ភ្នំពេញ ៖ កីឡាករដែលកំពុងមានប្រជាប្រិយខ្លាំង វង្ស វិឆ័យ អ្នកប្រដាល់របស់ក្លិបកងពលតូចទ័ពពិសេសឆត្រយោង៩១១ ឡើងជួបកីឡាករមកពីប្រទេសអ៊ីរ៉ង់Amiri MiKaeil ខណៈកីឡាករអេ ណារ័ត្រ អ្នកប្រដាល់នៃក្លិបអេភូថងកីឡា និងកីឡាករខាំ ខ្លានាង ជួបកីឡាករថៃឃុនភុនណយ ស៊ីសំអាង និងកីឡាកររុងវិធិយ៉ា ស៊ីត.លួងពូឧដុម នៅលើសង្វៀនស៊ីអិនស៊ី នាថ្ងៃសៅរ៍ទី២៣ ខែកុម្ភៈ ឆ្នាំ២០២០។
កីឡាករវង្ស វិឆ័យ ត្រូវជួបកីឡាករមកពីប្រទេសអ៊ីរ៉ង់Amiri MiKaeil ក្នុងប្រភេទម្ងន់៦៩គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក នៅសង្វៀននេះ។ បើទោះបីជា វង្ស វិឆ័យ មិនធ្លាប់ជួបកីឡាករអ៊ីរ៉ង់Amiri MiKaeil ម្នាក់នេះក៍ពិតមែនតែការប្រកួតនេះត្រូវបានអ្នកតាមដានកីឡាលើកឡើងថា វង្ស វិឆ័យ មានភាគរយឈ្នះច្រើនលើកីឡាករអ៊ឺរ៉ង់ ព្រោះបច្ចប្បន្នកីឡាករកម្ពុជាម្នាក់នេះកំពុងឡើងកូដ វាយកម្រចាញ់គូប្រកួតណាស់ ពិសេសជួបជាមួយកីឡាករថៃ។ ចាំមើលវង្ស វិឆ័យ អាចយកឈ្នះលើកីឡាករអ៊ីរ៉ង់Amiri MiKaeil បានដូចការលើកឡើងរបស់អ្នកតាមដានដែរឬយ៉ាងណា?។
ចំណែកកីឡាករអេ ណារ័ត្ន ត្រូវជួបជាមួយកីឡាករថៃឃុនភុនណយ ស៊ីសំអាង ក្នុងប្រភេទទម្ងន់៥៧គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ហើយមិនទាន់ដឹងថាកីឡាករថៃម្នាក់នេះមានវិជ្ជាគុនខ្លាំងប៉ុណ្ណានោះទេ តែបើតាមកីឡាករថៃដែលមកប្រកួតនៅស្រុកខ្មែរកន្លងមក ពួកគេពូកែខាងស្នៀតជើងទាត់កាត់ ជង្គង់ និងស្នៀតកាច់ផ្តួល។ចំណែកអ្នកប្រដាល់គុនខ្មែរវ័យក្មេងអេ ណារ័ត្ន ដែលកំពុងមានឈ្មោះបោះសំឡេង មួយរូប នាបច្ចប្បន្ននេះ រូបគេខ្លាំងខាងកណ្តាប់ដៃ និងជង្គង់ ហើយការវាយរល់លើរូបគេមិនត្រូវការ ស្ទាបស្ទង់ដៃគូច្រើននោះទេ ដ្បិតទម្លាប់របស់គេឡើងរេញគឺ ចូលបុកវាយមិនរាថយ ទោះបីលទ្ធផល ឈ្នះឬ ចាញ់ បែបណាក្ដី។ ចាំមើលរវាងអេ ណារ័ត្ន និងកីឡាករថៃឃុនភុនណយ ស៊ីសំអាង នរណាជាអ្នកឈ្នះ?។
ដោយឡែកកីឡាករស្រករក្រោយខាំ ខ្លានាង គេនិងត្រូវជួបប្រកួតជាមួយអ្នកប្រដាល់ថៃឈ្មោះរុងវិធិយ៉ា ស៊ីត.លួងពូឧដុម ក្នុងប្រភេទទម្ងន់៥១គីឡូក្រាម ដែលកីឡាករថៃម្នាក់នេះក៍ធ្លាប់មកប្រកួតនៅសង្វៀនប្រទេសកម្ពុជា ជាច្រើនដងផងដែរមានឈ្នះមានចាញ់ ជាមួយកីឡាករលំដាប់ៗរបស់កម្ពុជា។
ខាំ ខ្លានាង គេក៏ជាអ្នកប្រដាល់ជើងខ្លាំងមួយរូប ក្នុងចំណោមអ្នកប្រដាល់ស្រករក្រោយដូចគ្នា ដែលអ្នកតាមដានកីឡាប្រដាល់កម្ពុជាកំពុងតែចាប់អារម្មណ៍ចំពោះស្នៀតគុនរបស់កីឡាកររូបនេះ ដែលឡើងប្រកួតម្តងៗធ្វើឲ្យអ្នកទស្សនាជក់ចិត្តជាខ្លាំងនោះ។ ជាមួយនិងស្នៀតខ្លាំងទាំងដៃទាំងជើងនិងកែង បានធ្វើឲ្យកីឡាករខាំ ខ្លានាង ផ្តួលដៃគូជាបន្តបន្ទាប់ទាំងកីឡាករជើងចាស់ និងកីឡាករជើងថ្មីហើយបានធ្វើឲ្យរូបគេឡើងប្រកួតឈានដល់គូឯក និងប្រកួតលក្ខណៈមិត្តភាពអន្តរជាតិ។ ចាំមើលរវាងខាំ ខ្លានាង និងកីឡាករថៃរុងវិធិយ៉ា ស៊ីត.លួងពូឧដុម នេះនរណាជាអ្នកឈ្នះ?៕
