ភ្នំពេញ ៖ បន្ទាប៉ពីប្រទេសកូរ៉េខាងជើងបានបិទចោលនូវបណ្តាញទំនាក់ទំនងទាំងអស់ជាមួយប្រទេសកូរ៉េខាងត្បូងកាលពីឆ្នាំមុន ពេលនេះអ្នកនាំពាក្យក្រសួងបង្រួបបង្រួមជាតិកូរ៉េខាងត្បូងបានប្រាប់ក្រុមអ្នកសារព័ត៌មានកាលពីថ្ងៃអង្គារថា បណ្តាញទំនាក់ទំនងអន្តរកូរ៉េត្រូវតែស្តារឡើងវិញភ្លាមៗដោយគ្មានលក្ខខ័ណ្ឌ។
មន្ត្រីរូបនោះបានគូសបញ្ជាក់ថា «បណ្តាញទំនាក់ទំនង គឺជាមធ្យោបាយនៃការប្រាស្រ័យទាក់ទងដ៏សំខាន់បំផុត ហើយប្រទេសកូរ៉េទាំងពីរបានព្រមព្រៀងគ្នាម្តងហើយម្តងទៀតដើម្បីថែរក្សាបណ្តាញទំនាក់ទំនងទាំងនេះ»។
ដោយចាប់ផ្តើមពីថ្ងៃទី ៩ខែមិថុនា កាលពីឆ្នាំមុន ប្រទេសកូរ៉េខាងជើងបានបិទចោលនូវបណ្តាញទំនាក់ទំនងទាំងអស់ជាមួយប្រទេសកូរ៉េខាងត្បូង ដែលជាការឆ្លើយតបទៅនឹងការបង្ហោះប៉ោងប៉ោងឆ្លងកាត់ព្រំដែនដោយគ្មានការអនុញ្ញាតជាមួយខិត្តប័ណ្ណឃោសនាប្រឆាំងនឹងរដ្ឋាភិបាលកូរ៉េខាងជើង។
ទីក្រុងព្យុងយ៉ាងបានចាត់ទុកសកម្មភាពទាំងនេះថា ជាសកម្មភាពអរិភាពដែលរំលោភបំពានទៅលើកិច្ចព្រមព្រៀងសន្តិភាព។ ជាការឆ្លើយតប ប្រទេសកូរ៉េខាងជើងបានកាត់ផ្តាច់ទូរស័ព្ទទំនាក់ទំនងទាំងអស់នៅក្នុងការិយាល័យទំនាក់ទំនងអន្តរកូរ៉េជាអចិន្ត្រៃយ៍ រួមទាំងបណ្តាញទំនាក់ទំនងរវាងយោធា និងបណ្តាញទូរស័ព្ទបន្ទាន់រវាងប្រធានាធិបតីកូរ៉េខាងត្បូង និងគណៈកម្មាធិការកណ្តាលគណបក្សពលករកូរ៉េខាងជើង។ ក្រោយមក ទីក្រុងព្យុងយ៉ាងបានបំផ្ទុះកម្ទេចអាគារមួយនៅក្នុងទីក្រុងព្រំដែន Kaesong ដែលមានការិយាល័យទំនាក់ទំនងអន្តរកូរ៉េនៅទីនោះ។
ចាប់តាំងពីពេលនោះមក ប្រទេសកូរ៉េខាងជើងមិនបានឆ្លើយតបទៅនឹងសំណើរបស់ប្រទេសកូរ៉េខាងត្បូងសម្រាប់កិច្ចចរចារ ឬការស្តារកិច្ចសហប្រតិបត្តិការឡើងវិញណាមួយនោះទេ៕ (ប្រភព TASS)
