អេ អាំម៉ារីនភូថង​​ និងស្នងតំណែងឪពុនអាចនឹង​ខ្វះ​ដៃ​គូ​ប្រកួត​ក្នុង​ស្រុក​​រយៈ​ពេល​២​ឬ​៣​ឆ្នាំ​ខាង​មុខ​នេះ​ទៀត

0
290

ភ្នំពេញ ៖ ស្លឹកឈើជ្រុះមិនឆ្ងាយពីគល់ កីឡាករ​លេច​ធ្លោ​ក្នុង​ពិភព​ប្រដាល់​គុន​ខ្មែរ​ នាពេលបច្ចប្បន្ន អេ អាំម៉ារីន ភូថង​​ នឹង​ខ្វះ​ដៃ​គូ​ប្រកួត​ក្នុង​ស្រុក​នៅ​ក្នុង​រយៈ​ពេល​២​ឬ​៣​ឆ្នាំ​ខាង​មុខ​នេះ​ទៀត​ ប៉ុន្តែ​អាច​នឹង​លេច​ធ្លោ​ខ្លាំង​ក្នុង​ការ​ប្រកួត​លក្ខណៈ​អន្តរជាតិ​ ប្រសិន​បើ​ស្ថាភាព​ខូវិត-១៩ស្ងប់​ស្ងាត់ ដោយមានកីឡាករគុនអន្តរជាតិបានចេញចូលមកប្រកួតនៅស្រុកខ្មែរ និងកីឡាករកម្ពុជាអាចចេញទៅប្រកួតនាក្រៅប្រទេសដូចមុននោះ។

កីឡាករ​ អេ អាំម៉ារីនភូថង​ ដែល​ជា​កូន​ប្រុស​បង្កើត​របស់​អតីត​អធិរាជ​កែង​ឆេះ​ ជង្គង់​ហោះ​ អេ ភូថង ទើប​តែ​មាន​អាយុ​១៦​ឆ្នាំ​ប៉ុណ្ណោះ​ ប៉ុន្តែ​មាន​កម្ពស់​រហូតប​ដល់​១.៧៨​ម៉ែត្រ ទៅហើយដែលមានរាងកាយអំណោយផលដល់ការប្រកួតគុនខ្មែរមែនទែន។ គិត​រហូត​ដល់​នេះ​ អាំម៉ារីនភូថង បាន​ឆ្លង​កាត់​លើ​សង្វៀន​ប្រហែល​ជា​៤០​ដង ហើយ​ភាគ​ច្រើន​ទទួល​បាន​ជ័យជម្នះ។ ដោយ​សារ​អំណោយ​ផល​ខាង​កម្ពស់​ រូប​គេ​មាន​ប្រៀប​លើ​ដៃ​គូ​តាម​រយៈ​ការ​ប្រើ​ជង្គង់​ដែល​ជា​អាវុធ​គ្រោះ​ថ្នាក់​បំផុត។ ក្រៅ​ពី​អាវុធ​ជង្គង់​ដ៏​មាន​ប្រសិទ្ធភាព​ អេ អាំម៉ារីនភូថង ក៏​អាច​ទាត់​បាន​ល្អ​ និង​ចេញ​កណ្តាប់​ដៃ​បាន​ល្អ​ផង​ដែរ។

កីឡាករ​វ័យ​ក្មេង​រូប​នេះ​បាន​យក​ឈ្នះ​អស់​ហើយ​កីឡាករ​ដែល​មាន​វ័យ​ស្របា​គ្នា ដូច្នេះ​ស្ទើរ​គ្មាន​ដៃ​គូក្នុង​ស្រុកស្រករ​គ្នា​ដែល​ត្រូវ​បាន​ផ្គូផ្គង​ឲ្យ​ប្រកួត​ជា​មួយ​រូប​គេ​ទៀត​ទេ​ ពី​ព្រោះ​ចាញ់​ដាច់់​ទាំង​កាយ​សម្បទា​ និង​សមត្ថភាព។ ដូច្នេះ​ហើយ​ទើប​បាន​ជា​អ្នក​ផ្គូផ្គង​គូ​ប្រកួត​បាន​រៀប​ចំ​ឲ្យ​រូប​គេ​ជួប​ប្រកួត​ជា​មួយ​ដៃ​គូ​ភាគ​ច្រើន​ជា​កីឡាករ​រៀម​ច្បង​ និង​សមត្ថភាព​ខ្ពស់​ទើប​អាច​ទប់​ទល់​ជា​មួយ​កូន​ប្រុស​អធិរាជ​ អេ ភូថង​បាន។

រហូត​មក​ដល់​ពេល​នេះ​ អេ អាំម៉ារីនភូថង បាន​ជួប​ប្រកួត​ជា​មួយ​ដៃ​គូ​រៀម​ច្បង​ និង​ល្បី​ៗ​ជា​ច្រើន​នាក់​ហើយ​ដែល​ក្នុង​នោះ​មាន​ឈ្នះ​ និង​មាន​ចាញ់។ ដៃ​គូ​ជា​រៀម​ច្បង​ជា​ច្រើន​ដូច​ជា​ បឹត សង្ឃឹម, លាភ រដ្ឋា, ចាន់ ស៊ីណាត, ឡុង ខេត្ត, ឆួន បួន, យុគ យក្សផ្លែ, ស៊ន រ៉ាគីម, ឃួន​ ឡាំងកូស៊ីន, ពុទ្ធ ម៉ាណូយ, ម៉ន សាម៉េត, ឡុង រ៉ាមី, ជី ឆៃលី និង​អ្នក​លេង​ខ្មែរ​ជា​ច្រើន​នាក់​ទៀត។ ជា​ពិសេស​រូប​គេ​ក៏​ធ្លាប់​ប្រកួត​ជា​មួយ​កីឡាករ​បរទេស​ដូច​ជា​ថៃ​ បារាំង និង​អ៊ឺរ៉ង់​ជា​ដើមដែលលទ្ធផលគូឲ្យសសើរដល់កីឡាករវ័យក្មេងដែលទើបនិងឡើងកូដខ្លាំងនេះ។

ការប្រកួតឡើងជាលំដាប់មកកីឡាករអេ អាំម៉ារីនភូថង ត្រូវបានអ្នកស្នេហាវិស័យកីឡាប្រដល់លើកឡើងថា ប្រហែល​ជា​ពីរ​ឬ​បី​ឆ្នាំ​ខាង​មុខ​ទៀត កាយ​សម្បទា​របស់​គេ​កាន់​តែ​រឹង​មាំ​ មាន​សាច់​ដុំ​ និង​កម្ពស់​កាន់​តែ​ឡើង​ នោះ​ប្រាកដ​ណាស់​ទាំង​អាវុធ​ និង​កម្លាំង​ស៊ុហ្វ​ពិត​ជា​ខ្លាំង​ ដូច្នេះ​ពិត​ជា​ពិបាក​រក​ដៃ​គូ​ប្រកួត​ក្នុង​ស្រុក​ណាស់។ យ៉ាង​ណា អេ អាំម៉ារីនភូថង អាច​​នឹង​ក្លាយ​ជា​អ្នក​លេង​គុន​ខ្មែរ​ដែល​លេច​ធ្លោ​លើ​ឆាក​អន្តរជាតិ​ ប្រសិន​បើ​ត្រូវ​បាន​បណ្តុះ​បណ្តាល​ និង​រៀប​ចំ​ឲ្យ​មាន​ការ​ប្រកួត​លើ​ឆាក​អន្តរជាតិ​ច្រើន ខណៈ​ពេល​រូប​គេ​មាន​បទ​ពិសោធ​ជោកជាំ​តាំង​ពី​វ័យ​ក្មេង​ស្រាប់ទៅ​ហើយនោះ៕

Facebook Comments
Loading...