ភ្នំពេញ ៖ ក្មេងប្រុសពីរនាក់បងប្អូនជីដូនមួយអាយុ៦ឆ្នាំ និងអាយុ៧ឆ្នាំបានលង់ទឹក ស្លាប់បាត់បង់អាយុជីវិតទាំងពីរនាក់ កាលពីវេលាម៉ោងប្រមាណជា១៣ និង០០នាទីរសៀល ថ្ងៃទី១៦ ខែមីនា ឆ្នាំ២០២០ នៅចំណុចរណ្តៅដីជីកខាងកើតភូមិ ស្ថិតក្នុងភូមិសំរោងកណ្តាល សង្កាត់សំរោង ខណ្ឌព្រែកព្នៅ រាជធានីភ្នំពេញ។
ប៉ូលិសមូលដ្ឋានបានឲ្យដឹងថាក្មេងប្រុសទាំងពីរនាក់ដែលលង់ទឹកស្លាប់នេះទី១ឈ្មោះឆេង ភានិត អាយុ៧ឆ្នាំ ម្តាយឈ្មោះឡូយ សាវិន មុខរបរកម្មការិនីរោងចក្រ ចំណែកឪពុកឈ្មោះមឿង ឆេង មុខរបរកម្មករសំណង់ ក្មេងរងគ្រោះទី២ឈ្មោះស៊ុយ ប៊ុនថេង អាយុ៦ឆ្នាំ ម្តាយឈ្មោះមឿង សុខគា មុខរបរមេផ្ទះ និងឪពុកឈ្មោះសាំង វុទ្ធី កម្មករសំណង់ មានទីលំនៅភូមិកើតហេតុខាងលើ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុក្មេងរងគ្រោះទាំង២នាក់បាននាំគ្នាដើរលេង ជាមួយក្មេងប្រុសម្នាក់ទៀតម៉ោងប្រមាណជា១០ព្រឹកថ្ងៃទី១៦មីនា ហើយក៍បាត់រហូត ឪពុកនិងបងក្មេងប្រុសរងគ្រោះខាងលើ បានដើរកដែរតែរកមិនឃើញ លុះដល់ម៉ោងប្រមាណជា១៣ថ្ងៃត្រង់ បងប្រុសក្មេងរងគ្រោះក៍បានប្រទះឃើញសពក្មេងប្រុសអាយុ៦ឆ្នាំអណ្តែត ក្នុងរណ្តៅដីជីកភ្លាមៗនោះ ឪពុកក្មេងរងគ្រោះចុះរៀវរក ហើយក៍បានឃើញក្មេងរងគ្រោះអាយុ៧ឆ្នាំម្នាក់ទៀត នៅក្នុងលុងទឹករណ្តៅដីជីកនោះផងដែរ។
ក្រោយកើតហេតុសមត្ថកិច្ចជំនាញ ចុះបានពិនិត្យ កុមារជនរងគ្រោះទាំង២នាក់ ពិតជាស្លាប់ដោយមូលហេតុ លុងទឹករណ្តៅដីជីកប្រាកដមែន ហើយសាកសពបានប្រគល់ជូនក្រុមគ្រួសារធ្វើបុណ្យតាមប្រពៃណី៕
