ភ្នំពេញ ៖ ក្រុមការងារចុះពង្រឹងតាមបណ្ដាភូមិ ទាំង៤ក្នុងសង្កាត់សំរោង ត្រូវចុះតាមខ្នងផ្ទះរបស់ប្រជាពលរដ្ឋ ដើម្បីពន្យល់អំពីស្ថានភាពបច្ចប្បន្ន អោយពួកគាត់បានយល់ដោយកុំឲ្យជឿតាមពួកអគតិមួយចំនួន ញុះញង់បំភ្លៃការពិត ហើយឲ្យជឿតាមក្រុមឧទាមក្រៅច្បាប់នោះ។
ក្នុងពិធីសំណេះសំណាលជាមួយប្រធានក្រុមបក្ស អនុប្រធានក្រុមបក្ស សមាជិកបក្ស ក្នុងសង្កាត់សំរោង នាព្រឹកថ្ងៃទី១៩ ខែតុលា ឆ្នាំ២០១៩នេះ លោកស៊ីម សុផង់ អនុប្រធានក្រុមការងារចុះជួយសង្កាត់សំរោង បានលើកឡើងថាសូមក្រុមការងារចុះពង្រឹងតាមបណ្ដាភូមិទាំង៤ ត្រូវដឹងពីសភាពការបច្ចប្បន្ន ដើម្បីពន្យល់ដល់ប្រជាពលរដ្ឋ អោយបានដឹងហើយកុំជឿតាមការឃោសនារបស់ពួកទណ្ឌិតសម រង្សី ទាំងនេះឲ្យសោះ។
លោកបន្តថា បច្ចប្បន្នមានតែគណបក្សប្រជាជនកម្ពុជា របស់យើងទេដែលដឹងសុខដឹងទុកប្រជាពលរដ្ឋ ពិសេសយុវជនតែម្តងដែលជាទំពាំងស្នងឬស្សីនោះ។ ហើយយុវជននៅក្នុងគណបក្សប្រជាជន ត្រូវខិតខំប្រឹងប្រែងធ្វើឲ្យបានល្អ បើយើងខិតខំប្រឹងប្រែងខ្លួនឯងបានជាកូនល្អ ជាមិត្តល្អ និងជាយុវជនល្អហើយនោះ ខាងក្រុមការងារនិងគណបក្សប្រជាជនកម្ពុជា នឹងជួយយើងវិញជាក់ជាមិនខាន។
លោកបញ្ជាក់ថា ក្រុមការងារចុះជួយសង្កាត់ ត្រូវហ៊ានលះបង់ពេលវេលា ដើម្បីគាំទ្រ និងជួយពង្រឹងគណៈបក្សភូមិ ទាំងសម្ភារៈ ថវិកា និងស្មារតី ពិសេសជួយសមាជិកសមាជិកាគណបក្ស ដែលក្រីក្រជួបការលំបាក និងដើម្បីសម្រួលដល់ការ អនុវត្តន៍ សេចក្ដីណែនាំ និងផែនការរបស់ថ្នាក់លើ ឲ្យទទួលបានជោគជ័យ និងមានប្រសិទ្ធភាព។
ជាចុងក្រោយលោកអនុប្រធានក្រុមការងារចុះជួយសង្កាត់ ក៏បានជំរុញឱ្យមន្ដ្រីទាំងអស់ ជាពិសេសសមាជិកក្រុមការងារចុះជួយសង្កាត់សំរោង និងមន្ត្រីបក្សត្រូវខិតខំបំពេញការងារ ទៅតាមតួនាទីរៀងៗខ្លួន ដើម្បីបម្រើ សំណូមពរ និងសេចក្ដីត្រូវការជូនប្រជាពលរដ្ឋ ពិសេសនៅពេលប្រជាពលរដ្ឋជួបការលំបាកតែម្តង ហើយត្រូវរួមសាមគ្គីគ្នា ការពារសមិទ្ធិផលទាំងឡាយរបស់គណៈបក្សប្រជាជន ឲ្យបានស្ថិតស្ថេរគង់វង្ស នៅជាអមតតរៀងទៅ៕
