លោកចូ បៃដិន អះអាងថា លោក ពូទីន កំពុងចាញ់សង្រ្គាម នៅប្រទេសអ៊ីរ៉ាក់

បរទេស ៖ លោក ចូ បៃដិន ត្រូវបានគេសាកសួរថា តើលោក ពូទីន បានចុះទន់ខ្សោយដែរឬទេ បែរជាលោក ប្រធានាធិបតីអាមេរិក បានអះអាងថា លោក ពូទីន កំពុងចាញ់សង្រ្គាម នៅប្រទេសអ៊ីរ៉ាក់ នៅក្នុងការច្រឡំពាក្យសម្តីថ្មីមួយទៀតរបស់មេដឹកនាំអាមេរិករូបនេះ។

ប្រធានាធិបតីអាមេរិក លោក ចូ បៃដិន បាននិយាយ កាលពីថ្ងៃពុធ សប្តាហ៍នេះថា ប្រធានាធិបតីរុស្ស៉ី លោក វ៉្លាឌីមៀ ពូទីន កំពុងតែទទួលបរាជ័យក្នុងសង្រ្គាមនៅប្រទេសអ៉ីរ៉ាក់ នៅពេលដែលលោកចង់សំដៅលើអ៊ុយក្រែន។

ថ្លែងប្រាប់ក្រុមអ្នកសារព័ត៌មាន មុនពេលលោករៀបចាកចេញពីសេតវិមាន ក្នុងការធ្វើដំណើរមួយទៅកាន់ទីក្រុងឈីខាហ្គោ (Chicago) លោក បៃដិន ត្រូវបានគេសាកសួរថា តើលោក ពូទីន បានចុះទន់ខ្សោយដែរឬទេ បន្ទាប់ពីផ្ទុះព្រឹត្តិការណ៍បះបោររយៈពេលខ្លីថ្មីៗនេះ ដឹកនាំដោយមេទាហានស៊ីឈ្នួលរុស្ស៉ី Wagner ដែលកងកម្លាំងបានចូលរួម ក្នុងសង្រ្គាមឈ្លានពាននៅអ៊ុយក្រែន។