ភ្នំពេញ ៖ កីឡាករលន បញ្ញា អ្នកប្រដាល់នៃសមាគមន៍កីឡាប្រដាល់ក្រសួងការពារជាតិ កៀកស្មារនិងកីឡាករសូត្រ ខេវិន អ្នកប្រដាល់របស់ក្លិបបក្សីស្លាបដែក ជួបជាមួយកីឡាករថៃរ៉ាចឆាវ៉ាត់ និងកីឡាករដាវវិសេដ ក្នុងវគ្គជម្រុះជុំទី១ឆ្ពោះទៅដណ្តើមជើងឯក និងខ្សែក្រវាត់ ខណៈកីឡាករឃីម ប៉ូរ៉ា អ្នកប្រដាល់មកពីក្លិបរស្មីភូមិគៀបខេត្តបន្ទាយមានជ័យ ឡើងសាកកណ្តាប់ដៃនិងកីឡាករអ៊ីរ៉ងMOSTAFA នៅលើសង្វៀនស៊ីអិនស៊ី នាថ្ងៃសៅរ៍ទី១០ ខែសីហា ឆ្នាំ២០១៩។
កីឡាករស្រករក្រោយលន បញ្ញា ត្រូវជួបជាមួយកីឡាករថៃរ៉ាចឆាវ៉ាត់ ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេពីមុនមក ដោយសារលន បញ្ញា ជាកីឡាករជើងថ្មីទើបវាយឡើងរហូតបានប្រកួតជាមួយកីឡាករបរទេស ចំណែកកីឡាករថៃក៍ទើបមកប្រកួតនៅស្រុកខ្មែរដែរ ហើយមិនទាន់ដឹងថាកីឡាករថៃម្នាក់នេះមានវិជ្ជាគុនខ្លាំងប៉ុណ្ណានោះដែរ។
រីឯកីឡាករលន បញ្ញា គេជាកីឡាករស្រករក្រោយទេតែស្នៀតខ្លាំងរបស់គេខ្លាំងទាំងព្រមតែម្តង ក្នុងនោះបើគេទាត់មួយជើងហើយកណ្តាប់ដៃក៍ចេញតាមក្រោយដែរ ហើយស្នៀតកែងបុកកាណូតក៍គ្រោះថ្នាក់ដែរ កីឡាករល្មមៗមិនអាចទប់ជាមួយគេបានប្រាំទឹកនោះទេ ហើយគេមានកម្ពស់ខ្ពស់ទៀត ដែលអាចបោះជង្គង់ខ្លីក៍បានវែងក៍បាន តែយ៉ាងណាលន បញ្ញា គេមិនសូវខ្លាំងខាងកម្លាំងស៊ុហ្វនោះទេ។ ចាំមើលលន បញ្ញា ជាអ្នកឈ្នះឬកីឡាករថៃរ៉ាចឆាវ៉ាត់ នរណាជាអ្នកឈ្នះបាន៣ពិន្ទុ?។
ចំណែកកីឡាករសូត្រ ខេវិន ត្រូវជួបជាមួយកីឡាករថៃឈ្មោះដាវវិសេដ ក្នុងប្រភេទទម្ងន់៦០គីឡូក្រាម។ មួយរយះចុងក្រោយនេះក្នុងពិភពប្រដាល់ គ្មានអ្នកណាមិនស្គាល់ស្នាដៃ និងកេរ្តិ៍ឈ្មោះរបស់កីឡាករសូត្រ ខេវិន នោះឡើយ បើទោះជាសមត្ថភាពរបស់គេ នៅមិនទាន់ដូចកីឡាករ រៀមច្បងដែលល្បីកន្លងមកក៍ដោយ។ ជាក់ស្ដែងនៅលើសង្វៀនស្ទើរគ្រប់ប៉ុស្ដិ៍សូត្រ ប៊ុនធី បានឡើងប្រកួតឈានមកដល់គូឯកដែលជាគូទស្សន៍ទាយ និងជាគូដណ្តើមខ្សែក្រវាត់ទៀតផង។
អ្នកប្រដាល់មានដៃវែងជើងវែងសូត្រ ខេវិន ជាអ្នកប្រដាល់ជើងខ្លាំងទម្ងន់មធ្យមប្រចាំកម្ពុជាម្នាក់នាពេលបច្ចប្បន្នដែល ធ្លាប់ប្រកួតជាមួយអ្នកប្រដាល់បរទេសជាច្រើននាក់មកហើយ គឺឈ្នះច្រើនជាងចាញ់ព្រោះស្នៀតក្បាច់គុណខ្មែរបុរាណរបស់គេ ខ្លាំងទាំងព្រមតែម្តង ហើយវាយមិនមានអំនួតនិងមិនខ្លាចគូរប្រកួតណាម្នាក់នោះទេ។ តែយ៉ាងណាក្នុងការប្រកួតនេះត្រូវបានអ្នកតាមដានលើកឡើងថា កីឡាករសូត្រ ខេវិន មានសង្ឃឹមឈ្នះត្រឹមហាសិបភាគរយប៉ុណ្ណោះ។ ចាំមើលកីឡាករសូត្រ ខេវិន ជាអ្នកឈ្នះឬកីឡាករថៃឈ្មោះដាវវិសេដ បាន៣ពិន្ទុ?។
ដោយឡែកកីឡាករឃីម បូរ៉ា ជួបជាមួយកីឡាករអ៊ីរ៉ងMOSTAFA ក្នុងប្រភេទទម្ងន់៦០គីឡូក្រាម ក្នុងការជួបគ្នានេះគ្មានប្រភពណាលើកឡើងពីការធ្លាប់ជួបគ្នារវាងកីឡាករទាំងពីរទេនាពេលកន្លងមកនោះ ហើយក៍មិនដឹងថាកីឡាករអ៊ីរ៉ង់ម្នាក់នេះមានកម្រិតវិជ្ជាគុនខ្លាំងប៉ុណ្ណានោះដែរ។ តែបើកីឡាករឃីម បូរ៉ា វិញជាអ្នកប្រដាល់ជើងខ្លាំងកម្ពុជាមួយរូប ដែលបច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ដើម្បីផ្ដួលគូប្រកួតរបស់ខ្លួន។ តែកីឡាករកម្ពុជារូបនេះចិត្តប្រដាល់របស់គេតូច រួមផ្សំជាមួយកម្លាំងស៊ុហ្វមិនសូវខ្លាំងផងនោះ ធ្វើឲ្យកីឡាកររូបនេះមិនសូវហ៊ានប្តូរជាមួយគូប្រកួតណាដែលដើរចូលវាយកំញើញខ្លួននោះឡើយ។ ទោះជាយ៉ាងនេះក្តីឃីម បូរ៉ា គេវាយតាមបច្ចេកទសដកថយមែនតែគេវាយសងមួយៗវិញចំគោលដៅបានល្អ ការប្រកួតរាល់លើកបើគេដឹងពីចំណុចខ្សោយគូប្រកួតហើយ គេវាយមិនប្រស់នោះទេ។ ចាំមើលការជួបគ្នានេះកីឡាករកម្ពុជាឃីម បូរ៉ា ជាអ្នកឈ្នះឫកីឡាករអ៊ីរ៉ងMOSTAFA ?៕
