ភ្នំពេញ ៖ កីឡាករជើងខ្លាំងទម្ងន់មធ្យមមឿង សុខហ៊ុច អ្នកប្រដាល់ពុទ្ធសេរីវង្សពោសែនជ័យ ជួបកីឡាករថៃKreang Krai រីឯកីឡាករធន់ ចាន់តាក់ អ្នកប្រដាល់របស់សមាគមកីឡាប្រដាល់ក្រសួងការពារជាតិ ជួបជាមួយកីឡាករអ៊ីរ៉ង់ Amini Eisa ខណៈកីឡាករថា សារុន អ្នកប្រដាល់ពុទ្ធសេរីវង្សពោសែនជ័យ ជួបប្រកួតជាមួយកីឡាករថៃ Big M នៃការប្រកួតលក្ខណៈមិត្តភាពអន្តរៈជាតិ នាថ្ងៃសៅរ៍ទី២៩ ខែកញ្ញា ឆ្នាំ២០១៨នេះ នៅលើសង្វៀនស៊ីអិនស៊ី។
គូប្រកួត ដែលអាចឲ្យអ្នកទស្សនាទុកចិត្តបាននោះ គឺកីឡាករមឿង សុខហ៊ុយដែលត្រូវជួបជាមួយកីឡាករជនជាតិថៃKreang Krai ក្នុងប្រភេទទម្ងន់៦៥គីឡូក្រាម កីឡាករថៃម្នាក់នេះគេពូកែស្នៀតជើងទាត់ និងជង្គង់ ដែលអាចប្រើបានលឿននិងចំគោលដៅទៀតផង រីឯមឿង សុខហ៊ុច គេមានកាយសម្បទារឹងមាំ ព្រមទាំងមានស្នៀតកែង និងជង្គង់ ដែលធ្វើឲ្យគូរប្រកួតរបស់ខ្លួន ពិបាកទប់ទល់ និងជាស្នៀតសម្រាប់ផ្ដួលគូរប្រកួតដ៍អស្ចារទៀតផង។ ការវាយចេញរបស់សុខហ៊ុច ធ្ងន់ហើយរហ័សផងដែរ ជាពិសេសស្នៀតជើងទាត់ និងជង្គង់ របស់គេខ្លាំងណាស់អាចបញ្ចេញបានភ្លាមៗស្របជាមួយដៃតែម្តង។ ប៉ុន្តែយ៉ាងណា មឿង សុខហ៊ុច ក៏មានចំណុចខ្សោយខ្លះដែរ គឺត្រង់វាយចេញហើយមិនសូវការពាវិញនោះទេដែលធ្វើឲ្យដៃគូប្រកួតឆាប់ដឹងពីចំណុចខ្សោយទាំងនេះ។ ចាំមើលមឿង សុខហ៊ុច អាចយកឈ្នះលើកីឡាករថៃ Kreang Krai នេះបានដោយរបៀបណា?។
ចំណែកកីឡាករ ធន់ ចាន់តាក់ ត្រូវជួបជាមួយកីឡាករអ៊ីរ៉ង់ Amini Eisa ក្នុងប្រភេទទម្ងន់៦៣.៥គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងថាកីឡាករង៊ីរ៉ង់នេះមានស្នៀតគុណខ្លាំងប៉ុណ្ណានោះទេ។ រីឯធន់ ចាន់តាក់ គេចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកណ្តាប់ដៃនិងកែង ដែលអាចវាយចេញជាប្រយោលក៏បាន ចូលកៀកក៏បាន ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។ ក្នុងការជួបប្រកួតជាមួយកីឡាករអ៊ីរ៉ង់ Amini Eisa នេះក៍ត្រូវបានអ្នកវិភាគប្រដាល់អះអាងថា ធន់ ចាន់តាក់ ប្រាកដជាឈ្នះទៀតជាក់ជាមិនខាន។ ចាំមើលកីឡាករធន់ ចាន់តាក់ អាចយកឈ្នះលើកីឡាករអ៊ីរ៉ង់ Amini Eisa បានដែរឫយ៉ាងណា?។
ដោយឡែកកីឡាករថា សារុន ត្រូវជួបជាមួយកីឡាករថៃ Big M ក្នុងប្រភេទទម្ងន់៦០គីឡូក្រាម អ្នកទាំងពីរក៍មិនធ្លាប់ជួបគ្នាដែរពីមុនមក ក្នុងការជួបគ្នារវាងកីឡាករទាំងពីរនាក់នេះមិនមាននរណាអាចទស្សទាយមុនថា កីឡាករកម្ពុជា ជាអ្នកឈ្នះឬកីឡាករថៃនោះទេ ព្រោះពួកគេជួបគ្នាលើកដំបូង ហើយណាមួយកីឡាករថា សារុន វិជ្ជាគុនរបស់គេនៅមានកម្រិតតែយ៉ាងណាថា សារុន គេមានកម្លាំងស៊ុហ្វខ្លាំងអាចតតាំងជាមួយគូប្រកួតបាន៥ទឹកមិនលំបាកឡើយ។ ចាំមើលរវាងកីឡាករថា សារុន និងកីឡាករថៃ Big M នរណាជាអ្នកឈ្នះ?៕
