ភ្នំពេញ ៖ គិតត្រឹមព្រឹកថ្ងៃទី២៨ ខែមីនា ឆ្នាំ២០២០នេះ កម្ពុជា បានរកឃើញអ្នកឆ្លងជំងឺកូវីដ១៩ចំនួន៤នាក់បន្ថែមទៀត ធ្វើឲ្យអ្នកឆ្លងជំងឺនេះ ទូទាំងប្រទេសកើនឡើងដល់១០២នាក់ និងជាសះស្បើយសរុប១៣នាក់។ ចំណែកអ្នកកំពុងសម្រាកព្យាបាលនៅមន្ទីរពេទ្យមានចំនួនសរុប៨៩នាក់ ដោយយហេតុថា អ្នកជាសះស្បើយនោះ ត្រូវបានអនុញ្ញាតឲ្យត្រឡប់ទៅលំនៅឋានវិញអស់ហើយ។
បើយោងតាមសេចក្ដីជូនព័ត៌មានរបស់ក្រសួងសុខាភិបាល ចុះថ្ងៃទី២៨ ខែមីនា ឆ្នាំ២០២០ គ្រួសារមួយនៅភ្នំពេញ ដែលជនជាតិខ្មែរ បានធ្វើដំណើរទៅប្រទេសបារាំង ហើយពេលត្រឡប់មកវិញ ត្រូវបានរកឃើញថា មានឆ្លងជំងឺកូវីដ១៩ទាំង៤នាក់តែម្ដង។
សេចក្ដីជូនព័ត៌មាននេះ បានបញ្ជាក់ថា គ្រួសារមួយនៅរាជធានីភ្នំពេញ ដែលរកឃើញមានផ្ទុកវីរុសកូវីដ១៩នោះ រួមមាន បុរសអាយុ៦២ឆ្នាំ(ជាឪពុក) ស្ត្រីអាយុ៦១ឆ្នាំ(ជាម្ដាយ) បុរសអាយុ៣៩ឆ្នាំ (ជាកូន) និងស្ត្រីអាយុ៣៧ឆ្នាំ (ជាកូន)។ បច្ចុប្បន្ន ពួកគាត់ត្រូវបានដាក់ឲ្យសម្រាកព្យាបាលនៅមណ្ឌលសុខភាពចាក់អង្រែក្រោម រាជធានីភ្នំពេញ៕
