ភ្នំពេញ ៖ កីឡាកររឿង សារ័ត្ន អ្នកប្រដាល់នៃក្លិបកងពលតូចទ័ពឆ័ត្រយោង៩១១ ជួបប្រកួតជាមួយកីឡាករថៃNam Khakbuon ខណៈកីឡាករម៉ឺន មេឃា អ្នកប្រដាល់របស់ក្លិបក្រសួងសេដ្ឋកិច្ច និងហិរញ្ញវត្ថុ ជួបកីឡាករថៃ Pha Nuvath Sakchhay yong ដើម្បីដណ្តើមប្រាក់លាន នៅលើសង្វៀនCNC នាថ្ងៃអាទិត្យទី២៥ ខែឧសភា ឆ្នាំ២០១៩នេះ។
កីឡាកររឿង សារ័ត្ន ជួបប្រកួតជាមួយកីឡាករថៃNam Khakbuon នេះក្នុងប្រភេទទម្ងន់៦៧គីឡូក្រាម អ្នកទាំងពីរមិនធ្លាប់ជួបគ្នាទេនៅលើសង្វៀននេះ តែកីឡាករថៃ Nam Khakbuon គេធ្លាប់មកប្រកួតនៅស្រុកខ្មែរជាច្រើនលើកមកហើយ មានឈ្នះចាញ់ជាមួយកីឡាករលំដាប់ៗរបស់កម្ពុជា ស្នៀតខ្លាំងរបស់គេគឺជើងទាត់ ជង្គង់ និងស្នៀតកាច់ផ្តួល។ ចំណែកកីឡាកររឿង សារ័ត្ន គេជាអ្នកប្រដាល់ជើងខ្លាំងមួយរូប ក្នុងចំណោមអ្នកប្រដាល់ស្រករក្រោយដូចគ្នា ដែលអ្នកតាមដានកីឡាប្រដាល់កម្ពុជាកំពុងតែចាប់អារម្មណ៍ចំពោះស្នៀតគុនរបស់កីឡាកររូបនេះ ដែលឡើងប្រកួតម្តងៗធ្វើឲ្យអ្នកទស្សនាជក់ចិត្តជាខ្លាំងនោះ។
ការប្រកួតរបស់គេគ្មានញញើតឫខ្លាចរអាចំពោះគូប្រកួតរបស់ខ្លួនឡើយទាំងកីឡាករជាតិ និងកីឡាករអន្តរជាតិ ព្រោះរូបគេមានកណ្តាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ កែង ក៏ល្អថែមទៀត ហើយមានកាយសម្បទារឹងមាំ ចិត្តប្រដាល់ធំ និងមានកលល្បិចខ្ពស់ក្នុងការប្រកួត ហើយធ្លាប់ជួបប្រកួតជាមួយថៃច្រើននាក់កន្លងមក។ ការប្រកួតរាល់លើករឿង សារ័ត្ន គេមិនដែលយោគយល់ឡើយចំពោះគូប្រកួត។ បើសម្លឹងមើលឃើញថាអាចបំបាក់បាន សារ័ត្នមិនទុកយូរទេ មួយទឹកពីរទឹកគឺ គេវាយផ្តាច់យកឈ្នះហើយ។ ចាំមើលកីឡាកររឿង សារ័ត្ន និងកីឡាករ Nam Khakbuon នណាជាអ្នកឈ្នះ?។
ដោយឡែកកីឡាករម៉ឺន មេឃា ត្រូវជួបជាមួយកីឡាករថៃ Pha Nuvath Sakchhay yong ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងថាកីឡាករថៃម្នាក់នេះមានវិជ្ជាគុនខ្លាំងប៉ុន្មាននោះដែរ ព្រោះកីឡាករថៃម្នាក់នេះជាអ្នកចំណូលថ្មីដែលមកប្រកួតនៅសង្វៀននេះ។
ចំណែកកីឡាករម៉ឺន មេឃា មួយរយៈពេលចុងក្រោយនេះ គេមើលឃើញថា អ្នកប្រដាល់វ័យក្មេងរូបនេះប្រកួតស្ទើរគ្រប់សង្វៀន និងទទួលបានជ័យជម្នះរហូតផងដែរ។ កីឡាករវ័យក្មេងរូបនេះមិនទាត់ដឹងថាខ្លួនឯងមានស្នៀតខ្លាំងណាមួយ ឬឲ្យច្បាស់ដូចឪពុកនៅឡើយទេ ប៉ុន្តែធ្លាប់ឮម្ដាយសរសើរថាស្នៀតទាត់គឺដូចគ្នា តែនៅស្រាល។ អ្នកលេងគុនខ្មែរវ័យក្មេងខាងលើ ប្រាប់ពីចំណុចខ្វះខាតរបស់ខ្លួនដែរថា គួរត្រូវពង្រឹងស្នៀតចាប់ឡាំជង្គង់ឲ្យបានច្រើនជាងនេះ ព្រោះនៅខ្សោយ។ ចាំមើលរវាងម៉ឺន មេឃា និងកីឡាករថៃ Pha Nuvath Sakchhay yong នរណាជាអ្នកឈ្នះ?៕
