ភ្នំពេញ ៖ កីឡាករសុខ សាវិន អ្នកប្រដាល់នៃក្លិបប៉ែនកាក់គុនខ្មែរ កៀកស្មារជាមួយកីឡាករជើងខ្លាំហពុទ្ធ សំបូរ អ្នកប្រដាល់របស់ក្លិបពុទ្ធសេរីវង្សកីឡាពោធិសែនជ័យ ស្វាគមន៍កីឡាករថៃតាក់ខាជេត និងកីឡាករលីងលំ ដើម្បីសាកស្នៀតគុន នៅលើសង្វៀនស៊ីអិនស៊ី នាថ្ងៃទី០៣ ខែវិច្ឆិកា ឆ្នាំ២០១៩នេះ។
កីឡាករសុខ សាវិន ជួបកីឡាករថៃតាក់ខាជេត នេះក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេនៅសង្វៀននេះ នៅមិនទាន់ដឹងថាកីឡាករថៃម្នាក់នេះមានវិជ្ជាគុនខ្លាំងប៉ុណ្ណានោះទេ តែបើតាមការសង្កេតកន្លងមក ពួកគេខ្លាំងខាងស្នៀតជើងទាត់ ជង្គង់ និងស្នៀតកាច់ផ្តួល។
ចំណែកសុខ សាវិន បច្ចប្បន្នកំពុងទទួលបានការគាំទ្រយ៉ាងច្រើនពីអ្នកគាំទ្រ ស្នៀតខ្លាំងរបស់គេគឺជង្គង់ និងកែង ដែលអាចប្រើប្រយោលក៍បានចូលកៀកក៍បាន ហើយមានភាពប៉ិនប្រសព្វក្នុងការប្រើបានល្អទៀតផង។ ក្នុងការប្រកួតនេះត្រូវបានអ្នកតាមដានកីឡាប្រដាល់លើកឡើងថា សុខ សាវិន មានភាគរយខ្ពស់បំផុត ក្នុងការយកឈ្នះថៃរូបនេះ ព្រោះគេកំពុងឡើងកូដខ្លាំង។ ចាំមើលរវាងសុខ សាវិន និងកីឡាករថៃតាក់ខាជេត នរណាជាអ្នកឈ្នះ?។
ដោយឡែកកីឡាករពុទ្ធ សំបូរ ត្រូវជួបជាមួយកីឡាករថៃលីងលំ ក្នុងប្រភេទទម្ងន់៦០គីឡូក្រាម អ្នកទាំង២នាក់នេះមិនដែលជួបគ្នាទេកន្លងមក តែយ៉ាងណាកីឡាករថៃរូបនេះធ្លាប់មកប្រកួតនៅតាមសង្វៀនស្រុកខ្មែរច្រើនលើកមកហើយ មានឈ្នះមានចាញ់ជាមួយកីឡាករលំដាប់ៗរបស់កម្ពុជា ស្នៀតខ្លាំងរបស់គេគឺជើងទាត់ ជង្គង់ និងស្នៀតកាច់ផ្តួលឲ្យគូប្រកួតដួលទាំងជំហ៊។
រីឯការប្រកួតរបស់ពុទ្ធ សំបូរ កន្លងមកគេមានកម្លាំងស៊ុហ្វខ្លាំង កលល្បិចប្រកួតល្អ និងមានផ្លែល្អ ហើយមួយទៀត សំបូរមានសមត្ថភាពប្រដាល់ខ្ពស់ថែមទៀត។ ប៉ុន្តែ ពុទ្ធ សំបូរ ក៏មិនអាចធ្វេសប្រហែសឬមើលស្រាលស៊ីឡាប៉ាក់ថៃ បានដែរ ដោយត្រូវប្រុងប្រយ័ត្នជានិច្ច។ យ៉ាងណាការប្រកួតរវាងអ្នកប្រដាល់ទាំងពីរ គេនៅតែរំពឹងថាពុទ្ធ សំបូរ ជាអ្នកឈ្នះច្រើនជាងចាញ់។ ចាំមើលកីឡាករពុទ្ធ សំបូរ គេអាចយកឈ្នះលើកីឡាករថៃលីងលំ ដែរឬយ៉ាងណា?៕
