ភ្នំពេញ ៖ ប្រជាពុទ្ធបរិស័ទជិតឆ្ងាយ នៅរាជធានីភ្នំពេញ និង បណ្ដាខេត្ត១ចំនួន និងពុទ្ធបរិស័ទចំណុះជើងវត្តនៅភូមិសំរោងកណ្ដាល សង្កាត់សំរោងផង នាព្រឹកថ្ងៃ៧កើត ខែកត្តិក ឆ្នាំថោះ ទោស័កពុទ្ធសករាជ២៥៦៧ ត្រូវនឹង ថ្ងៃទី១៨ ខែវិច្ឆិកា ឆ្នាំ២០២៣ បានមូលមតិគ្នាជាឯកឆន្ទដង្ហែអង្គកឋិនទានសាមគ្គីចូលមកកាន់វត្ត សុវណ្ណរាសី រតនារាម ហៅវត្តសំរោងកណ្ដាល ស្ថិតក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ដើម្បីវេរ ប្រគេនព្រះសង្ឃដែលគង់ចាំព្រះវស្សាអស់កាលត្រីមាស និងដើម្បីប្រមូល បច្ច័យកសាង សមិទ្ធផលនានានៅក្នុងទីអារាមនេះឲ្យបានកាន់តែប្រសើរថែមទៀត។
ព្រះធម្មវិសុទ្ធវង្ស អ៊ូ សុខអេង ព្រះចៅអធិការវត្តសុវណ្ណរាសី រតនារាម ហៅ វត្តសំរោងកណ្ដាល មានសង្ឃដីការថា តាមទំនៀមទំលាប់ប្រពៃណីនៃ ព្រះពុទ្ធសាសនា នៅចុងវស្សាន្ដរដូវ រយៈពេល២៩ថ្ងៃគឺចាប់ពីថ្ងៃ ១រោជ ខែភទ្របុទ្ររហូតដល់ថ្ងៃពេញបូរមីខែកត្តិក ប្រជាពុទ្ធបរិស័ទតែងប្រារព្ធធ្វើបុណ្យកឋិនទានវេរ ប្រគេនព្រះសង្ឃដែលបានបញ្ចប់ចំណាំព្រះវស្សាជារៀងរាល់ឆ្នាំហើយការធ្វើនេះ បើតាមពុទ្ធបញ្ញត្តិក្នុង១ឆ្នាំ វត្តនិមួយៗ ទទួល បានអង្គឋិនតែម្ដងប៉ុណ្ណោះ។ បុណ្យនេះមានក្លឹមសារសំខាន់ សំរាប់ពុទ្ធសាសនិកជនជាអ្នកគោរពស្រឡាញ់ ទ្រទ្រង់ព្រះពុទ្ធសាសនា ដោយបាននាំមកនូវត្រៃចីវរជាប្រធាន អមដោយបរិក្ខាជាច្រើនទៀត ដែលជាប្រដាប់ ប្រើប្រាស់ក្នុងជីវភាពរបស់ព្រះសង្ឃ។
ក្រៅពីអត្ថន័យខាងលើពិធីបុណ្យនេះ ក៏ជាការបង្ហាញនូវទឹកចិត្តជ្រះថ្លា ក្នុងការបំពេញកុសល ប្រកបដោយជំនឿលើមាគ៌ាព្រះពុទ្ធសាសនា ហើយក៏ជាកាឆ្លុះបញ្ចាំងពី ការរួបរួមសាមគ្គីគ្នា រវាងអាជ្ញាធរ មន្ដ្រីរាជការ ប្រជាពលរដ្ឋដែលមានព្រះសង្ឃផងដែរ ក្នុងការជួយទ្រទ្រង់និងលើកដំកើងដល់វិស័យ ព្រះពុទ្ធសាសនាឲ្យបានថ្កុំថ្កើងរុងរឿង។
ព្រះចៅអធិការវត្តសំរោងកណ្តាលបន្តថា ក្រៅពីបច្ច័យប្រគេនដល់ព្រះសង្ឃសម្រាប់ប្រើប្រាស់ជាបច្ច័យ៤ ដោយកំលាំងសទ្ធាជ្រះថ្លារបស់ប្រជាពុទ្ធបរិស័ទ ជិតឆ្ងាយ អង្គកឋិនទាននេះប្រមូលបច្ច័យ សរុបបានប្រមាណ៧ម៉ឺនដុល្លាអាមេរិក ដែលបច្ច័យទាំងនេះ១ចំណែកតូចសម្រាប់ប្រើប្រាស់ក្នុងការចំណាយផ្សេងៗ និងសល់ពីនេះសម្រាប់ ប្រើប្រាស់ក្នុងការកសាង ផ្សេងៗពិសេសចាក់ខ្សាច់បំពេញទីធ្លាវត្តផងដែរ ដែលការងារកសាងនេះ ចាំបាច់ត្រូវតែធ្វើមិនអាចខ្វះបាន។
សូមបញ្ជាក់ថា កឋិនទានសមគ្គីនេះផ្តួចផ្តើមដោយលោកឧកញ៉ា ដួង តិច និងលោកជំទាវ រួមចំណែកដោយលោក លោកស្រី ឧបាសក ឧបាសិកា មកពីទីជិតឆ្ងាយ និងចំណុះជើងវត្តវត្តសុវណ្ណរាសី រតនារាម ហៅ វត្តសំរោងកណ្ដាល ទាំងមូលផងដែរ៕
