ភ្នំពេញ ៖ កីឡាករជើងខ្លាំងគឹម វាសនា អ្នកប្រដាល់នៃក្លិបកងពលតូចទ័ពពិសេសឆ័ត្រយោង៩១១ ត្រូវគេផ្គូផ្គងឲ្យឡើងសាកស្នៀតគុនជាមួយជាមួយកីឡាករថៃភិតវិស្ណុ កាំប៉ាន់មួយថៃ រីឯកីឡាករជើងចាស់ឡុង ជិន អ្នកប្រដាល់របស់ក្លិបខ្លារខិនមានរិទ្ធ កីឡាករជនជាតិថៃ ឌែនសាយ៉ាម ក.កាំណាត នាល្ងាចថ្ងៃសៅរ៍ទី០៩ ខែកុម្ភៈ ឆ្នាំ២០១៩នេះ នៅលើសង្វៀនស៊ីអិនស៊ី ។
រវាងកីឡាករគឹម វាសនា និងកីឡាករថៃភិតវិស្ណុ កាំប៉ាន់មួយថៃ ប្រកួតគ្នាក្នុងប្រភេទទម្ងន់៦៧គីឡូក្រាម អ្នកទាំងពីរមិនដែលធ្លាប់ជួបគ្នាទេនាពេលកន្លងមកនៅសង្វៀននេះ កីឡាករថៃម្នាក់នេះមិនទាន់ដឹងថា គេមានកណត់ត្រាប្រកួតបែបណានោះទេ តែកីឡាករថៃដែលធ្លាប់មកប្រកួតនៅស្រុកខ្មែរភាគច្រើនគេពូកែខាងស្នៀតជើងទាត់ និងជង្គង់ ព្រមទាំងស្នៀតកាច់ផ្តួល។ទោះជាយ៉ាងណា អ្នកប្រដាល់ថៃភិតវិស្ណុ កាំប៉ាន់មួយថៃ រូបនេះ មិនប្រាកដថាអាចឈ្នះ គឹម វាសនា បាននោះឡើយ ព្រោះថា គឹម វាសនា ពេលនេះគេរឹងមាំទាំងកាយសម្បទា ខ្លាំងទាំងស្នៀតប្រដាល់ បន្ទាប់ពីគេជួបប្រកួតជាមួយថៃច្រើននាក់កន្លងមក។
គឹម វាសនា ឥឡូវគេជាជើងខ្លាំងរបស់កម្ពុជា ក្នុងប្រភេទទម្ងន់៦៧ គីឡូក្រាមនេះ។ ក្រោយពេលឆ្លងកាត់ការប្រកួតជាមួយកីឡាករបរទេសជាច្រើនលើកកន្លងមកនោះ បានធ្វើឲ្យគេមានបទពិសោធន៍ច្រើនក្នុងការប្រកួត ដោយគេវាយជាមួយថៃ ដូចវាយជាមួយខ្មែរគ្នាឯងអីចឹង គឺគ្មានញញើតខ្លាចរអាអ្វីបន្តិចឡើយ។ ការប្រកួតរបស់គឹម វាសនា កន្លងមកគេមានកណ្តាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ កែង ក៏ល្អថែមទៀតផងដែរ។ ចាំមើលការប្រកួតនេះ គឹម វាសនា ជាអ្នកឈ្នះឬកីឡារថៃភិតវិស្ណុ កាំប៉ាន់មួយថៃ?។
ដោយឡែកកីឡាករឡុង ជិន ត្រូវជួបជាមួយកីឡាករថៃឌែនសាយ៉ាម ក.កាំណាត ក្នុងប្រភឹទទម្ងន់៥៧គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយក៍មិនទាន់ដឹងថា កីឡាករថៃចំណូលថ្មីនេះមានវិជ្ជាគុនខ្លាំងប៉ុណ្ណានោះដែរ។
រីឯកីឡាករឡុង ជិន ជាអ្នកប្រដាល់វ័យក្មេងមានស្នៀតប្រដាល់ល្អ វាយចេញចូលលឿន និងរហ័ស និងមានបច្ចេកទេសក្នុងការប្រកួតល្អដែរ។ មួយទៀត គេវាយរហ័ស ដករហ័ស ចេញចូលលឿន និងមានផ្លែល្អថែមទៀត។ គេជាអ្នកប្រដាល់ស្រករក្រោយទេ តែគេមានស្នៀតប្រដាល់ល្អ ហើយធ្លាប់ផ្ដួលអ្នកប្រដាល់រួមជាតិ ដែលជាជើងខ្លាំងៗច្រើននាក់មកហើយ។ ដូច្នេះក្នុងការប្រកួតនេះ ឡុង ជិន ច្បាស់ជាឈ្នះលើកីឡាករថៃឌែនសាយ៉ាម ក.កាំណាត ជាក់ជាមិនខាន៕
