បរទេស ៖ បន្ទាប់ពីអាមេរិក សម្រេចដាក់បញ្ចូលគ្រាប់បែកចង្កោមនៅក្នុងកញ្ចប់ជំនួយយោធាចុងក្រោយបំផុតរបស់ខ្លួន ដល់ទីក្រុងកៀវ លោក Antonov បានកត់សម្គាល់ថា ទីក្រុងវ៉ាស៊ីនតោន នៅតែបន្តបង្កើនភាគហ៊ុននៅក្នុងជម្លោះនេះ ហើយហៅការញុះញង់របស់សហរដ្ឋអាមេរិកនាពេលបច្ចុប្បន្ន ថាពិតជាហួសកម្រិត ដែលនាំមនុស្សជាតិខិតទៅជិតសង្រ្គាមលោកថ្មីមួយ។
ឯកអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន លោក Anatoly Antonov បាននិយាយនៅថ្ងៃសៅរ៍ទី៨ខែកក្កដាថា សេចក្តីសម្រេចរបស់សហរដ្ឋអាមេរិក ក្នុងការដាក់បញ្ចូលគ្រាប់បែកចង្កោមនៅក្នុងកញ្ចប់ជំនួយយោធាចុងក្រោយបំផុតរបស់ខ្លួន ដល់ទីក្រុងកៀវ គឺជាការទទួលស្គាល់បរាជ័យ និងជាការប៉ុនប៉ងអស់សង្ឃឹម ដើម្បីទប់ទល់បរាជ័យ។លោក Antonov បានប្រាប់អ្នកយកព័ត៌មានថា “គ្រាប់បែកចង្កោមគឺជាកាយវិការនៃភាពអស់សង្ឃឹម។ វិធានការបែបនេះ បង្ហាញពីការដឹងខ្លួនរបស់សហរដ្ឋអាមេរិក និងសម្ព័ន្ធមិត្ត ថា ពួកគេអសមត្ថភាព។ យ៉ាងណាក្តី ពួកគេមិនចង់ទទួលស្គាល់ភាពបរាជ័យដោយផ្ទាល់នោះទេ ដូច្នេះហើយ ពួកគេទើបនាំគ្នាប្រព្រឹត្តអំពើដ៏ឆ្កួតលីលាសាជាថ្មី”។
ទន្ទឹមនោះ លោក Antonov បានកត់សម្គាល់ថា ទីក្រុងវ៉ាស៊ីនតោន នៅតែបន្តបង្កើនភាគហ៊ុននៅក្នុងជម្លោះនេះ ហើយហៅការញុះញង់របស់សហរដ្ឋអាមេរិកនាពេលបច្ចុប្បន្ន ថាពិតជាហួសកម្រិត ដែលនាំមនុស្សជាតិខិតទៅជិតសង្រ្គាមលោកថ្មីមួយ។
គួរបញ្ជាក់ថា តាមសេចក្តីប្រកាសរបស់សេតវិមាននិងមន្ទីរបញ្ចកោណ កាលពីថ្ងៃសុក្រទី៧ខែកក្កដា សហរដ្ឋអាមេរិក នឹងបញ្ជូនកញ្ចប់សព្វាវុធថ្មីទៀត ទៅឲ្យប្រទេសអ៊ុយក្រែន។
អនុរដ្ឋលេខាធិការក្រសួងការពារជាតិទទួលបន្ទុកផ្នែកគោលនយោបាយ លោក Colin Kahl បានប្រាប់អ្នកយកព័ត៌មាននៅមន្ទីរបញ្ចកោណថា ការសម្រេចចិត្តនេះ ត្រូវបានជំរុញដោយភាពបន្ទាន់ និងបំណងប្រាថ្នាដើម្បីឲ្យអ៊ុយក្រែន បន្តការប្រយុទ្ធប្រឆាំងនឹងរុស្ស៊ី៕
