បរទេស ៖ បើយោងតាមទិន្នន័យដែលបានបង្ហាញដោយក្រុមហ៊ុនកាលពីថ្ងៃសុក្រ ទី២០ ខែតុលា បានឲ្យដឹងថា ថ្នាំគ្រាប់សម្រាប់ជំងឺគ្រុនឈាម ដែលបង្កើតឡើងដោយក្រុមហ៊ុន Johnson & Johnson ហាក់ជួយការពារប្រឆាំងនឹងទម្រង់នៃមេរោគនេះចំពោះអ្នកជំងឺមួយចំនួននៅក្នុងការសាកល្បងលើមនុស្សមួយក្រុមតូចនៅសហរដ្ឋអាម៉េរិក។
ក្រុមហ៊ុនបាននិយាយនៅមុនការធ្វើបទបង្ហាញនៃទិន្នន័យនៅឯកិច្ចប្រជុំប្រចាំឆ្នាំរបស់អង្គការសង្គមវេជ្ជសាស្ត្រនិងអនាម័យត្រូពិចអាម៉េរិកនៅទីក្រុងឈីកាហ្គោ ថា បច្ចុប្បន្នមិនមានការព្យាបាលជាក់លាក់ណាមួយសម្រាប់ជំងឺគ្រុនឈាម ដែលជាការគំរាមកំហែងខ្លាំងនោះទេ។
លោក ម៉ានិច វ៉ាន់ លុក (Marnix Van Loock) ដែលមើលការខុសត្រូវលើការស្រាវជ្រាវអំពីមេរោគនេះសម្រាប់ក្រុមហ៊ុន Janssen របស់ J&J បាននិយាយអំពីថ្នាំនេះ យ៉ាងដូច្នេះថា “វាជាលើកដំបូងមិនធ្លាប់មានដែលបង្ហាញពីសកម្មភាពថ្នាំប្រឆាំងមេរោគលើជំងឺគ្រុនឈាម។”
នៅក្នុងការសាកល្បងលើមនុស្ស អ្នកស្រាវជ្រាវបានបញ្ចេញភ្នាក់ងារមេរោគដោយចេតនាឱ្យប៉ះពាល់ជាមួយអ្នកស្ម័គ្រចិត្តដែលមានសុខភាពល្អ ដើម្បីសាកល្បងវ៉ាក់សាំង ឬការព្យាបាល ឬ យល់ដឹងកាន់តែច្បាស់អំពីជំងឺដែលពួកវាបង្កឡើង។
ជំងឺគ្រុនឈាម ខណៈជារឿយៗមិនមានរោគសញ្ញា ត្រូវបានគេស្គាល់ថាជា “គ្រុនក្តៅបាក់ឆ្អឹង” សម្រាប់ភាពធ្ងន់ធ្ងរនៃការឈឺចាប់សន្លាក់ និងការកន្ត្រាក់សាច់ដុំ ដែលអ្នកជំងឺមួយចំនួនជួបប្រទះ។ លោក ជេរេមី ហ្វារ៉ា (Jeremy Farrar) ប្រធានអ្នកវិទ្យាសាស្ត្ររបស់អង្គការសុខភាពពិភពលោក (WHO) បាននិយាយកាលពីដើមខែនេះ វាជាជំងឺរាតត្បាតជាយូរណាស់មកហើយនៅទូទាំងអាស៊ីនិងអាម៉េរិកឡាទីន ដែលបណ្តាលឱ្យមានការឆ្លងរាប់លាននាក់ក្នុងមួយឆ្នាំៗ និងការស្លាប់រាប់ម៉ឺននាក់ ហើយទំនងជានឹងរីករាលដាលបន្ថែមទៀត ដោយសារតែការប្រែប្រួលអាកាសធាតុធ្វើឱ្យតំបន់ជាច្រើនទៀតទាក់ទាញមូសដែលចម្លងមេរោគគ្រុនឈាម។
នៅក្នុងការសាកល្បងដែលធ្វើឡើងជាមួយសាលាជំនាញសុខភាពសាធារណៈចនហប់ឃីនប្ល៊ូមបឺក (Johns Hopkins Bloomberg) អ្នកស្ម័គ្រចិត្ត ១០ នាក់ត្រូវបានផ្តល់ថ្នាំគ្រាប់ J&J កម្រិតខ្ពស់ ៥ ថ្ងៃមុនពេលត្រូវបានចាក់ជាមួយនឹងប្រភេទជំងឺគ្រុនឈាមមួយ។ ពួកគេបានបន្តលេបថ្នាំរយៈពេល ២១ ថ្ងៃក្រោយមក។
ប្រាំមួយនាក់ក្នុងចំណោម១០នាក់មិនបានបង្ហាញមេរោគគ្រុនឈាមដែលអាចរកឃើញនៅក្នុងឈាមរបស់ពួកគេទេ បន្ទាប់ពីបានប៉ះពាល់នឹងធាតុបង្កជំងឺ ក៏ដូចជាមិនមានសញ្ញាថាប្រព័ន្ធភាពស៊ាំរបស់ពួកគេបានឆ្លើយតបទៅនឹងការឆ្លងមេរោគទេក្នុងរយៈពេល ៨៥ ថ្ងៃនៃការត្រួតពិនិត្យ។
មនុស្សប្រាំនាក់នៅក្នុងក្រុម Placebo (ក្រុមដែលពុំលេបថ្នាំពិសោធន៍) ដែលត្រូវបានចាក់មេរោគគ្រុនឈាមផងដែរនោះ សុទ្ធតែបង្ហាញពីមេរោគដែលអាចរកឃើញ នៅពេលធ្វើតេស្តិ៍។ អ្នកចូលរួមការសាកល្បងបានទទួលការថែទាំតាមស្តង់ដារពីអ្នកជំនាញវេជ្ជសាស្ត្រក្នុងករណីចាំបាច់ ហើយមេរោគដែលបានប្រើគឺជាកំណែខ្សោយដើម្បីកាត់បន្ថយរោគសញ្ញា។
ក្រុមហ៊ុន J&J បាននិយាយថា ទិន្នន័យដំបូងជាវិជ្ជមាននេះគាំទ្រដល់ការសាកល្បងដំណាក់កាលទី២ នៃថ្នាំគ្រាប់នេះជាបន្ត ដើម្បីការពារជំងឺគ្រុនឈាម ៤ ប្រភេទផ្សេងគ្នានៅក្នុងតថភាពពិភពលោកពិត ដែលជំងឺនេះបានក្លាយជារឿងធម្មតា។ ជំហានបន្ទាប់នឹងធ្វើតេស្តិ៍វាជាវិធីព្យាបាលវិញម្តង។
ថ្នាំនេះដំណើរការដោយការទប់ស្កាត់សកម្មភាពនៃប្រូតេអ៊ីនមេរោគចំនួនពីរ ដោយទប់ស្កាត់មេរោគកុំឱ្យថតចម្លងខ្លួនវាបន្ថែម។ J&J បាននិយាយថា ថ្នាំនេះគឺអាចស៊ូទ្រាំបានសម្រាប់អ្នកចូលរួមសាកល្បងទាំងអស់។
សំណួរសំខាន់មួយសម្រាប់ពេលអនាគតគឺការធានាឱ្យបាននូវការទទួលបានថ្នាំថ្មីនេះ ប្រសិនបើវាមានប្រសិទ្ធភាពលើមនុស្សទ្រង់ទ្រាយធំ នៅក្នុងបណ្តាប្រទេសដែលមានចំណូលទាបនិងមធ្យម កន្លែងដែលថ្នាំនេះគឺត្រូវការបំផុត ដែលនេះជាការបន្ទរលើសំណួរដដែលអំពីបញ្ហាប្រឈមសម្រាប់វ៉ាក់សាំងការពារគ្រុនឈាម ដែល WHO បានគាំទ្រកាលពីដើមខែនេះ។
លោកវ៉ាន់លុកបាននិយាយថា “យើងកំពុងធ្វើការលើវា” ដោយបន្ថែមថា វាទើបតែជាថ្ងៃដំបូងៗប៉ុណ្ណោះ៕
