ភ្នំពេញ ៖ សមត្ថកិច្ចនគរបាលខណ្ឌពោធិ៍សែនជ័យ ស្រាវជ្រាវ ឈានដល់ការចុះចាប់ខ្លួនជនសង្ស័យ៣នាក់ ក្នុងនោះមានស្រីម្នាក់ ដល់បន្ទប់ស្នាក់នៅរបស់ពួកគេ កាលពីវេលាម៉ោង១២ថ្ងៃត្រង់ ថ្ងៃទី១៣ ខែកុម្ភៈ ឆ្នាំ២០២០ ស្ថិតនៅបន្ទប់ជួល ក្នុងភូមិទូលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ប៉ូលិសបានឲ្យដឹងថា ជនសង្ស័យ ដែលត្រូវចាប់ខ្លួន ទី.១ ឈ្មោះ គង់ ម៉េងលាង ភេទប្រុស អាយុ២៥ឆ្នាំ មុខរបរជាងដែក ស្នាក់នៅបន្ទប់ជួលភូមិកើតហេតុខាងលើ ទី.២ ឈ្មោះ សុខ មាន់ ហៅ សិត ភេទប្រុស អាយុ៣០ឆ្នាំ មុខរបរ ប៉ាន់ណូ ស្នាក់នៅបន្ទប់ជួលភូមិកើតហេតុខាងលើ និងទី.៣ ឈ្មោះ តៃ ស្រីពៅ ភេទស្រី អាយុ ២០ឆ្នាំ មុខរបរកម្មការិនីស្នាក់នៅបន្ទប់ជួលភូមិកើតហេតុខាងលើ។
សមត្ថកិច្ចដកហូតសម្ភារៈបានដូចជា ស្លាកលេខម៉ូតូចំនួន២,សោកាច់.ក ម៉ូតូចំនួន២ សម្ភារៈកូនសោកែច្នៃមួយចំនួនទៀត។ មន្ត្រីបានបន្តថា ការចាប់ខ្លួននេះ បន្ទាប់ពីមានពាក្យបណ្ដឹងរបស់ជនរងគ្រោះក្នុងករណីបាត់ម៉ូតូកន្លងមក ទើបកម្លាំងសមត្ថកិច្ចធ្វើការស្រាវជ្រាវរហូតឈានទៅដល់ចុះទៅចាប់ខ្លួន ជនសង្ស័យ៣នាក់នេះបានតែម្តង រួចនាំយកទៅសាកសួរនៅផ្នែកជំនាញខណ្ឌ ដើម្បីស្វែងរកបក្ខពួកបន្តទៀត។
បច្ចុប្បន្នជនសង្ស័យត្រូវសមត្ថកិច្ចឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងបញ្ជូនទៅសាលដំបូងរាជធានីភ្នំពេញចាត់ការតាមច្បាប់ ៕
