីឡាករបរទេសក្រៅពីកីឡាករថៃ ដែលជួបជាមួយរឿង សោភ័ណ្ឌ ពួកគេឈជើងមិនបាន៥ទឹកនោះទេ មានន័យថាអ្នករៀបចំដាក់កីឡាករល្មមៗសម្រាប់តែឲ្យកីឡាករកម្ពុជារឿង សោភ័ណ្ឌ ឈ្នះប៉ុណ្ណោះ ព្រោះថាកីឡាករកម្ពុជារូបនេះជួបកីឡាករជើងខ្លាំងរបស់ថៃគឺកម្រឈ្នះគេណាស់ពិសេសចេញប្រកួតក្រៅប្រទេសតែម្តង។ ចាំមើលជួបជាមួយកី​ឡា​ករ​ម៉ីត អាតាកាន់ ក្នុងប្រភេទទម្ងន់៧១គីឡូក្រាមនេះរឿង សោភ័ណ្ឌ អាចរក្សាការឈ្នះ​របស់ខ្លួន​បានទៀតឫយ៉ាងណា?។

ដោយឡែកកីឡាករកម្ពុជាបាង កាយាក ត្រូវជួបជាមួយកីឡាករថៃភូតាក់វ៉ាន់ បេឡេបូរីរ៉ាំ ក្នុងប្រភេទទម្ងន់៥៧គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក តែកីឡាករថៃម្នាក់នេះធ្លាប់មកប្រកួតនៅសង្វៀនស្រុកខ្មែរច្រើនលើកមកហើយមានឈ្នះ មានចាញ់ស្នៀ​តខ្លាំងរបស់គេគឺជើងទាត់ ជង្គង់ និងស្នៀតកាច់ផ្តួល។ ចំណែកគេហាត់ប្រដាល់នៅកម្ពុជា តែគេទៅប្រកួតនៅប្រ​ទេសថៃហើយល្បីល្បាញមកដល់សព្វថ្ងៃ ស្នៀតខ្លាំងរបស់គេគឺជើងទាត់ កណ្តាប់ដៃ និងកែងដែលអាចវាយប្រយោលក៍បានចូលកៀកក៍បាន។ កាលដែលបាង កាយាក ប្រកួតនៅប្រទេសថៃស្នៀតកែងរបស់គេ ដែលធ្វើឲ្យគេផ្តួលគូប្រកួតជាបន្ទាប់។

ការប្រកួតនាពេលបច្ចប្បន្ននេះបាង កាយាក ត្រូវបានគេមើលឃើញថា ប្រកួតហាក់មិនសូវមានក្បាច់អ្វីច្បាស់លាស់នោះទេ គឺមិនដូចដែលកាលគេប្រកួតនៅប្រទេសថៃឡើយ ដូចនេះ ការប្រកួតនេះត្រូវបានអ្នកតាមដានប្រដាល់អះអាងថា មានភាគរយឈ្នះហាសិបភាគរយម្នាក់ប៉ុណ្ណោះ បើទោះជាគេមិនធ្លាប់ជួបគ្នាក៍ដោយ។ ចាំមើលរវាងកីឡាករបាង កាយាក និងកីឡាករថៃភូតាក់វ៉ាន់ បេឡេបូរីរ៉ាំ នរណាជាអ្នកឈ្នះ?៕