ភ្នំពេញ ៖ កីឡាករឡៅ ចិត្រា អ្នកប្រដាល់មកពីក្លិបកងពលទ័ពពិសេសឆ័ត្រយោង៩១១ឡើងដណ្តើមប្រាក់លាន និងកីឡាករប៉ោ ភារិទ្ធ អ្នកប្រដាល់ក្រសួងកសិកម្ម ខណៈកីឡាករធន់ ចាន់តាក់ អ្នកប្រដាល់មកពីសមាគមកីឡាករប្រដាល់ក្រសួងការពារជាតិ ជួបកីឡាករសេក គឹមរួន អ្នកប្រដាល់របស់ក្លិបម្កុដរាជសីហ៍ នៅលើសង្វៀនស៊ីអិនស៊ី នាថ្ងៃសៅទី០៤ ខែកក្កដា ឆ្នាំ២០២០។
កីឡាករជើងខ្លាំងវ័យក្មេង ឡៅ ចិត្រា ជួបជាមួយកីឡាករជើងខ្លាំងប៉ោ ភារិទ្ធ ក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនធ្លាប់ជួបគ្នាកន្លងមក ព្រោះកីឡាករប៉ោ ភារិទ្ធ ជាកីឡាករជើងចាស់ ស្នៀតខ្លាំងរបស់ប៉ោ ភារិទ្ធ គឺជើងទាត់កាត់ ជង្គង់ និងស្នៀតកាច់ផ្តួល ដែលធ្លាប់បានយកឈ្នះលើកីឡាករកម្ពុជា ជាច្រើននាក់មកហើយដែរ ក្នុងខណៈដែលអត់មានគួអន្តរជាតិប្រកួតនោះ។
ចំណែកឡៅ ចិត្រា វិញបច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកែងនិងជង្គង់ ដែលអាចវាយចេញជាប្រយោលក៏បាន ចូលកៀកក៏បាន ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។ តែយ៉ាងណាក្នុងការជួបប្រកួតជាមួយកីឡាករប៉ោ ភារិទ្ធ នេះត្រូវបានអ្នកវិភាគប្រដាល់អះអាងថា ឡៅ ចិត្រា មានភាគរយឈ្នះត្រឹមហាសិបភាគរយប៉ុណ្ណោះ។ ចាំមើលឡៅ ចិត្រា ជាអ្នកឈ្នះឬកីឡាករប៉ោ ភារិទ្ធ?។
ការជួបគ្នារវាងសេក គឹមរួន និងកីឡាករធន់ ចាន់តាក់ ក្នុងប្រភេទទម្ងន់៦៣.៥គីឡូក្រាមអ្នកទាំងពីរមិនធ្លាប់ជួបគ្នាទេកន្លងមក។ កីឡាករធន់ ចាន់តាក់ ស្នៀតខ្លាំងរបស់គេភាគច្រើនគឺជើងទាត់ ជង្គង់ និងស្នៀតកាច់ផ្តួលអោយគូប្រកួតដួលទាំងជំហរ រីឯខាងកណ្តាប់ដៃ និងកែងគេអាចប្រើបានដែលអាចវាយប្រយោលក៍បានចូលកៀកក៍បាន ហើយមានកម្លាំងស៊ុហ្វខ្លាំងទៀតផង។
រីឯការប្រកួតរបស់សេក គឹមរួន កន្លងមកបើជួបគូប្រកួតខ្លាំងគេក៍ខ្លាំង តែជួបគូប្រកួតខ្សោយគេក៍ខ្សោយទៅតាមនោះដែរ តែគេប្រកួតឈ្នះច្រើនជាងចាញ់ ដែលបានធ្វើឲ្យអ្នកគាំទ្រចាប់អារម្មណ៍ពីមួយប្រកួតទៅមួយប្រកួតចង់ទស្សនានៃការឡើងរេញរបស់គេ។ ស្នៀតខ្លាំងរបស់កីឡាករសេក គឹមរួន គឺកណ្តាប់ដៃនិងស្នៀតជើងទាត់ ហើយគេជាកីឡាករមានចិត្តប្រដាល់ធំ ព្រមទាំងកម្លាំងស៊ុហ្វខ្លាំងថែមទៀត។ ចាំមើលរវាងកីឡាករធន់ ចាន់តាក់ និងកីឡាករសេក គឹមរួន នរណាជាអ្នកឈ្នះ?៕
