«ភ្នំពេញ ៖ គ្រោះមហន្តរាយធម្មជាតិដោយបាតុភូតរន្ទះបាញ់ បានកើតឡើងជាង ៨០ លើក បណ្ដាលឲ្យមនុស្សស្លាប់-រងរបួស ៨៥ នាក់ ងាប់គោក្របី ៧១ ក្បាល និងខូចខាតផ្ទះ ៥ ខ្នង ក្នុងរយៈពេល ៦ ខែ ឆ្នាំ ២០២៣ នេះមានការកើនឡើង បើប្រៀបធៀបនឹងរយៈពេល ៦ ខែ ឆ្នាំ ២០២២ កន្លងទៅ ដែលមានអ្នកស្លាប់-របួសត្រឹមតែ ៦០ នាក់ ប៉ុណ្ណោះ។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា រយៈពេល ៦ ខែនេះ បាតុភូតរន្ទះបាញ់បានកើតឡើង ៨២ លើក បណ្ដាលឲ្យមនុស្សស្លាប់ ៤៦ នាក់ រងរបួស ៣៩ នាក់ ងាប់គោក្របី ៧១ ក្បាល និងខូចខាតផ្ទះ ៥ ខ្នង។
លោកបានបន្តថា ចំនួននេះបើប្រៀបធៀបទៅនឹងរយៈពេល ៦ ខែដូចគ្នា នៅឆ្នាំ ២០២២ កន្លងទៅ ឃើញថា មានការកើនឡើង ខណៈ ៦ ខែឆ្នាំមុន មានបាតុភូតរន្ទះបាញ់បានកើតឡើងចំនួន ៦១ លើក បណ្ដាលឲ្យមនុស្សស្លាប់ ៣២ នាក់ ស្ត្រី ៨ នាក់ រងរបួស ២៨ នាក់ ងាប់គោក្របី ៦៩ ក្បាល និងខូចខាតផ្ទះចំនួន ១១ ខ្នង។
លោកបានមានប្រសាសន៍ថា ក្នុងការទប់ស្កាត់បញ្ហារន្ទះបាញ់នេះ គណៈកម្មាធិការជាតិគ្រប់គ្រងគ្រោះមហន្តរាយ គ្រោងនឹងរៀបចំបំពាក់ឧបករណ៍ការពាររន្ទះនៅតាមតំបន់ប្រឈមមួយចំនួនដែលតែងតែកើតមាននូវបាតុភូតរន្ទះញឹកញាប់ ដើម្បីទប់ស្កាត់កុំឲ្យមនុស្សសត្វរងរបួសស្លាប់ជាបន្តទៀត ពិសេសបំពាក់នៅខេត្តចំនួន ៣ មុនគេ ដែលមានករណីរងគ្រោះច្រើនជាងគេរួមមាន ៖ ខេត្តសៀមរាប ពោធិ៍សាត់ និងខេត្តបាត់ដំបង។ ប៉ុន្តែមុននឹងឈានទៅបំពាក់ឧបករណ៍ការពាររន្ទះនេះ គណៈកម្មការជាតិគ្រោះមហន្តរាយ ត្រូវរៀបចំផែនការឲ្យបានច្បាស់លាស់ ពិសេសស្វែងរកថវិកាពីដៃគូ ក៏ដូចជាស្នើសុំថវិកាពីរាជរដ្ឋាភិបាលក្នុងការទិញឧបករណ៍ទាំងនោះ៕
