ភ្នំពេញ៖ កម្ពុជា នឹងមានភ្លៀងដែលមានលក្ខណៈជាប្រព័ន្ធ ធ្លាក់រាយប៉ាយក្នុងក្របខណ្ឌស្ទើរទូទាំងប្រទេសចាប់ពីថ្ងៃទី១ ដល់ ថ្ងៃទី៨ ខែមិថុនា ឆ្នាំ២០១៨។ ការធ្លាក់ភ្លៀងក្នុងលក្ខណៈជាប្រព័ន្ធ ងាយនឹងបង្កឱ្យមានជំនន់ទឹកភ្លៀង ពិសេសតំបន់ទំនាបកណ្តាល។ នេះបើតាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី២៨ ខែឧសភា ឆ្នាំ២០១៨នេះ។
ក្រសួងបានព្យាករថា ការធ្លាក់ភ្លៀងបែបនេះ គឺដោយសារតែនៅថ្ងៃទី១ ខែមិថុនាខាងមុខនេះ ប្រព័ន្ធសម្ពាធទាប (ITCZ) នឹងកើតមានឡើង ដោយអូសកាត់ពីលើប្រទេសកម្ពុជា (ពីភាគពាយ័ព្យ ទៅភាគអាគ្នេយ៍នៃប្រទេស)។
តំបន់ទំនាបកណ្ដាល មានដូចជា រាជធានីភ្នំពេញ ខេត្តព្រៃវែង ស្វាយរៀង កំពង់ឆ្នាំង កំពង់ស្ពឺ កណ្ដាល ពោធិ៍សាត់ បាត់ដំបង សៀមរាប និងកំពង់ធំ។
ក្រសួងបន្ថែមថា បាតុភូតផ្គរ រន្ទះ និងខ្យល់កន្រ្តាក់ នៅតែបន្តមានឥទ្ធិពលខ្លាំង ទាំងនៅក្នុងសប្តាហ៍នេះ និងសប្តាហ៍ខាងមុខ៕
