ភ្នំពេញ ៖ កីឡាករវង្ស ណយ អ្នកប្រដាល់នៃក្លិបកុលបុត្រគុនខ្មែរ ខណ្ឌទួលគោក ដឹកដៃកីឡាករធឿន ធី អ្នកប្រដាល់របស់ក្លិបអង្គរមានជ័យខេត្តសៀមរាប ជួបជាមួយកីឡាករថៃណាំខៈបួន តូងប្រាសាទហ៊ីម និងកីឡាករថៃណាក់ប៊ិនឡេក ប៉.យុទ្ធភូមិ ដើម្បីសាកកណ្តាប់ដៃគ្នាក្នុងការប្រកួតលក្ខណៈមិត្តភាពអន្តរជាតិ នៅលើសង្វៀនស៊ីអិនស៊ី នាថ្ងៃសៅរ៍ទី១៦ ខែវិច្ឆិកា ឆ្នាំ២០១៨នេះ។
កីឡាករវង្ស ណយ ត្រូវជួបជាមួយកីឡាករណាំខៈបួន តូងប្រាសាទហ៊ីម អ្នកទាំងពីរមិនធ្លាប់ជួបគ្នាដែរកន្លងមកនៅសង្វៀននេះ កីឡាករថៃម្នាក់នេះមានវិជ្ជាគុនរបស់គេខ្លាំងមិនធម្មតាឡើយ ហើយស្នៀតខ្លាំងរបស់គេជើងទាត់ទាត់កាត់ និងជង្គង់ ដែលអាចវាយប្រយោលក៍បានចូលកៀកក៍បាន ហើយមានកម្លាំងស៊ុហ្វខ្លាំងទៀតផង។
ចំណែកកីឡាករវង្ស ណយ ជាកីឡាករមានប្រជាប្រីយ៍ភាពជាងគេក្នុងការប្រកួតជាមួយកីឡាករបរទេស នាឆ្នាំ២០១៥កន្លងមក កីឡាករបរទេសដែលមកជួបគេម្តងៗកម្រឆ្លងផុតទឹកទី៥ណាស់ ព្រោះស្នៀតខ្លាំងរបស់គេគឺកែងនិងកណ្តាប់ដៃដែលអាចវាយប្រយោលក៍បានចូលគៀកក៍បាន តែភាពខ្លាំងរបស់គេនេះមិនបានយូប៉ុន្មានឡើយ តាំងពីពាក់កណ្តាលឆ្នាំ២០១៦រហូតមកដល់បច្ចប្បន្ននេះគឺគេប្រកួតអន់ ភាគច្រើនចាញ់កីឡាករបរទេស ហើយការប្រកួតទៀតសោធន៍មិនបានពេញ៥ទឹកនោះទេ ដោយសារតែកម្លាំងស៊ុហ្វចុះខ្សោយ ហើយអន់ផ្នែកក្បាលពោះ ដៃគូវាយចូលតែមួយដៃពីរគឺចុកមិនអាចតតាំងបានទៀតឡើយ។ ចាំមើលរវាងវង្ស ណយ និងកីឡាករថៃណាំខៈបួន តូងប្រាសាទហ៊ីម នរណាជាអ្នកឈ្នះ?។
ដោយឡែកកីឡាករធឿន ធី ត្រូវជួបជាមួយកីឡាករថៃណាក់ប៊ិនឡេក ប៉.យុទ្ធភូមិ ក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ព្រោះធឿន ធី ជាកីឡាករជើងថ្មីទើបនិងឡើងកូដ ស្នៀតខ្លាំងរបស់គេគឺកណ្តាប់ដៃ និងកែង ដែលអាចវាយចេញរហ័សហើយចំគោលដៅ កីឡាករជើងថ្មី និងជើងចាស់ជាច្រើននាក់ដែលគេបានយកឈ្នះ ហើយបានឡើងមកប្រកួតលក្ខណៈមិត្តភាពអន្តរជាតិបែបនេះ។
ការប្រកួតនេះត្រូវបានអ្នកតាមដានប្រដាល់លើកឡើងថា រវាងកីឡាករធឿន ធី និងកីឡាករថៃណាក់ប៊ិនឡេក ប៉.យុទ្ធភូមិ ការឈ្នះចាញ់មានត្រឹមហាសិបភាគរយម្នាក់ប៉ុណ្ណោះ ព្រោះពួកគេមិនដែលជួបគ្នា ណាមួយកីឡាករកម្ពុជា ជាកីឡាករជើងថ្មីកម្លាំងស៊ុហ្វក៍នៅមិនទាន់ពេញដូចអ្នកប្រដាល់ដែលមានបទពិសោធន៍ជោគជាំនិងសង្វៀនដែរ។ ចាំមើលរវាង កីឡាករកម្ពុជាធឿន ធី និងកីឡាករថៃណាក់ប៊ិនឡេក ប៉.យុទ្ធភូមិ នរណាជាអ្នកឈ្នះក្នុងការប្រកួតនេះ?៕
