សម្តេចតេជោ ហ៊ុន សែន កោតសសើរ ការបកស្រាយរបស់ លោក ស សុខា ក្នុងករណីបុរសម្នាក់ដែលបានជួយលើក ម៉ូតូគ្រោះថ្នាក់ចរាចរណ៍ ហើយត្រូវ អ្នកសារព័ត៌មាន មួយរូប ស្តីបន្ទោស

ភ្នំពេញ ៖ សម្តេចតេជោហ៊ុនសែន នាយករដ្ឋមន្ត្រី នៃ ព្រះរាជាណាចក្រកម្ពុជា បានចូលទៅខមិននិងស៊ែ ខ្លឹមសារ របស់លោក ស សុខា រដ្ឋលេខាធិកាក្រសួងអប់រំយុវជននិងកីឡា ជា តំណាងរាស្រ្តខេត្តព្រៃវែង ដែលបាន សសេរសារបកស្រាយ៤ចំណុច នៃរឿងបុរសម្នាក់ដែលមានសន្តានចិត្ត ទៅជួយលើកម៉ូតូ អ្នកគ្រោះថ្នាក់ចរាចរណ៌ បែរជាត្រូវអ្នកសារព័ត៌មាន មួយរូបស្តីបន្ទោសទៅវិញ។
សូមរំលឹកថា កាលពីយប់ថ្ងៃទី២៣ ខែមករា មានហេតុការណ៏ គ្រោះថ្នាក់ចរាចរណ៏ មួយបានកើតឡើងរវាង ម៉ូតូនិងរឺម៉កកងបី បានកើតឡើងនៅលើស្ពានជ្រោយចង្វារ ខណះ អ្នកព័ត៌មាន កំពុងថតឡាយ ពីសកម្មភាព នោះគេឃើញ បុរសម្នាក់ ជិះម៉ូតូ ឌុបប្រពន្ធកូន ឆ្លងកាត់ ផ្លូវនោះបានឃើញ មានអាណិតអាសូរ ខ្លាចក្រែងមានរថយន្ត បើកមកមើលមិនឃើញ បង្កជាកិនពីលើបន្ថែមទៀតគាត់ក៏បាន ចុះទៅជួយលើកម៉ូតូ អែបគៀន ក្នុងបំណងជួយគ្នា ក្នុងគ្រាអាសន្ន ប៉ុន្តែខណះនោះក៏ស្រាប់តែ អ្នកសារព័ត៌មានល្បីឈ្មោះ មួយរូបបាន ចេញមកឡាយបងស្តីបន្ទោសផង ទៅលើបុរសម្នាក់នោះ រហូតដល់ឲ្យគ្នាសុំទោស គ្នាសុំទោស ហើយ ហាក់មិនព្រមទៅទៀត ដោយប្រើសម្តីសម្តៅ ហាក់មិនសមជាអ្នកសារព័ត៌មាន នោះឡើយ ព្រោះថា អ្នកសារព័ត៌មាន មិនមែនតុលាការ រឺសមត្ថកិច្ចនោះទេគ្រាន់តែជាអ្នកផ្តល់ដំណឹង ឲ្យមហាជនបានដឹងប៉ុណ្ណោះ។ រូបភាពនៃសកម្មភាព នោះត្រូវបានអង្គភាពសាមី របស់ ខ្លួនយកទៅផុស ឡើងព្រោងព្រាត ប៉ុន្តែ សកម្មភាពនោះមិនត្រូវបាន មហាជន គាំទ្រឡើយមានតែរិះគន់ ក្រោយមកក៏សម្រេចលុបចេញវិញ។
ក្រោយពីមានការ ផ្ទុះការរិះគន់ទៅលើអ្នកកាសែត មួយរូបដែលបានធ្វើលើសពីតួនាទី លោក ស សុខា រដ្ឋលេខាធិកាក្រសួងអប់រំយុវជននិងកីឡា ជា តំណាងរាស្រ្តខេត្តព្រៃវែង រួមនិងថ្នាក់ដឹកនាំ មួយចំនួន ទៀតបានចេញប្រតិម្មជាហូរហែទៅលើ អ្នកសារព័ត៌មាន រូបនោះថាធ្វើលើសតួនាទី។ ក្នុងសំណេររបស់ លោក ស សុខា អបដោយរូបភាពវិដេអូ ផងដែរ នោះ លោក ខា ចំនួន ៤ ចំណុច នៃរឿងបុរសម្នាក់ដែលមានសន្តានចិត្ត ទៅជួយលើកម៉ូតូ អ្នកគ្រោះថ្នាក់ចរាចរណ៌ ។ បន្ទាប់មក សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចូលទៅ ខមិន និងស៊ែខ្លឹមសារនោះ ចូលទៅគណនីរបស់សម្តេច ដែលមានខ្លឹមសារទាំងស្រុងថា «គាំទ្រការបកស្រាយនិងពន្យល់របស់ក្មួយ
ស សុខា។ ត្រូវជួយគ្នាជាមុនទើបបញ្ជៀសបាននូវបញ្ហាកាន់តែធំ។ខ្ញុំសូមអរគុណនិងកោតសរសើរចំពោះអ្នកបានជួយដែលនេះជាវប្បធម៍ដ៍ល្អនៃជាតិសាសន៍យើង» ។បន្ទាប់សម្តេច តេជោ លោកបានចលខមិន លោក ស សុខា បានចូល ខមិនតបមានខ្លឹមសារថា« Hun Sen 🙏🙏🙏 ក្មួយសូមគោរពថ្លែងអំណរគុណដ៏ខ្ពង់ខ្ពស់បំផុតចំពោះប្រសាសន៍ពោរពេញដោយអត្ថន័យដ៏ជ្រាលជ្រៅបំផុតរបស់សម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជា។ ជាពិសេស បំផុសស្មារតី«វប្បធម៌ជួយគ្នា»ក្នុងនាមជាតិសាសន៍ខ្មែរ។ សូមសម្ដេចតេជោ មេត្តាទទួលនូវសេចក្ដីគោរពដ៏ខ្ពង់ខ្ពស់បំផុតពីក្មួយ»។
ខាងក្រោមនេះជា សំណេរ ៤ចំណុចរបស់ លោក ស សុខា មានខ្លឹមសារទាំងស្រុងថា មកដល់ពេលនេះប្រធានបទលើកម៉ូតូដួលក្នុងករណីគ្រោះថ្នាក់ចរាចរណ៍លើស្ពានជ្រោយចង្វា នៅតែបន្តជជែកគ្នាទាំងស្រប និងប្រឆាំង។ តាមការកត់សម្គាល់ ខ្ញុំឃើញមតិប្រឆាំងនឹងជំហររបស់អ្នក Liveផ្ទាល់ច្រើនជាងការគាំទ្រ។ ក្នុងនាមប្រជាពលរដ្ឋម្នាក់ ខ្ញុំក៏សូមបញ្ចេញមតិខ្លះៗដែរ។

ទី១.យើងថា បងប្រុសដែលឃើញម៉ូតូដួល ហើយគាត់ស្ទុះទៅជួយលើកខុសក៏អាចថាបាន។ តែយើងគួរគិត ឬរកឱ្យឃើញជាមុនថា តើគាត់មានចេតនាបែបណា? ទិដ្ឋភាពនៅកន្លែងកើតហេតុ ដែលគាត់ស្ទុះទៅលើកនោះក្នុងស្ថានភាពដូចម្ដេច និងកាយវិការរបស់គាត់មានទម្រង់ប្រឆាំងនឹងសមត្ថកិច្ចជំនាញឬយ៉ាងណា? តាមខ្ញុំយល់ ពេលដែលគាត់កំពុងបើកម៉ូតូឌុបប្រពន្ធបីកូនតូចនៅនឹងដៃ អារម្មណ៍គាត់អាចត្រឹមតែគិតថា អ្នករងគ្រោះបើកដួលខ្លួនឯងដោយយថាហេតុណាមួយ ដោយគាត់ខ្លាចឡាននិងម៉ូតូផ្សេងៗមកបុកបន្ថែមពីលើជាដើម។ ខ្ញុំថា បើយើងបន្ទោសឬដាក់កំហុសលើគាត់ ហាក់ដូចជាយើងនាំគ្នាបំផុសឬលើកទឹកចិត្តឱ្យបោះបង់វប្បធម៌ជួយយកអាសាគ្នាទៅវិញ។ ជារួម ក្នុងស្ថានភាពនោះបើសិនជាយើងវិញ យើងក្ដី មហាជនក្ដី គិត ឬមើលឃើញថាជាករណីដួលដោយខ្លួនឯង ដែលគួរចុះជួយជាដើម។
ទី២.ជាការពិត រឿងជំនាញវាស់វែងរបស់នគរបាលចរាចរណ៍ជារឿងត្រឹមត្រូវ ដែលត្រូវវាស់វែងគូសគំនូសសម្គាល់ទីតាំងយានបង្កនិងយានរងគ្រោះ ដើម្បីកំណត់ថាភាគីណាខុសភាគីណាត្រូវ។ ប៉ុន្តែយើងក៏ដាក់ជាសំណួរដែរថា តើពេលនោះបងប្រុសដែលលើកម៉ូតូនោះបានឃើញវត្តមាននគរបាលចរាចរណ៍ដែរទេ? ដូចខ្ញុំលើកឡើងខាងលើ ប្រហែលជាពេលនោះ គាត់មិនបានឃើញនគរបាលចរាចរណ៍មានវត្តមាននៅទីនោះ និងឃើញសភាពធម្មតា ដែលគាត់មិនអាចបើកហួស ឬឃើញស្លាប់មិនជួយនោះទេ។ តែខ្ញុំមិនសន្មតថា ពេលនោះគ្មានវត្តមាននគរបាលចរាចរណ៍នោះឡើយ។ ដូច្នេះ ការដែលពុំបានដឹង ពុំបានឃើញ ហើយមានបំណងយកអាសាគ្នា ខ្ញុំថា ជារឿងល្អទៅវិញ។ ក្រៅតែពីការវាស់វែងបាញ់គំនូស នៅមានធម្យោបាយច្រើនទៀតដែលអាចប្រមូល និងបង្ហាញភស្ដុតាងបាន ដូចជា កាមេរ៉ាសុវត្ថិភាពនៅកន្លែងកើតហេតុបើសិនជាមាន, ស្លាកស្នាមនៅកន្លែងកើតហេតុ, ចម្លើយរបស់ភាគី, អ្នកឃើញហេតុការណ៍ និងវីដេអូ ដែលអ្នក Live បានទៅដល់មុនគេនោះ…សុទ្ធតែអាចយកធ្វើជាមូលដ្ឋានបាន។
ទី៣.ចំពោះអ្នក Live ផ្ទាល់វិញ ជាការយល់តិចតួចរបស់ខ្ញុំ យើងគប្បីប្រកាន់យកតួនាទី ក្រមសីលធម៌វិជ្ជាជីវៈក្នុងនាមអ្នកសារព័ត៌មានអាជីពស្របច្បាប់។ ពោលគឺ ផ្ដល់ព័ត៌មានពិតទាន់ហេតុការណ៍ និងតាមព្រឹត្តិការណ៍ជាក់ស្ដែង ដោយពុំអាចដើរតួជាសមត្ថកិច្ច ឬឈ្លោះប្រកែកវែកញែកតឹងសរសៃកដាក់ជាមួយនរណាម្នាក់នោះឡើយ។ ក្នុងនោះ ក្នុងនាមអ្នកសារព័ត៌មាន មានតួនាទីផ្ដល់ព័ត៌មានគ្រប់ជ្រុងជ្រោយឱ្យអ្នកទស្សនាបានដឹង និងថ្លឹងថ្លែងតាមរយៈការអត្ថាធិប្បាយហេតុការណ៍ដែលខ្លួនឃើញពិត, សម្ភាសភាគីទាំងសងខាង, សម្ភាសអ្នកឃើញហេតុការណ៍, សម្ភាសសមត្ថកិច្ច, សម្ភាសបងប្រុសដែលស្ទុះទៅលើកម៉ូតូដួលនោះ…។ ម្យ៉ាងវិញទៀត បើយើងចង់ផ្ញើសារជូនមហាជនថា ការលើកយានករណីបែបនេះ បណ្ដាលឱ្យប៉ះពាល់ដល់ជំនាញ ឬបាត់ដានក្នុងការរកអ្នកខុសអ្នកត្រូវ គប្បីបង្វែរសំណួរទៅសួរសមត្ថកិច្ចជំនាញដែលមានវត្តមាននៅទីនោះឱ្យលោកពន្យល់វិញ។ ចៀសវាងយើងនៅតែតាមថត តាមលើកហេតុផល តាមពន្យល់បងប្រុសអ្នកលើកម៉ូតូឥតឈប់ ក្នុងខណៈពេលគាត់បានលើកដៃសូមទោសនិងបញ្ជាក់ពីចេតនាសុចរិតរបស់គាត់ម្ដងហើយម្ដងទៀត។
ទី៤.សរុបសេចក្ដីទៅ គួរលើកកម្ពស់ឬបំផុសវប្បធម៌ជួយគ្នា។ ក្នុងករណីដែលការជួយណាមួយដោយស្មោះ តែខុសពីជំនាញរបស់សមត្ថកិច្ច ហើយគ្នាសូមទោស គួរកុំដេញដោលបន្ត។ តាមខ្ញុំមើលវីដេអូ ខ្ញុំឃើញគាត់លើកដៃសុំទោស៤-១០ដង និងដោយចិត្តស្មោះ។ អ៊ីចឹង រឿងហួសហើយ ឱ្យវាហួសទៅ តើឱ្យបកក្រោយយ៉ាងម៉ិចនឹងកើត។ មែនទែនទៅ ខ្ញុំមិនកាត់សេចក្ដីអីទេ តែតាមវីដេអូ ភាគីខាងអ្នក Live ទៅវិញទេ ដែលសង្ខើញនិងតឹងសរសៃក ចំណែកខាងបងប្រុសលើកម៉ូតូគាត់ព្យាយាមពន្យល់អំពីចេតនាសុចរិតរបស់គាត់ដោយសម្ដីសម្ដៅនិងកាយសមទំនង។ ចំពោះសមត្ថកិច្ចជំនាញ ករណីទទួលព័ត៌មានគួរស្រូតចុះសម្របសម្រួលអន្តរាគមន៍កន្លែងកើតហេតុធ្វើការតាមជំនាញឱ្យលឿនតាមដែលអាចធ្វើបាន ហើយបើអាចធ្វើបានទៀតនោះ គួរការពារឬហ៊ុព័ទ្ធកន្លែងកើតហេតុជាដើម។ ក្នុងនាមអ្នកសារព័ត៌មានគប្បីបំពេញភារកិច្ចរបស់ខ្លួនស្របតាមច្បាប់ ជំនាញ ក្រមសីលធម៌វិជ្ជាជីវៈ កុំឱ្យហួសដែនសមត្ថកិច្ច។ ខ្ញុំគាំទ្រចំពោះការជួយយកអាសាគ្នា តែដើម្បីការពារខ្លួន សូមបងប្អូនពិនិត្យតាមសភាពជាក់ស្ដែង ចៀសវាសធ្វើគុណបានទោស។ យើងគប្បីឈ្វេងយល់ពីគ្នា និងឈានទៅយោគយល់គ្នាតាមរយៈហេតុផល កុំចង់ចាញ់ចង់ឈ្នះគ្នា ឬធ្វើដើម្បីផលប្រយោជន៍ណាមួយ។ ទោះយ៉ាងណា យើងត្រូវរួមគ្នាផ្សព្វផ្សាយវប្បធម៌ជួយគ្នា!៕