ភ្នំពេញ ៖ កីឡាករមឿង សុខហ៊ុច អ្នកប្រដាល់ពុទ្ធសេរីវង្សពោសែនជ័យកីឡា នៃក្រសួងការពារជាតិ ដឹកដៃសិស្សប្អូនថា សារុន និងកីឡាករកូយ ឡាយ អ្នកប្រដាល់របស់ក្លិបកងពលតូចទ័ពពិសេសឆ័ត្រយោង៩១១ ជួបប្រកួតជាមួយកីឡាករថៃវិណៃឡែក ផ.រ៉ាំងសាន់ និងកីឡាករ ភិតដាំ ពៀកខាឃែរ៍ ព្រមទាំងកីឡាករថៃភិតណាមអេក ស.ស.ប៉ាកននៃការប្រកួតលក្ខណៈមិត្តភាពអន្តរៈជាតិ នៅលើសង្វៀនស៊ីអិនស៊ី នាថ្ងៃសៅរ៍ទី២២ ខែកុម្ភៈ ឆ្នាំ២០២០នេះ។
កីឡាករមឿង សុខហ៊ុយ ត្រូវជួបជាមួយកីឡាករជនជាតិថៃវិណៃឡែក ផ.រ៉ាំងសាន់ ក្នុងប្រភេទទម្ងន់៦៣.៥គីឡុក្រាម ដែលមួយរយៈចុងក្រោយនេះមឿង សុខ ហ៊ុចត្រូវបានគេមើលឃើញថាប្រកួតស្ទើររាល់សប្តាហ៍តែម្តង ជាមួយកីឡាករអន្តរជាតិជាច្រើននាក់ដែលមានលទ្ធផលគួរឲ្យសសើរ ជាមួយផ្តួលគូប្រកួតជាបន្តបន្ទាប់មកនោះ តែយ៉ាងណាគេសង្កេតឃើញថា មឿង សុខហុច មិនសូវមានស៊ុហ្វបុកពេញ៥ទឹកនោះទេ ដោយសារតែប្រកួតញឹកញ៉ាប់ពេក។
មឿង សុខហ៊ុច គេមានកាយសម្បទារឹងមាំ ព្រមទាំងមានស្នៀតកែង និងជង្គង់ ដែលធ្វើឲ្យគូរប្រកួតរបស់ខ្លួន ពិបាកទប់ទល់ និងជាស្នៀតសម្រាប់ផ្ដួលគូរប្រកួតដ៍អស្ចារទៀតផង។ការវាយចេញរបស់សុខហ៊ុច ធ្ងន់ហើយរហ័ស ជាពិសេសស្នៀតជើងទាត់ និងជង្គង់ របស់គេខ្លាំងណាស់អាចបញ្ចេញបានភ្លាមៗស្របជាមួយដៃតែម្តង។ ប៉ុន្តែយ៉ាងណា មឿង សុខហ៊ុច ក៏មានចំណុចខ្សោយខ្លះដែរ គឺត្រង់វាយចេញហើយមិនសូវការពាវិញនោះទេដែលធ្វើឲ្យដៃគូប្រកួតឆាប់ដឹងពីចំណុចខ្សោយទាំងនេះ។ ចាំមើលមឿង សុខហ៊ុច អាចយកឈ្នះ កីឡាករថៃថៃវិណៃឡែក ផ.រ៉ាំងសាន់ បានដោយរបៀបណា?។
ចំណែកកីឡាករកូយ ឡាយ អ្នកប្រដាល់នៃក្លិបកងពលតូចទ័ពឆ័ត្រយោង៩១១ ត្រូវជួបជាមួយកីឡាករថៃភិតដាំ ពៀកខាឃែរ៍ ក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ស្នៀតខ្លាំងរបស់កីឡាករថៃភាគច្រើនគឺជើងទាត់ និងជង្គង់ ចំណែកកណ្តាប់ដៃ និងកែងមិនខ្លាំងប៉ុន្មានទេតែគេអាចប្រើការបាន។
កីឡាករស្រករក្រោយកូយ ឡាយ គេមានស្នៀតប្រដាល់ល្អ និងវាយខ្លាំងទាំងដៃទាំងជើងតែម្តង ពិសេសស្នៀតកែងរបស់គេ គូប្រកួតទាំងជើងចាស់និងជើងថ្មីពេលប្រកួតជាមួយកូយ ឡាយ បើហ៊ានប្រហេះច្បាស់ជាបែកដោយស្នៀតកែងរបស់គេមិនខាន។ កូយ ឡាយ មិនត្រឹមតែមានស្នៀតប្រដាល់ល្អប៉ុណ្ណោះទេ គេក៍មានកម្លាំងស៊ុហ្វក៍រឹងមាំផងដែរ សម្រាប់ការជួបគ្នារវាង កូយ ឡាយ និងថៃភិតដាំ ពៀកខាឃែរ៍ នេះមិនមាននរណាហ៊ានទស្សទាយមុនថានរណាជាអ្នកទទួលបានជ័យជម្នះនោះឡើយ ព្រោះកីឡាករថៃជាកីឡាករដែលទើបមកវាយនៅសង្វៀនស្រុកខ្មែរ។ ចាំមើលរវាងកូយ ឡាយ និងភិតដាំ ពៀកខាឃែរ៍ នរណាជាអ្នកឈ្នះ?។
ដោយឡែកកីឡាករថា សារុន បន្ទាប់ពីបាត់មុខមួយរយៈមកត្រូវគេផ្គូរផ្គងឲ្យជួបជាមួយកីឡាករថៃភិតណាមអេក ស.ស.ប៉ាកន ក្នុងប្រភេទទម្ងន់៦០គីឡូក្រាម អ្នកទាំង២មិនធ្លាប់ជួបគ្នាទេកន្លងមក ហើយមិនទាន់ដឹងថា កីឡាករថៃម្នាក់នេះមានវិជ្ជាគុនខ្លាំងប៉ុណ្ណានោះដែរ តែកីឡាករថៃភាគច្រើនស្នៀតខ្លាំងរបស់គេគឺជើងទាត់ និងជង្គង់ និងស្នៀតកាច់ផ្តួល។
ចំណែកកីឡាករថា សារុន កន្លងមកគេជាអ្នកប្រដាល់ដែលល្អស្នៀតដៃ និងស្នៀតជើងទាត់ ប៉ុន្តែចិត្តរបស់គេតូចបន្តិច។ អ្នកវិភាគប្រដាល់អះអាងថា ការវាយរបស់ថា សារុន កន្លងមកចលនាវាយលុករបស់គេលឿន ជាពិសេសស្នៀតកណ្តាប់ដៃតែម្តង អាចវាយចេញបានត្រង់ហើយចំទិសដៅបានល្អទៀតផង តែទោះជាយ៉ាងណាក៏ដោយក៏មិនអាចធ្វេសប្រហែសជាមួយនឹងស្នៀតជើងទាត់របស់កីឡាករជនជាតិថៃនោះឡើយ ហើយបើហ៊ានវាយមើលងាយគូប្រកួតនោះច្បាស់ជាចាញ់មិនខាន។ ចាំមើលរវាងកីឡាករថា សារុន និងកីឡាករថៃភិតណាមអេក ស.ស.ប៉ាកន នរណាជាអ្នកឈ្នះ?៕
