ខេត្តព្រះសីហនុ៖ នាយឧត្ដមសេនីយ៍ នេត សាវឿន អគ្គស្នងការនគរបាលជាតិ បានចាត់កម្លាំងជើងខ្លាំងចំនួន១១រូប ដើម្បីចុះជួយដឹកនាំ និងពង្រឹងការងារសន្តិសុខសណ្ដាប់ធ្នាប់នៅក្នុងខេត្តព្រះសីហនុ។ ក្រុមការងារដែលត្រូវបញ្ជូនទៅនោះ សុទ្ធតែមានតួនាទី និងតំណែងខ្ពស់ៗទៀតផង។ អ្នកទាំង១១រូបនោះ មានឈ្មោះដូចខាងក្រោមនេះ៖
១. នាយឧត្តមសេនីយ៍ ថោង លីម អគ្គស្នងការរងនគរបាលជាតិ ជាប្រធាន
២. ឧត្តមសេនីយ៍ឯក សេក ភូមី ប្រធាននាយកដ្ឋានកណ្តាលសណ្តាប់ធ្នាប់សាធារណៈ ជាអនុប្រធាន
៣. ឧត្តមសេនីយ៍ទោ លី ដាវុធ អនុប្រធានសេនាធិការ ជាអនុប្រធាន
៤. ឧត្តមសេនីយ៍ទោ សុខ នីត្យា អនុប្រធាននាយកដ្ឋានកណ្តាលសន្តិសុខ ជាអនុប្រធាន
៥. ឧត្តមសេនីយ៍ទោ អ៊ុំ ប៊ុនថន អនុប្រធាននាយកដ្ឋាននគរបាលយុត្តិធម៌ ជាអនុប្រធាន
៦. ឧត្តមសេនីយ៍ទោ រស់ គង់ អនុប្រធាននាយកដ្ឋាននគរបាលព្រហ្មទណ្ឌ ជាសមាជិក
៧. ឧត្តមសេនីយ៍ទោ សាន សុទ្ធី នាយករងមន្ទីរប្រឆាំងគ្រឿងញៀន ជាសមាជិក
៨. ឧត្តមសេនីយ៍ទោ សុខ ណុប អនុប្រធាននាយកដ្ឋានចរាចរណ៍ និងសណ្តាប់ធ្នាប់សាធារណៈ ជាសមាជិក
៩. ឧត្តមសេនីយ៍ត្រី ស្បោង ស៊ីណេត អនុប្រធាននាយកដ្ឋាននគរបាលទេសចរណ៍ ជាសមាជិក
១០. ឧត្តមសេនីយ៍ត្រី សុក សំបូរ អនុប្រធាននាយកដ្ឋានប្រឆាំងការជួញដូរមនុស្ស និងអនីតិជន ជាសមាជិក
១១. វរសេនីយ៍ឯក ឈីម វណ្ណៈ អនុប្រធាននាយកដ្ឋានសន្តិសុខផ្ទៃក្នុង ជាសមាជិក។
នៅក្នុងលិខិតដដែល បញ្ជាក់ថា ក្រុមការងារមានភារកិច្ចចំពង្រឹងនៅខេត្តព្រះសីហនុដើម្បី ៖ ពិនិត្យ វាយតម្លៃសភាពការណ៍សន្តិសុខ សណ្តាប់ធ្នាប់ និងសុវត្ថិភាពសង្គមនៅខេត្តព្រះសីហនុ ដើម្បីផ្តើមស្នើអគ្គស្នងការដ្ឋាននគរបាលជាតិ ដាក់ចេញវិធានការដឹកនាំស្របតាមការវិវឌ្ឍន៍រីកចម្រើនថ្មី។ ពិនិត្យ ណែនាំដល់ស្នងការដ្ឋាននគរបាលខេត្តព្រះសីហនុ រៀបចំផែនការរក្សាសន្តិសុខ សណ្តាប់ធ្នាប់ និងសុវត្ថិភាពសង្គម ឆ្លើយតបនឹងសភាពការណ៍ជាក់ស្តែង និងស្របតាមគោលការណ៍ ផែនការ ទិសដៅនានា របស់ក្រសួងមហាផ្ទៃ និងអគ្គស្នងការដ្ឋាននគរបាលជាតិ ដែលបានដាក់ចេញ។
តាមដានការអនុវត្តន៍របស់ស្នងការដ្ឋាននគរបាលខេត្តព្រះសីហនុ និងស្នើសុំការអនុញ្ញាតប្រើកម្លាំងអន្តរាគមន៍ ដោះស្រាយសភាពការណ៍ចាំបាច់មួយចំនួន ពីលោកអគ្គស្នងការ។ ដឹកនាំប្រជុំបូកសរុប ដកពិសោធការងាររក្សាសន្តិសុខ សណ្តាប់ធ្នាប់ និងសុវត្ថិភាពសង្គម នៅខេត្តព្រះសីហនុ ប្រចាំឆមាស ឆ្នាំ និងតាមការចាំបាច់។ ធ្វើរបាយការណ៍បូកសរុបលទ្ធផល ដើម្បីរាយការណ៍ជូនថ្នាក់ដឹកនាំអគ្គស្នងការដ្ឋាននគរបាលជាតិ៕
