ភ្នំពេញ ៖ កីឡាករផល សោភ័ណ្ឌ អ្នកប្រដាល់របស់ក្លិបតឡីដំរីមានរិទ្ធ ត្រូវគេផ្គូផ្គងឲ្យជួបជាមួយកីឡាករថៃកែវកាំងវ៉ាន់ ព្រីវវ៉ាយ៉ូ ខណៈកីឡាករវ័យក្មេងឡៅ ចិត្រា អ្នកប្រដាល់នៃក្លិបកងពលតូចទ័ពឆ័ត្រយោង៩១១ ជួបកីឡាករថៃម៉ៃសុទ្ធ បេឡេបូរីរ៉ាំ នៅលើសង្វៀនស៊ីអិនស៊ីនាខត្តកំពុងស្ពឺ នាថ្ងៃសៅរ៍ទី៣០ ខែមីនា ឆ្នាំ២០១៩នេះ។
កីឡាករផល សោភ័ណ្ឌ កីឡាករថៃកែវកាំងវ៉ាន់ ព្រីវវ៉ាយ៉ូ ក្នុងប្រភេទទម្ងន់៦៣.៥គីឡូក្រាមនេះត្រូវបានអ្នកវិភាគប្រដាល់លោកឡើងថា ផល សោភ័ណ្ឌ មានប្រៀបឈ្នះច្រើនជាង ព្រោះគេជាកីឡាករជើងខ្លាំងម្នាក់ដែលលេងស្នៀតកណ្តាប់ដៃ និងកែង ហើយឡើងប្រកួតលើកណាក៏ពិបាករកដៃគូមកផ្តួលឱ្យគេឲ្យចាញ់ពិន្ទុ ឬសន្លប់នៅលើរេញណាស់ តែកីឡាកររូបនេះធ្លាប់ផ្តួលដៃគូតស៊ូឲ្យសន្លប់ជាច្រើនលើកនៅស្នៀតខ្លាំងរបស់គេនេះ។
អ្នកស្នេហាកីឡាប្រដាល់ភាគច្រើនកំពុងនាំគ្នាយល់ថាផល សោភ័ណ្ឌ គេជាកីឡាករដែលមានសក្តានុពល ហើយមានសមត្ថភាពគួរឱ្យសរសើរ ដោយម្នាក់ៗហាក់សម្តែងនូវទំនុកចិត្តចង់ទស្សនាយ៉ាងខ្លាំងនៅគ្រប់ ពេលកីឡាកររូបនេះឡើងរេញប្រកួតម្តងៗនោះ ដោយសារតែគេប្រកួតមិនលាក់កម្លាំង ហើយមិនលក់តម្លៃខ្លួននោះឡើយ គ្រប់ការប្រកួតបើមើលឃើញថាអាចផ្តួលគូប្រកួតបាននោះគែមិនទុកឲ្យឈរជើងបាន៥ទឹកនោះទេ។ ចាំមើលកីឡាករផល សោភ័ណ្ឌ ជួបជាមួយកីឡាករថៃ កែវកាំងវ៉ាន់ ព្រីវវ៉ាយ៉ូ អាចយកឈ្នះដូចអ្នកវិភាគឬយ៉ាងណា?។
ដោយឡែកកីឡាករជើងខ្លាំងវ័យក្មេង ឡៅ ចិត្រា បច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកែងនិងជង្គង់ ដែលអាចវាយចេញជាប្រយោលក៏បាន ចូលកៀកក៏បាន ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។
ក្រុមអ្នកតាមដានកីឡាប្រដាល់និយាយថា កីឡាករ ឡៅ ចិត្រា មួយរយៈចុងក្រោយនេះកំពុងក្តោបក្តាប់សំណាងឈ្នះម្តងហើយម្តងទៀត ស្ទើរតែគ្រប់ការប្រកួតតែម្តង ខណៈដែលសំណាងដែលកីឡាកររូបនេះទទួលបាននោះ គឺមិនមែនបានដោយភាពចៃដន្យនោះទេ ប៉ុន្តែគឺបានមកពីសមត្ថភាពពិតៗតែម្តង។ គូប្រកួតទាំងជើងចាស់ និងជើងថ្មី សុទ្ធតែទទួលស្គាល់ថាឡៅ ចិត្រា ពិតជាពិបាកផ្តួល និងកំពុងធ្វើឱ្យពួកគេក្លាយជាអ្នកចាញ់ជាបន្តបន្ទាប់ ក្នុងការប្រកួតមិត្តភាពជាតិនិងអន្តរជាតិ។ តែយ៉ាងណាក្នុងការជួបប្រកួតជាមួយកីឡាករថៃម៉ៃសុទ្ធ បេឡេបូរីរ៉ាំ នេះត្រូវបានអ្នកវិភាគប្រដាល់អះអាងថា ឡៅ ចិត្រា មានភាគរយឈ្នះត្រឹមហាសិបភាគរយប៉ុណ្ណោះ ព្រោះកីឡាករថៃម៉ៃសុទ្ធ បេឡេបូរីរ៉ាំ គេជាកីឡាករជើងខ្លាំងដែលធ្លាប់ឈ្នះកីឡាករកម្ពុជាជាច្រើននាក់។ ចាំមើលការប្រកួតនេះឡៅ ចិត្រា ជាអ្នកឈ្នះឬកីឡាករថៃម៉ៃសុទ្ធ បេឡេបូរីរ៉ាំ?៕
