ភ្នំពេញ ៖ កីឡាករជើងខ្លាំងរឿង សោភ័ណ្ឌ អ្នកប្រដាល់របស់ក្លិបម្កុដរាជសីហ៍ ដឹកដៃកីឡាករផាន់ គ្រាន់ អ្នកប្រដាល់នៃក្លិបពុទ្ធសេរីវង្សកីឡា ឡើងដណ្តើមប្រាក់លានជាមួយកីឡាករអ៊ីរ៉ង់MATIN EMAMI និងថៃផេតក្លា នៅលើសង្វៀនស៊ីអិនស៊ី នាថ្ងៃសៅរ៍ទី២៧ ខែកក្កដា ឆ្នាំ២០១៩នេះ។
កីឡាករឿង សោភ័ណ្ឌ ជួបជាមួយកីឡាករអ៊ីរ៉ង់MATIN EMAMI ក្នុងប្រភេទទម្ងន់៦៩គីឡូក្រាម អ្នកទាំងពីរមិនធ្លាប់ជួបគ្នាទេក្នុងកម្មវិធីនេះ ហើយមិនទាន់ដឹងថាកីឡាករអ៊ីរ៉ង់ម្នាក់នេះមានវិជ្ជាគុនខ្លាំងប៉ុណ្ណានោះដែរ តែយ៉ាងណាកីឡាករអ៊ីរ៉ង់ម្នាក់នេះហ្វឹកហាត់នៅប្រទេសថៃដូចនេះស្នៀតគុនរបស់គេមិនខុសពីកីឡាករថៃប៉ុន្មានតែ។
កីឡាករជើងខ្លាំងរឿង សោភ័ណ្ឌ ជាអ្នកប្រដាល់ដែលឡើងប្រកួតកម្រចាញ់គូរប្រកួតណាស់ព្រោះរូបគេ ប្រកួតមិនចេះលាក់ កម្លាំងនិងមានស្នៀតពិសេសដើម្បីផ្តួលដៃគូឲ្យសន្លប់ថែមទៀត។ ដោយអ្នកប្រដាល់រូបនេះ មានបទពិសោធន៍និងតិចនិកក្នុងការប្រកួតច្រើនទាំងការប្រកួតលក្ខណៈមិត្តភាពជាតិ និងអន្តរៈជាតិ។ កីឡាករដែលមានដើមកំណើត នៅឃុំពើក ស្រុកអង្គស្នួល ខេត្តកណ្តាល រឿង សោភ័ណ្ឌ មួយរយៈពេលចុងក្រោយនេះធ្វើមិនសូវបានល្អប៉ុន្មានទេជាមួយកីឡាករថៃ តែបើប៉ះជាមួយកីឡាករស្បែកសវិញ អាចនិយាយបានថាស៊ីផុយ ដែលកីឡាករស្បែកសខ្លះតតាំងជាមួយរឿង សោភ័ណ្ឌ មិនបានប្រាំទឹកផង។ ចាំមើលរឿង សោភ័ណ្ឌ ជាអ្នកឈ្នះឬកីឡាករអ៊ីរ៉ង់MATIN EMAMI ?។
ដោយឡែកកីឡាករផាន់ គ្រាន់ ជួបជាមួយកីឡាករថៃផេតក្លា នេះត្រូវបានអ្នកតាមដានអះអាងថា មានភាគរយឈ្នះតិចលើកីឡាករជើងខ្លាំងថៃម្នាក់នេះ បើទោះជាផាន់ គ្រាន់ គេជាអ្នកប្រដាល់ ជោកជាំជាមួយនឹងសង្វៀនក៍ដោយ ព្រោះអ្នកនាំកីឡាករថៃមកគេដាក់កីឡាករល្អមកដើម្បីយកប្រាក់លាននេះ បើការប្រកួតមិត្តភាពធម្មតាគេមិនសូវដាក់ជើងខ្លាំងមកនោះទេ កីឡាករកម្ពុជាផាត់ គ្រាន់ ត្រូវបានគេមើលឃើញថា ជាជើងខ្លាំងក្នុងចំណោមអ្នកមិនសូវខ្លាំងប៉ុណ្ណោះ។
ចំណែកកីឡាករថៃផេតក្លា គេធ្លាប់មកប្រកួតនៅស្រុកខ្មែរច្រើលើក ហើយក៍ធ្លាប់បានប្រកួតចាញ់និងឈ្នះលើកីឡាករកម្ពុជា ជាច្រើននាក់ផងដែរ ស្នៀតខ្លាំងរបស់គេគឺជង្គង់ និងស្នៀតទាត់កាត់។ រីឯកីឡាករផាន់ គ្រាន់ស្នៀតខ្លាំងរបស់គេគឺកណ្តាប់ដៃ និងជង្គង់ផងដែរ ក៍ប៉ុន្តែគ្រាន់តែគេមានកម្ពស់រាងទាបបន្តិចប៉ុណ្ណោះ។ ចាំមើលកីឡាករផាន់ គ្រាន់ និងកីឡាករថៃផេតក្លា នណាជាអ្នកឈ្នះ?៕
